格鬥遊戲

格鬥遊戲（粵音：gaak3 dau3 jau4 hei3）要求玩家控制自己用嘅角色，同（由電腦或者第啲玩家控制嘅）對手進行近身格鬥。格鬥遊戲比賽好多時會分多個回合，有兩個或者以上嘅角色，喺一個競技場上，用近身嘅攻擊一較高下。格鬥遊戲嘅角色可以有些少遠距離攻擊嘅能力，但應該仲係依賴近身攻擊多嘅。如果隻遊戲嘅戰鬥以遠距離攻擊為主嘅，就會變成射擊遊戲。格鬥遊戲例子有

• 街頭霸王系列、
• 力石戰士、
• 真人快打系列、同埋
• 出自香港嘅小朋友齊打交（LF）。

喺格鬥遊戲裏面，唔同角色會有唔同嘅異能，而且喺速度同力量等方面有差異，但實力會相約，例：一個大力、一拳可以造成大損害嘅角色可能速度會比較慢，等其他角色可以靠蠻力以外嘅方法應付佢。

概念

睇埋：打交同格鬥武器

• 擋（blocking）：一個角色進入一個擋緊嘅狀態，擋緊嘅角色暫時唔能夠攻擊，兼且移動能力會下降，但做緊擋嘅角色防守力會提高，冇咁易俾對手傷害；攻擊可以嚟自上中下等多個方向，通常要擋正確嘅方向先可以減少嗰吓攻擊造成嘅傷害（睇埋由上攻擊）^[1]。睇埋碎片傷害。
  • 破擋（guard crush）：某啲格鬥遊戲有嘅機制，指個角色喺擋咗若干吓攻擊之後會進入一個暫時唔能夠擋嘅狀態，好多時進入破擋狀態嗰一刻個角色會有短暫嘅暈眩狀態（睇下面 stun）；呢種機制嘅用意在於令玩家唔可以一味淨係防守，鼓勵玩家採取比較攻擊性嘅打法^[1]。
  • 擋唔住（unblockable）：指一吓攻擊效力唔受擋影響，例如個遊戲程式編寫成某吓攻擊，俾呢吓攻擊打中嗰個角色就算身處擋緊嘅狀態，吓攻擊都會對佢造成同冇擋一樣嘅傷害同擊回力（knockback），常見於一隻格鬥遊戲當中比較勁嘅招式^[1]。
• 掟（throwing）：一個角色捧起第個角色，再將佢掟出去^[1]。
• 下墜擊（dive）：一個角色由空中快速向下移動攻擊喺下面嘅對手^[1]。
• 由上攻擊（overhead attack）：對手一定要企喺度做擋姿勢先會擋到嘅招式；多數一路跳一路出嘅招式都屬由上攻擊^[1]。
• 取消動作（cancel animation）：指一個角色喺出一招嘅中途取消出招，變返做一般（可以擋同跳等）嘅狀態；有好多格鬥遊戲都會容許玩家取消某啲招式嘅動作，而識得乜嘢時候要取消動作（並且擋或者迴避）一般係高技術嘅表現^[2]。
• 收招（recover / recovery）：指一個角色出完一招之後要用幾多時間先可以返去一般（可以擋同跳等）嘅狀態；喺收招期間，一個角色唔能夠擋或者迴避，所以處於一個好容易露出破綻嘅狀態，對手可以趁佢未收招完畢攻擊，造成巨大傷害；好多時勁嘅招式都會有收招慢嘅缺點－呢啲招式會係高風險高回報嘅招式^[3]。

技巧

• 連續技（combo）：常見於格鬥遊戲，指喺遊戲當中可以連續短時間內執行一段特定嘅動作，成功嘅話可以一吓對對手造成重大傷害；更廣義上嚟講，「連續技」可以係指一段要喺短時間內執行（所以要有技巧或者運氣）、執行成功可以取得大量分數或者大幅提升贏面嘅動作^[4]。
  • 無限連續技（infinite combo）：（只要用者技術夠好）可以無限次重複嘅連續技。
  • 半無限連續技（semi-infinite combo）：可以重複好多次嘅連續技。
  • 即死連續技（Touch of Death combo，ToD combo）：指一出到就保證 OHKO（睇上面）對手嘅連續技^[1]。
• 狂撳個掣（button mashing）：常見於格鬥遊戲，可以有兩個意思^{[橋 1]}：
  • 一個技術唔高嘅玩家唔知連續技要點出，於是就亂咁撳掣，諗住有機會可以擢到個連續技出嚟。
  • 喺某啲格鬥遊戲入面，某啲角色會具有「狂撳某段掣若干次」就會出到嘅招式，當有個（知自己做緊乜嘅）玩家出呢啲招嗰陣，佢就噉望落會好似喺度亂撳噉。
• Buffer：格鬥遊戲技巧；喺格鬥遊戲入面，角色往往會有連續撳某幾個特定嘅掣就出到嘅招式，所以格鬥遊戲高手往往會趁自己嘅角色攻擊唔到嘅時候（例如係上一招仲未完）撳定下一招要撳嘅掣，然後喺攻擊得到嗰一刻撳最後一個掣，等自己個角色能夠喺出完一招之後即刻出下一招^[1]。
• Crossup：格鬥遊戲技巧，指將自己置於可以由多個角度攻擊嘅位置，等對手唔知要擋邊一面嘅攻擊^[1]。
• 篤吓篤吓（poking）：係噉使用比較弱但用起上嚟低風險嘅招式，務求慢慢喺唔受傷嘅情況下打低對手^[1]。

橋頁

1. Button Mashing. TV Tropes.

引咗

2. The fighting games glossary.
3. WTF Are Start-Up And Recovery Frames - Why Fighting Games Are More Complicated Than You Might Think.
4. "The Next Generation 1996 Lexicon A to Z: Combo". Next Generation. No. 15. Imagine Media. March 1996. p. 31.