劉禹錫

劉禹錫（粵拼：lau4 jyu5 sek3；772年—842年），字夢得（mung6 dak1），係大唐官員同詩人。佢自身自稱出身自中山（河北省定州市），而傳記寫話出身自彭城（江蘇省徐州市）。老來佢同白居易唱和最多，所以並稱爲劉白，白居易贈佢詩號詩豪（si1 hou4）；因爲做過太子賓客，所以稱呼做劉賓客（lau4 ban1 haak3），又因爲做過祕書監、檢校禮部尚書，所以稱呼做祕書劉尚書bei3 syu1 lau4 soeng6 syu1。

劉禹錫
劉禹錫，出自《晚笑堂竹莊畫傳》
字	夢得
出世	772年 嘉興
死	842年
墓地	河南滎陽豫龍狼窩劉村南高地（檀山）
國籍	大唐
別名	劉賓客；祕書劉尚書；詩豪
籍貫	中山（而家河北定州）/彭城（而家江蘇徐州）
職業	詩人、官員
知名作品	《竹枝詞》《烏衣巷》《西塞山懷古》《陋室銘》
鄉下	浙江嘉興
仔女	劉承雍（仔）
父母	劉漵（父）

白帝城劉禹錫像

小傳

劉禹錫出生喺代代都出儒學者而有名嘅家族，關於佢嘅家世來歷講法比較多^[1]。19歲，劉禹錫去到京都長安（而家陝西省首府西安）嘅學校讀書。793年（貞元九年）21歲時，佢及第進士，之後又過埋博學宏辭科。

佢做過淮南節度使杜佑轄下嘅書記。之後，佢入到中央政界，同同年進士嘅柳宗元一齊加入王叔文（中文：王叔文）嘅黨派，呢個黨派歷經德宗末期嘅貞元年間到順宗期，期間推進政治改革（805年嘅永貞革新）。當中劉禹錫擔當財政方面，因爲佢角色重要，佢同王叔文、王伾、柳宗元一齊並稱爲「二王劉柳」。太過急激嘅改革令佢樹起好多政敵，譬如武元衡。無過幾耐，喺宦官嘅壓力下，在位得八個月嘅順宗退位，然後憲宗即位，武元衡呢班守舊派嘅勢力再盛，王叔文一跣腳就冧咗臺、降咗職，劉禹錫亦遭左遷，任命爲連州（廣東省連州市）刺史，不過喺途中又降格爲朗州（湖南省常德市）司馬，呢一年佢33歲^[2]。呢陣時黨派中其他緊要同道亦同樣左遷爲各地嘅司馬（八司馬事件）。喺朗州約九年間，劉禹錫沉浸喺文學度，呢度古來係楚地，佢從當地風俗度取材來作詩，作啲畀民衆祭祀用嘅歌詞（竹枝詞）。

815年（元和十年），佢召還返京都長安，但佢詠咗首關於玄都觀（道教場所）嘅詩^[3]，入面有揶揄政府主流派嘅內容，結果惹嬲咗當局權貴，又再貶爲連州刺史。之後歷經數地刺史，比如佢赴任過夔州（重慶市奉節縣）刺史同和州刺史，意味住佢畀人放逐多年。828年（大和二年）返去長安，拜命爲主客郎中。結果劉禹錫又再去玄都觀，又詠咗首詩作爲前回嘅續篇。不過呢次有宰相裴度保佢，免咗左遷，但之後裴度引退後，佢想去洛陽任職都唔得，832年（大和六年）外放爲蘇州刺史。因爲劉禹錫份人恃才傲物，性格狹窄，令佢嘅地位好唔安定^[4]。之後又做過太子賓客（即係做太子嘅賓客）、刺史^[5]。

晚年劉禹錫返去洛陽，做太子賓客呢個閒散官職^[6]。佢同白居易交往得好深，元稹未死前就已經經常唱和詩^[7]，死後由世稱「元白」轉爲「劉白」，白居易讚佢詩文神妙。到唐武宗時（在位：840年～846年），佢喺太子賓客之上加封檢校禮部尚書，係最後嘅官職，842年（會昌二年）以70歲壽終，贈戶部尚書^[8]。

