廁所

  「廁所竉」跳轉到呢度。想搵性交行為，請睇「廁所竉 (性交)‎」。

廁所（又寫做厠所）主要係用來畀人屙屎屙尿嘅地方，通常係有間房又或者獨立一間屋仔，等用嘅人有私隱同埋減少臭味傳出。現代廁所多數係水廁，即係有水沖廁，將屎尿經水管到化糞池或者污水處理廠清理。唔係嘅話，就叫做旱廁，廁所下面就會有收集箱，定時有人清理，又或有條坑作沖出河海。

波音747飛機廁所

稱呼、簡介

中國大陸地區

中國古代廁所大多數起喺屋企出面，用「溷廁合一」形式將豬舍相連去豬廁到^[1]。通常都會整個屎坑，然後塞啲芧草落去，啲人叫佢做「茅坑」、「茅房」或者係「茅廁」。喺先秦同漢魏時期，廁所亦都有「行清」呢個名。宋朝僧人雪竇曾經喺靈隱寺到洗廁所，所以啲人又拎咗佢個名，叫廁所做「雪隱」。

現代廁所

依家我哋主要都會叫佢做「洗手間」、「衛生間」、「化妝室」等等。

閩南語叫廁所做「屎礐仔」（sái-ha̍k-á）^[2]，閩東語福州話稱為「糞坑厝」^[3]，潮汕話又叫佢做「東司」，客家語稱之為「屎窖」或者係「屎缸」，粵語俗稱「屎坑」（無馬桶的廁所）或者係「屎塔」（有馬桶的廁所）（不過多數香港人都係叫返佢做「廁所」）。喺四川話到，啲人就叫廁所做「茅廁」（“廁”音同“司”）。

種類

廁所係有好多種嘅，最常見嘅係座廁同蹲廁，而男性專用嘅就有尿兜同尿槽。

冇咁常見嘅有 化學廁所，尿廁同旱廁

公共交通工具嘅廁所

喺民航客機、區域鐵路、長途客車同郵輪度都有廁所，唔少都裝咗集便裝置，不過有啲舊啲嘅鐵路列車係用直排式嘅，即係糞便等等嘅污糟嘢直接排出去個路軌度。所以呢啲廁所係喺停車嗰陣唔比用嘅。

另外㗎列車揸到去無碴軌道區段嘅時候，乘務員亦都會唔俾啲乘客用直排式廁所，直至㗎列車離開咗無碴區段。

嚟香港，港鐵方面唔俾城際直通車嚟香港境內使用直排式廁所。如果係冇集便裝置列車嘅話，入嚟境內嘅時候會將個廁所鎖往。

• 
  飛機上面嘅真空廁所
• 
  台灣高鐵700T型電聯車無障礙廁所
• 
  直排型中國鐵路25G型客車將廢水直接排放去軌道到
• 
  中國鐵路25T型客車嘅真空集便器

設施

依家廁所會有清水同梘液供應，畀人用完之後洗手，以免傳播病菌，所以廁所又叫做洗手間。有啲廁所有廁紙供應，方便人痾完屎抹屁股或者抺手。

勁啲就會有通風設備同埋吹風機。依家有啲廁所響應環保，特登收埋晒啲廁紙，淨係放啲吹風機，造成咗一啲唔方便。

再勁啲嘅更加會有香水、點蚊香、播音樂，令到啲人去廁所嗰陣舒舒服服。 有啲會俾你用摺疊式枱子，方便家長幫BB換尿片。

仲有啲會放擦鞋機添。

• 
  大型活動常見的流動廁所，圖中兩個為ISS集團所提供
• 
  紅磡站男洗手間洗手台
• 
  學校廁所（普通初中）

文化

• 廁所文學：廁所文學係話，啲人去廁所嗰陣因為無聊、抒情或者係其他嘅目的而喺廁所嘅牆壁到塗鴉，係一種街頭文化，喺某啲地方嘅工作廁所或者係學校廁所就會見到。
• 主題餐廳：有間嘢喺台灣高雄市林泉街到用咗廁所做主題，啲佈置同餐具都用咗廁所度橋。仲有一間係位於中華人民共和國深圳羅湖區嘅80 Café度。
• 廁所幽默：一種核突嘅幽默，黑色幽默，係關於啲屎尿屁嗰類令人想嘔嘅提材做主題，用不衛生嘅描述同違反主流禮儀嘅反差感嚟製造笑點，同陰莖笑話等等嘅亞文化有好大嘅重合。年齡階層都會有廁所幽默，不過喺細路仔同青少年度會更加常見^[4]，亦都係東亞ACG同emoji文化到幾常見嘅喜劇元素。

注釋

日文「御手洗」讀做otearai（お手洗い）嗰陣係廁所嘅委婉讀法；如果讀做mitarai嗰陣就冇廁所嘅意思，就變咗做神社（じんひゃ）淨手池（手水舎），所以有時都會係啲地名或者係姓氏。

參考文獻

1. 淺談廁所文化同廁所革命——我國城鄉現實衛生同初級衛生保健工作中嘅特大難題 互聯網檔案館嘅歸檔，歸檔日期2022年4月4號，.，《中国卫生事业管理》 1992年11期。
2. 屎礐仔 互聯網檔案館嘅歸檔，歸檔日期2022年4月25號，.，教育部臺灣閩南語常用詞辭典。
3. 方言講古（四） 糞池－廁所 互聯網檔案館嘅歸檔，歸檔日期2022年4月14號，.，方言講古【四】 - 馬祖資訊網。
4. Poop Culture: How America is Shaped by its Grossest National Product 互聯網檔案館嘅歸檔，歸檔日期2021年8月22號，. by Dave Praeger ISBN 1-932595-21-X]

睇埋

• 世界廁所日
• 建築設計