李世隆(Dragon Li),香港親中陣營政治人物,民建聯成員,2016至2019年葵青區議員(石蔭選區),現任環境及生態局局長政治助理(繼承區詠芷)。
從政經歷
佢喺2015年香港區議會選舉擊敗咗民主黨嘅尹兆堅,成為區議員。但喺2019年,親中派因為力撐逃犯條例修訂草案而選情大受打擊,屬親中派民建聯嘅李世隆亦被捲土重來嘅泛民主派尹兆堅以4,890票擊敗[1],而李世隆自己就得到3,730票[2]。
佢喺2016年第6屆香港立法會選舉入面,排喺陳恒鑌、郭芙蓉名單入面嘅第三名。
爭議
2015年區選抹黑、種票、舞弊疑雲
喺2015年香港區議會選舉,多個選區,包括李世隆贏咗嘅石蔭選區都出現咗一啲種票舞弊疑雲。例如,落敗咗嘅尹兆堅就曾經話,呢一區選舉出現選舉舞弊、非法行為、大規模種票嫌疑、選民人數無故激增,導致佢以53票敗選[3]。尹兆堅又話,李世隆喺選舉期間違反房署規定喺區內派發抹黑單張,但房署坐視不理;加上民建聯同工聯會成員喺選舉期間誹謗佢[4]。
涉嫌違反私隱條例
喺2017年11月,多個媒體報道,李世隆向居民發放問卷,要求佢哋填寫個人資料先可以換取月曆,又話呢啲資料會用作日後聯絡之用,結果被投訴。嗰啲有關嘅單張又以「石蔭邨/石蔭東邨屋邨管理諮詢委員會委員」身份發出,表達非常含糊,做法被質疑誤導居民,令居民誤以為單張係房屋署或者邨管會發出嘅問卷調查。個人資料私隱專員公署回應嘅時候話,質疑事件或已經違反私隱條例。最終李世隆需要已將收回嘅問卷銷毀[5][6]。