九龍坑山

九龍坑山（Kau Lung Hang Shan），英人叫佢做雲山（英文：Cloudy Hill），係香港一山，高四百四十米。佢喺新界東北，係一脈諸山之中嘅西南角。佢喺正大埔新市鎮嘅北面。

九龍坑山
九龍坑山。山頂有發射站
海拔	440米（1,444英尺）
位置	香港新界北部
座標	22°28′33″N 114°10′14″E
九龍坑山 呢座山喺香港嘅地理位置
睇 傾 改

九龍坑山上面，並無民居。區域行政上，佢歸大埔區下面嘅康樂園選區。

名

九龍坑山個名，源自山西腳底，有九龍坑圍村而名。

地理

新界東北，係山脈諸地帶，而九龍坑山，就喺山脈嘅東南角。九龍坑山，西同南都係平原，喺大埔、林村、大窩到粉嶺、上水嘅平原中，一支獨秀，同大窩另一邊北大刀岃，相對而侍。而山脈一邊，東北接石坳山、黃嶺、八仙嶺等等，一直指向大鵬灣。而山脈以南，亦有沙螺洞、平山仔等半山谷地。

九龍坑山亦可一覽各地平原山谷。西同南嘅平原，南叫大埔，西叫大窩。而大窩以北，就有粉嶺、上水平原。佢同北大刀岃之間平原河谷，係平原間嘅通衢。火車有九廣鐵路穿越，而馬路舊時亦大埔公路，如今則有粉嶺公路、大窩支東路同大窩支西路連貫。

南望遠處，可見香港第一高山，卽係大帽山。

由山東南望，近見大埔海，遠見船灣海，極目可見赤門、沙田海。船灣海同大埔海，島仔星羅棋佈。過大埔海見馬鞍山。

史

第二次世界大戰時，英軍曾經註守九龍坑山，以抗日軍。

生態

九龍坑山，有好多唔同自然生境，好似灌木叢同草地。好多登峰蝴蝶同埋罕見嘅蝴蝶，都有機會見到，包括寬帶青鳳蝶、窄斑鳳尾蛺蝶、電蛺蝶同金斑蛺蝶^[1]。而有紀錄嘅，都有六十八種咁多^[2]。

而罕見嘅候鳥丘鷸，亦曾見於九龍坑山^[3]。同樣少見嘅塘尾，國姓異春蜓，亦見於九龍坑山^[4]。

發射站

九龍坑山因爲一支獨秀，高於各聚居地，係起發射站或者山頂轉播站嘅好地點。佢好早就有電臺同電視臺發射站。後尾因爲數碼電視廣播，擴建發射站。站分佈山頂東西，訊號可到馬鞍山、大埔、大埔海、粉嶺同上水、羅湖等地^[5]。

電臺方面，香港三間主要電臺，都有喺九龍坑山起發射站，家下全部都係特高頻兼調頻（FM）廣播，但呢個站唔係乜臺都有^[6]。商業電台嘅商業一台，山上以八十八點三兆赫廣播，而商業二台就九十點七兆赫。香港電台嘅香港電台第一台，用九十三點二兆赫； 香港電台第二台，用九十五點三兆赫；香港電台第四台，用九十七點八兆赫。新城電台嘅新城知訊台，用一百點零兆赫；新城財經台，用一百零四點七兆赫。

電視臺方面，香港兩間主要無綫電視臺，無綫電視同亞洲電視，都有發射站，遍及各臺。模擬同數碼電視都有。數碼電視功率，同慈雲山發射站有得比^[7]。

行山

九龍坑山亦係行山勝地。山嘅西北部份，劃入咗八仙嶺郊野公園，山頂有牌指示，所以西發射站係郊野公園範圍，而東發射站就唔係。香港政府亦開咗衞奕信徑，途經九龍坑山頂，頂南係第八段尾，頂北係第九段頭。山頂可以去唔同地方，西南沿山脊隔火帶，可以去大埔頭，入大埔市區，同東南轉東而行，可入康樂園，轉西，就到大埔南坑。東行落山，可以到九龍坑老圍、九龍坑新圍同元嶺。北行經流水響郊遊徑，入流水響或者鶴藪。西行，經大埔郊野步行徑，落到山中谷地沙螺洞，東去八仙嶺，或者轉南而行，落到山腳鳳園。

交通

九龍坑山有車路上山，由九龍坑上。車路亦可以到流水響。車路起來維修發射站之用。

註

1. 〈九龍坑山介紹〉。原著喺2017年3月25號歸檔。喺2011年7月9號搵到。
2. 〈九龍坑山紀錄〉。原著喺2016年3月4號歸檔。喺2011年7月9號搵到。
3. 〈丘鷸〉。
4. 〈國姓異春蜓〉。
5. 〈數碼地面電視覆蓋範圍〉 (PDF)。原著 (PDF)喺2011年7月21號歸檔。喺2011年7月9號搵到。
6. 〈香港聲音廣播服務頻率表〉 (PDF)。原著 (PDF)喺2011年11月1號歸檔。喺2011年7月9號搵到。
7. 〈香港電視廣播網絡〉 (PDF)。原著 (PDF)喺2007年9月27號歸檔。喺2011年7月9號搵到。