桂宮宜仁親王

桂宮宜仁親王（日文：かつらのみやよしひとしんのう，1948年 2月11號—2014年 6月8號）係桂宮^[a]第一代當主，三笠宮崇仁親王二仔，上皇明仁嘅堂細佬。

早年

1948年，崇仁親王同妃百合子第三個細路（第二個仔）響三笠宮宮邸出世，改名叫宜仁。相比起大佬寬仁同埋細佬憲仁，宜仁比較少出席公開活動，所以外界對佢早年嘅經歷唔係知好多。

1968年，佢舉行成年禮，同時獲頒大勳位菊花大綬章。1971年響學習院大學法學部政治系畢業，攞到政治學士嘅銜頭，同年佢去澳洲國立大學留學，兩年之後返日本，曾經做過日本-新西蘭協會總裁。

佢一直都好崇拜三伯父高松宮宣仁親王，所以響宣仁死咗之後，佢接手咗好多宣仁生前嘅公職，就好似大日本農會、大日本山林會同埋日本工藝會等等。

桂宮時代

1988年1月，佢獲昭和天皇另封宮號「桂宮」，係最後一個唔係天皇嘅仔女開嘅宮家。由於呢個桂宮同另一個桂宮係兩回事，所以又叫做「新桂宮」。

同年5月，佢做緊嘢期間突然暈低，之後送去醫院，開頭懷疑係急性硬膜下血腫，後嚟證實係肥厚型心肌症，響醫院治療咗六個月之後先至出院。但係，佢因此隻右眼盲咗、下半身癱瘓兼且失憶，成世人都要坐輪椅。響1989年昭和天皇嘅葬禮，全個皇室就唯獨宜仁冇出席。

之後佢曾經同一個為佢服務嘅下人拍拖，兩個人更加試過住埋一齊，但由於女方同人離過婚，因為呢點而畀皇室反對，所以呢門婚事最後告吹，而宜仁一生人都未結過婚。

宜仁一直受到敗血病嘅困擾，2008年響睇緊第63屆國民體育大會上面更突然病發，入院醫咗成六個月先出得院。響2011年仲因為呢個病而搞到佢有些微肺炎症狀，最後雖然好返，但就啞咗。

2014年1月，宜仁因為發高燒住咗一個月醫院，之後佢成日因為發燒而經常進出醫院。6月8號朝早九點，宜仁畀宮內廳嘅人發現佢冇咩嘢呼吸，即刻被送去醫院，響朝早十點五十五分死咗，終年六十六歲，死因係急性心肌梗塞。佢死後，桂宮因為冇後人而絕家。而崇仁三個仔全部行先過佢，兼夾生親都係女，所以三笠宮畀人判定為「男系繼絕」。同年6月，響文京區搞斂葬之儀，正式落葬於豐島岡墓地。

Remove ads

老豆：崇仁

阿媽：百合子

兄弟姐妹：大家姐甯子---大佬寬仁---細妹容子---細佬憲仁