缽仔糕

缽仔糕（粵拼：but3 zai2 gou1），又寫做砵仔糕，係種傳統廣東小食糕點，亦係香港成日見嘅街頭小食。源自廣東開平。

傳統嘅缽仔糕以黃糖、米粉等造成後，放喺一個瓦製嘅細缽裏面蒸熟；但而家嘅製法已多數改用細瓷碗。食嗰時先將缽仔糕喺細缽倒出來，用竹籤㓤起來食。有啲缽仔糕加入紅豆；亦有缽仔糕改用白砂糖整，因而係白色嘅。啱啱蒸好嘅缽仔糕，暖、滑、香、綿。

缽仔糕喺1980年代得一、兩種嘅口味。但到咗今日，缽仔糕嘅口味增加咗好多種。以前嘅缽仔糕通常都係用黃糖整嘅，但而家有啲係用砂糖，有啲係用冰糖，重有啲係用蔗糖整嘅，呢啲都適合唔同人嘅口味。呢啲口味唔止有創意，而且重好健康。

喺廣州西關亦有得賣，一般一細半碗算單位，每個晶瑩剔透，咬落去口感彈牙，裏面重有細堆嘅口味嘅餡料，多種多樣，好似綠豆、紅豆、朱古力、菠蘿、椰子、香橙、芒果、馬蹄、西米、香芋等。

陽春缽仔糕

陽春嘅「缽仔糕」係有鹹嘅食法，當地人都非常鍾意呢種嘢食，陽春缽仔糕原始做法係通過研磨米漿再用蒸焗嘅方法製作而成，蒸熟後可以添加蒜油同醬油調味，後期通過改良添加咗芋同芝麻令到缽仔糕風味更為突出。缽仔糕一般都係用一個細缽仔裝住，食嘅時候用竹籤劃開方格狀。