From Wikipedia, the free encyclopedia
狄志遠,SBS,BBS,JP(Tik Chi Yuen,1957年9月24號—)係香港政治人,前香港民主黨成員,做過副主席,早期被視為泛民主派中較主流泛民溫和嘅人士。2015年因為政改立場同個黨有唔同意見而退黨,創辦中間派組織新思維同做埋主席,但其後政見逐漸傾向親中派。2021年再次晉身立法會,自稱非建制派。
狄志遠喺1991年到1995年代表匯點(民主黨前身)做過香港立法局新界北議員,但無尋求連任,淡出政壇,仍保持民主黨員身份。
2006年到2008年,狄志遠做咗民主黨副主席。佢2008年出山參選立法會選舉,參選社會福利界,輸畀獲多數泛民主派支持嘅張國柱。
2012年,狄志遠因為積極支持港府推行德育及國民教育科,同主流泛民相反,而被何俊仁批評。
2015年,狄志遠因為接受政改方案可以「袋住先」,同黨嘅立場唔同,決定退黨,同黃成智等前民主黨成員另行創辦中間派組織新思維同做埋主席。
媒體曾經多次報道,新思維同中聯辦有唔少嘅往來,中聯辦甚至喺2016年香港立法會選舉安排配票畀喺九龍西代表新思維參選嘅狄志遠。對於呢啲關係,狄志遠亦公開承認,新思維得到中聯辦嘅關心[2],不過,佢最後都係落選。其後新思維嘅路線被部分成員批評,其後呢啲成員更退黨抗議。
另外,喺2017年香港行政長官選舉入面,佢亦好早就支持林鄭月娥。例如,佢早喺林鄭月娥仲係辭職休假嗰陣,已經陪佢去慈雲山長者屋探訪長者,預先為參選特首熱身,又喺《經濟日報》發表評論文章形容另一參選人曾俊華喺中央多次勸退下仍然參選係「衝紅燈」,有啲評論就話佢儼如中聯辦代言人[3]。
喺2018年11月香港立法會九龍西地方選區補選,佢同多名親北京派政治領袖同立法會議員,包括李慧琼、鄭泳舜、蔣麗芸、吳秋北、梁美芬、邵家輝,葉劉淑儀等人同台支持陳凱欣,話陳凱欣係一個做實事嘅人,又呼籲中間選民唔好被動、唔好逃避[4][5]。
喺北京單方面未經香港人同意修改香港選舉制度之後,因為直選議席數目大幅倒退同埋參選要經過政府單方面嘅國安審查,泛民主派同香港本土派好多都對參與選舉持負面態度,但狄志遠仍然參與2021年舉行嘅選舉委員會選舉。最後佢只能夠抽籤當選選委,成為咗整個選舉委員會入面唯一一個當選,新定義之下嘅「非建制派」[6],之後响第7屆香港立法會選舉參選社會福利界功能界別,以1400票當選,被視為唯一一位當選嘅香港中間派立法會議員。
重返立法會後,雖然佢以中間派或非建制派自居,但佢有時亦得到親中派媒體幫佢造勢宣傳[7],又有參與一啲親中派嘅行動,例如喺2022年2月中習近平就香港武漢肺炎疫情問題發表講話,佢就有份參與親中派全體「感謝習近平總書記作出重要指示」嘅聯合聲明[8][9]。另外,喺李百全上任廣播處長主理香港電台之後,一啲民主派聲音被進一步打壓,但狄志遠反而大讚港台定位清晰,向社會發放國安觀念[10]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.