瘧疾,又叫發冷病,卽係發冷[1][2],係種傳染病,由瘧蚊傳染。瘧蚊帶瘧原蟲,寄生體內,蚊針啄人時,原蟲傳到人身。原蟲並非昆蟲、爬蟲,而係簡單細胞生物。原蟲入肝先,再寄喺紅血球。
發冷之所以咁叫,係患者會發高燒,會感周圍冰冷。患者嚴重會休克,甚至死。
致人病嘅原蟲,有五種之多。而可以帶原蟲嘅蚊,只有按蚊(按讀安)呢系。
原蟲有蚊帶住。蚊一吸血,就由蚊口水注入人身。原蟲首先搵肝,匿喺肝細胞,自我分裂繁殖,到太多喇,肝細胞就爆開。原蟲搵轉搵紅血球細胞,匿喺入面,自我分裂繁殖。匿喺肝同紅血球細胞入面,故此免疫系統,難於察覺。更有幾十種蛋白質唔同變化,免疫系統都唔易認出。帶蟲紅血球,本應畀脾消滅,但係蟲會分泌蛋白質,令血球黐喺血管,就唔會過脾。不過黐住血管,會塞住微血管,如果係腦部有關,就會休克,甚至死。
喺血入面,有啲原蟲會做有性繁殖,生出配子,等下一次有蚊吸血,就可以寄入蚊身。
發冷好耐以前就有,可能跟住人演化而嚟。史上最早記載係中原公元前二千七百年。古人知同沼地有關,喺熱帶同亞熱帶易惹到,叫做山林瘴氣。但點解有發冷病,就要等有顯微鏡同病理學先至明白。
一八八零年,法國醫生喺發冷病人血中,搵到瘧原蟲。一八九七年,英國人發現按蚊體內原蟲,但未有卽時跟進,但得加拿大人協助,家下知人嘅發冷病,原蟲係按蚊散播。同年,意大利人都有同樣發現。其他瘧原蟲,喺下年喺蚊搵到。
不過由蚊釘到發病,血入面搵唔到原蟲,啲人未知有乜事。直到一九四七年,英國人曉得喺肝度,原蟲分裂。英國人同美國人,最後曉得,某啲原蟲喺肝可展匿幾個月咁耐。至此先完全理解瘧原蟲嘅始末。
由於發冷病太厲害,死唔少人。有啲身體內在缺陷,由於令原蟲不易喺體繁衍,亦得以流傳落來。如鎌刀形紅血球症、地中海貧血、葡萄酵素缺乏症等,紅血球帶氧不足,令原蟲難以繁衍。
發冷病通常係出現係窮地方,因爲無錢醫,病唔根治,病原就易散播開去。發冷病又搞到人短命易死,唔死都不能做事,太多人係咁,經驗知識流失,令社會經濟大受打擊,亦會令地方更加之窮。所以防治發冷,可以幫到呢啲地方復蘇。
史上有例,侵畧國去到發冷病地區,兵士病死無數,甚至病傳返本土,搞到不得不停止侵畧。
預防發冷病,有兩途。一由原蟲着手,一由蚊着手。原蟲方面,未有有用嘅疫苗,難搞。蚊方面就易啲。
蚊有幾個方法,一係阻蚊咬人。好似身上搽驅蚊藥,或者落蚊帳。如果蚊帳有藥,就更佳。蚊帳之所以有用,係因爲雌蚊挨晚出來搵食,搵血吸,直至成夜吸到血爲止。蚊帳喺保護人,夜晚睏覺阻蚊搵食。
蚊食完會就近扶嘢消化,牆油殺蚊藥,亦阻到蚊生殖。蚊喺死水生春,放走死水,或者死水變流水,蚊就難以繁殖。靜水中放魚食春食幼蟲,亦好有效。
呢啲方法,平過研制藥物。歐洲同美國,就係用呢啲方法,驅走發冷病。香港開埠初期,英人死傷枕籍,亦可能同發冷病搞事。當時唔知發冷病點來,但英人喺黃坭涌放水,香港城中,起街渠明渠暗渠,就起清理積水之效,防止蚊患。疾病亦得以減少。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.