承子

高圓宮承子女王（日文：つぐこじょおう^{Tsuguko Jōō}，1986年 3月8號—）係高圓宮憲仁親王同久子妃嘅大囡，細妹分別係千家典子同埋守谷絢子。尊稱係「承子女王殿下」。

佢係最先染頭髮嘅日本皇室成員。

經歷

佢先後讀過松濤幼兒園、學習院初等科、學習院女子中等科同埋學習院女子高等科，之後去讀學習院女子大學國際文化交流部。響2004年以交流生嘅身份去愛丁堡大學讀犯罪心理學，之後愛丁堡大學睇起佢，好歡迎佢過去讀。於是佢響2005年從學習院女子大學退學，轉讀愛丁堡大學。

響2008年突然之間中途退學，返翻嚟日本^[1]。同年，佢轉讀早稻田大學國際教養部^[2]。響2013年畢業。

畢業之後，佢做咗聯合國兒童基金會日本分會嘅非正規職員。

響2002年佢老豆憲仁嘅葬禮上面，佢染住頭髮咁出席葬禮，畀人批評，話佢「行為不良」。佢作風大膽，試過響社交網站上面公開自己響英國留學時期嘅感情生活，話自己曾經陷入四角戀^[3]^[4]。所以佢畀人話係「叛逆公主」（多數係中國人話，日本人最多都只係話佢「行為不良嘅公主」）^[3]。