墨西哥美洲足球會

 墨西哥美洲足球會（粵拼：mak6 sai1 go1 mei5 zau1 zuk1 kau4 wui2*6） （西班牙文：Club de Fútbol América S.A. de C.V.），簡稱美洲足球會mei5 zau1 zuk1 kau4 wui2*6（Club América），係墨西哥足協屬下嘅一間足球會，喺1916年10月12號成立，位置喺墨西哥嘅墨西哥城，主場係阿斯迪卡體育場。呢間球會亦係墨西哥最成功嘅足球會^[6][7][8]，曾經贏過12次聯賽冠軍^[9]、5次墨西哥盃同5次墨西哥冠軍盃冠軍。喺國際賽場攞過6次中北美洲黃金盃同2次大美洲盃（英文：Copa Interamericana）、1次中北美洲巨人盃冠軍^[10][11][12]。

墨西哥美洲
América

外文全名	Club de Fútbol América S.A. de C.V.[1]
花名	鷹[2] 藍點心[3] 百萬褲窿兵[3]
創會	1916年10月12號， 108年之前 (1916-10-12)
主場	阿斯迪卡體育場 （容納人數：105,000[4][5] ）
波士	艾米利奧·阿斯卡拉加·環
主席	列卡度·皮拉艾斯
打緊聯賽	墨西哥足球職業聯賽
網	球會網站
主場波衫 作客波衫

呢間球會參加過2006年同2015年嘅世俱盃。

史

1910年代初期，足球喺墨西哥一帶非常流行。尤其喺墨西哥城，有2間學院球會以學生嘅名義嚟成立。1916年10月12號，嗰兩間以「學生」嘅名義成立嘅足球會團隊話搞一間大嘅足球會，但改名時遇到麻煩，因為嗰時墨西哥有好多學校嘅新球會都以「學生」做名。後嚟有位成員——比特路·昆坦尼拉（Pedro "Cheto" Quintanilla）建議將間足球會改名做「美洲」嚟紀念哥倫布日，結果俾好多人讚成而改成噉嘅名。

1924–1925年喺墨西哥美洲隊效力嘅足球員。

球會喺1919年改名做「聯合足球會」，但用咗一年之後就改返原名^[13]。1924～1928年期間，球會攞過聯賽冠軍兼有一大班球波撐佢^[14][15]尤其喺1926年，成為第一間墨西哥球會唔喺墨西哥踢波^[13]。除咗佢咁巴之閉嘅成績之外，重同主帥請求減少聯賽嘅外援名額。墨西哥足協喺1928年成立之後，重揀咗呢個隊啲隊員去參加1928年奧運會同第一屆世界盃^[16]。

直到1942年為止，雖然墨西哥城發展得好快，但佢早就有好多個聯賽響度。喺1942–43賽季，第一屆國家初級聯賽正式舉行，但球會曾經喺1920年代同1930年代賽季冇參賽。1954年時攞咗球會第一次聯賽盃冠軍^[17]。

1956年，球會被賣到飲料廠商Jarritos。新贊助商諗住將呢間球會打造成超級波隊，結果喺1954～55賽季攞咗國家盃冠軍^[18]，甚至贏埋一次墨西哥冠軍盃^[19]。但從1959年7月22號開始滑坡，一直返唔到轉頭，結果贊助商唔玩喇，將隊波賣咗畀Telesistema Mexicano^[20]，但老細唔識足球。不過佢啲戰績反而彈返起身，1959–1960賽季攞咗聯賽亞軍，1964年4月21號攞到第一個中北美冠軍盃冠軍^[21]，再喺1965年5月21號實現盃賽2連冠^[22]。

1970年世界盃閉幕之後，墨西哥足協搞咗足球改革，先係將聯賽一分為二，而美洲隊入咗2號區，榜首兩位喺賽季尾以決賽形式爭冠軍。結果美洲隊喺1970–1971^[23]、1973–1974^[24]同埋1975–1976賽季^[25]攞到冠軍，1977年重攞咗中北美黃金盃冠軍。

球會喺1980年代時期，喺中北美賽場搞咗佢一代嘅王朝^[26]。先係攞咗5次國內聯賽、2次超級盃同1次中北美黃金盃冠軍。但到咗1990年代，成績開始出現波動，凈係攞到1990年中北美黃金盃^[27]同1993年大美洲盃冠軍^[28]，之後幾年連冠軍都攞唔到，直到2001年8月攞咗一次中北美洲巨人盃返嚟^[29]。而聯賽冠軍喺2002—2003賽季先至重新攞返^[30]。

美洲足球會曾經喺2006年世界球會冠軍盃同南韓嘅全北現代汽車隊踢過。

2005—2006賽季嘅中北美黃金盃決賽嘅國家打吡入面，墨西哥美洲以總比分2-1擊敗咗托盧卡，攞咗冠軍，同時係球會第一次參加世俱盃^[31]。喺2006年底辦嘅世俱盃比賽入面，佢雖然擊敗咗亞冠嘅全北現代汽車殺入最後4強，但之後連續輸咗畀歐冠嘅巴塞隆拿同非冠嘅開羅國民而攞到殿軍^[32]。

2006年世俱盃結束之後第二年，佢雖然喺聯賽凈攞咗亞軍^[33]，但嗰年聯賽盃三甲不入^[34]。嗰年雖然被邀請到南美盃重一直殺入到決賽，但最後因客場入波唔夠數而輸咗畀沙蘭迪兵工廠（英文：Arsenal de Sarandí），攞到亞軍^[35]。不過2007年嘅IFFHS排名方面，球會重一度去到世界前10^[36][37][38]。之後除咗2008年攞過InterLiga冠軍之外，2008～2014年連冠軍都未掂過^[39]。但喺2015年4月29號喺加拿大滿地可作客以4-2戰績，夾埋總比分5-3擊敗咗滿地可衝擊，攞咗第六次中北美洲黃金盃冠軍，重攞埋2015年世界球會冠軍盃嘅參賽資格^[40]。

2015年12月13號晏晝，墨西哥美洲喺大阪市長居陸上競技場挑戰廣州恆大淘寶足球會，上半場雙方互交白卷，下半場雖然墨西哥美洲隊憑藉奧列維·皮拉爾塔喺55分鐘入咗波，但廣州恆大淘寶喺第80分鐘入咗波，重喺臨完場時遇到「黑色1分鐘」被反勝，無緣4強^[41]。隨後爭第五位賽事當中，以2-1擊敗非冠嘅TP馬湛比而攞到第5^[42]。