佢嘅詩歌作品有《劉賓客集》，共40卷^[9]。

詩風

劉禹錫嘅抱負大，人生中又漂泊多年，所以佢心生對社會不公嘅激憤。爲此，佢作咗幾多詩表露心中嘅憤鬱，有啲係詠史來表白佢不屈嘅意志，有啲係詠物來指摘當時嘅政治腐敗。劉禹錫嘅左遷經驗，令佢詠嘅詩諷喻色彩強烈，尤其係樂府體嘅寓言詩。例如《聚蚊謠》，佢將中央政界嘅佞臣比喻成夏天時嘅蚊，呢啲蚊雖然係好細嘅存在，但聚埋一齊飛來飛去，煩人不但止重會傷人。但無論點，秋冬時嘅凍天一來，啲蚊就會絕跡，同樣呢班佞臣一失去天時之利，佢哋就會順勢凋落，呢首詩就係有噉樣嘅諷喻意味。此外呢類詩仲有《昏鏡詞》、《養鷙詞》、《讀張曲江集作》等，佢哋都包含呢啲特點。

佢嘅懷古詩亦好得讚賞，因爲呢啲詩都充滿滄桑雋永嘅悲傷情感。當中有名嘅有《烏衣巷》、《西塞山懷古》、《金陵懷古》、《蜀先主廟》。

另外，佢又爲各地唱嘅歌曲作新嘅歌辭。因爲曾經喺巴山楚水之地生活好耐^[10]，令佢心生對地方歌謠嘅熱愛。喺民間音樂浸染之下，作出唔少富於民歌情調、介乎雅俗嘅詩，清新質樸，真率自然。比如喺做朗州司馬時，當地嘅歌謠係用竹枝做和聲嘅，佢接住屈原學習民歌嘅傳統，根據民歌嘅調作出咗十幾篇《竹枝詞》，係有名嘅作品。之外佢又據調《浪淘沙》作咗九首詞。呢啲作品嘅風格就係由佢吸收、融和民歌之美而成。

總體來講，劉禹錫嘅詩歌明瞭、雄渾、節奏幾和諧。當時，佢及得上白居易，世人嗌佢哋做「劉白」，白居易亦贈佢詩號「詩豪」^[11]。

儒學

詩詞之外，劉禹錫又寫咗三篇《天論》，係呼應柳宗元《天說》嘅作品，係變革關於天嘅思考方式嘅先驅。佢嘅學說提出對從來沿襲嘅天人感應說嘅異議，認爲天只係按住佢本身嘅特性去生成萬物，而唔會理人世嘅事，否認神祕、有意志嘅天；而人有自己意識而運用自身嘅能力，依據法（法即自然法則）來制禦萬物，但又唔係對自然規律嘅干預。天同人兩者各有自己能力，都取代唔到對方。佢嘅學說深化咗無神思想，由此，佢畀人睇做「唐代樸素唯物思想家」^[12]。

作品舉例

呢度收錄劉禹錫三首代表作品。

烏衣巷 朱雀橋邊野草花， 烏衣巷口夕陽斜。 舊時王謝堂前燕， 飛入尋常百姓家。

飲酒看牡丹 今日花前飲， 甘心醉數杯。 但愁花有語， 不為老人開。

蜀先主[13]廟 天地英雄氣，千秋尚凜然。 勢分三足鼎，業復五株錢。 得相能開國，生兒不象賢。 淒涼蜀故伎，來舞魏宮前。

參攷資料

• 劉昫。〈卷一百六十 列傳第一百一十：劉禹錫傳〉. 《《舊唐書》》。
• 歐陽脩、宋祁。〈卷一百六十八 列傳第九十三：劉禹錫傳〉. 《《新唐書》》。
• 余冠英、錢鍾書、范寧。〈第二冊〉. 《《中國文學史》》。中國社會科學院文學研究所。
• Trần Lê Bảo（陳黎保） (2004年)。〈新版詞條《劉禹錫》〉. 《《Từ điển văn học》（漢喃：辭典文學；中譯：文學辭典）》 (越南文)。世界出版社（家出版世界；Nhà xuất bản Thế giới）。 {{cite book}}: templatestyles stripmarker in |publisher= at position 7 (help); templatestyles stripmarker in |title= at position 79 (help)
• Trần Trọng Kim（陳仲金著）；Tản Đà（傘沱譯） (1989年)。《《Thơ Đường》（漢喃：詩唐；中譯：唐詩）》 (越南文)。少兒出版社（家出版𥘷；Nhà xuất bản Trẻ）。 {{cite book}}: templatestyles stripmarker in |publisher= at position 7 (help); templatestyles stripmarker in |title= at position 73 (help)
• 卞孝萱、吳汝煜 (1980年)。《《劉禹錫》》。上海古籍出版社。
• 易君左 (1973年)。《《中國文學史》》。華聯出版社。
• Nguyễn Hiến Lê（阮獻黎） (1997年)。《《Đại cương văn học sử Trung Quốc》（漢喃：大綱文學史中國；中譯：中國文學史大綱）》 (越南文)。少兒出版社（家出版𥘷；Nhà xuất bản Trẻ）。 {{cite book}}: templatestyles stripmarker in |publisher= at position 7 (help); templatestyles stripmarker in |title= at position 95 (help)

攷

1. 據中國社科院文研所《中國文學史》第236頁同埋《文學辭典》第905頁，話劉禹錫係洛陽人（而家河南省洛陽城）。《唐詩》第109頁話劉禹錫係彭城縣人（而家屬江蘇省）。卞孝萱提出話劉禹錫係匈奴人後裔，七世祖劉亮跟住孝文帝入洛陽，直到佢老豆爲咗避安史之亂南渡嘉興；鄧聲斌嘅考證就話佢老豆係避亂去彭城。《元和姓纂》同埋《唐邢州司法劉光墓誌》就話劉禹錫嘅祖籍係江西吉州，郡望係沛國彭城。另外劉禹錫自稱佢祖先原貫喺中山，即係而家河北省定州市，話佢係中山靖王劉勝嘅後人。可以確定嘅係，劉禹錫嘅出世地係嘉興。
2. 據中國社科院文研所《中國文學史》第236頁。
3. 首詩個名叫《元和十年自朗州至京戲贈看花諸君子》。原文如下：「紫陌紅塵拂面來，無人不道看花回。玄都觀裏桃千樹，盡是劉郎去後栽。」意思係：「企喺條路，車馬揚起嘅塵撲面而來／無邊個唔話自己啱啱睇完花返來／喺玄都觀嘅上千樖桃樹／都係劉郎走咗（上天台）後種嘅。」首詩嘅意思幾模糊，不過啲人仲係聽出佢嘅諷刺意味，並因此貶職劉禹錫。一般解釋話，千樖桃花嘅形象象徵住嗰陣時透過政治投機而新上位嘅貴族權臣，而睇花嘅人則係啲趨炎附勢嘅人，佢哋爲咗富貴，奉承嗰啲有勢力嘅人。首詩尾句作者用詞「劉郎」指嘅係劉晨上天台山嘅典故，呢個典故意味住走咗陣再返來會發覺啲嘢物是人非，呢個詞亦係指佢自己（都姓劉）。之後，佢得以召返京城時，佢又來呢度作咗首《再遊玄都觀》，重係原先嘅口氣。據中國社科院文研所《中國文學史》第237頁，亦正係呢首詩令佢調去東都（洛陽）做太子賓客呢個閒散官職。
4. 《舊唐書·劉禹錫傳》：「終以恃才褊心，不得久處朝列。」《新唐書·劉禹錫傳》：「禹錫恃才而廢，褊心不能無怨望……」
5. 《舊唐書》嘅傳記寫佢做蘇州刺史後分別做汝州刺史、太子賓客、同州刺史；《新唐書》嘅傳記寫嘅次序係汝州刺史、同州刺史、太子賓客。
6. 唔清楚係邊個太子，因爲相關嘅參攷書都無記名。
7. 據《舊唐書》載嘅白居易嘅話「太和三年春以前，紙墨所存者，凡一百三十八首。」元稹喺大和五年死。
8. 《舊唐書·劉禹錫傳》：「會昌二年七月卒，時年七十一，贈戶部尚書。」古文用虛歲。
9. 據易君左《中國文學史》第494頁同埋《唐詩》第109頁。
10. 劉禹錫喺《酬樂天揚州初逢席上見贈》話：「巴山楚水淒涼地，二十三年棄置身」。其中巴山喺揚子江兩邊，自湖北過到四川，當中有名嘅巫山有12峰，最有名嘅峰係神女峰。
11. 據陳黎保《文學辭典》第905頁。
12. 據中國社科院文研所《中國文學史》第236頁。
13. 蜀先主：即劉備，三國時蜀國君主。

出面網頁

• 劉禹錫喺分面應用主題詞表識別碼嘅資料
• 劉禹錫喺虛擬國際權威檔案識別碼嘅資料
• 劉禹錫喺Freebase嘅資料