From Wikipedia, the free encyclopedia
五代十國(907年-979年,若果定義為唐亡至宋興之間嘅時期即係907年-960年),簡稱五代,係唐末至宋初嘅一段分裂割據時期。喺呢73年裏面,總共出現過後梁、後唐、後晉、後漢、後周呢五個自命繼承大統,但係控制唔到全局嘅朝代。喺依次出現嘅五個中原王朝力所不及嘅地方,就有十幾個地方勢力先後據地為王,所以叫做「五代十國」。五代十國年間,北方黃河流域一帶經歷連年戰亂,經濟大受破壞,大量地域淪為荒地,北方人民流離失所,促成大量有識之士帶住北方先進嘅科技湧入南方長江流域,令中國經濟重心進一步南移,奠定將來南宋偏安江左嘅基礎,而五代十國亦係中國繼三國同魏晉南北朝時期之後,罕有噉出現南方人口多過北方嘅時期[1]。
關於五代十國嘅由來,要由黃巢之亂講起。大唐末年,山東人黃巢發動民變,史稱黃巢之亂。民變期間,黃巢部將朱溫降唐,獲唐政府賜名朱全忠,之後更升為宣武軍節度使。民變平息後,朱溫平步青雲,最後篡唐自立,國號梁,史稱後梁,定都開封,但係冇任何藩鎮順服,反而掀起五代爭霸,直至宋太祖趙匡胤篡後周建北宋,先終止五代。與此同時,以吳越為首嘅十國亦割據江南各地自立,直到宋太宗趙匡義消滅呢十個政權,中國先大致上歸於統一。
朱溫係唐末宋州碭山人朱誠個仔。[2]唐僖宗乾符年間,關東地區饑荒,盜賊橫行,黃巢因而號召天下民眾起義反唐,朱溫亦都響應,加入黃巢軍,做咗個將軍,但係後來朱溫領兵打敗仗,佢擔心要揹鑊,於是向唐河中節度使王重榮投降,掉轉槍頭幫朝廷打叛軍,獲逃亡至四川嘅僖宗賜名「朱全忠」,任命為左金吾衛大將軍,充河中行營副招討使。[3][4]響朱溫同埋其他將軍嘅努力之下,唐政府響中和四年大破黃巢軍,黃巢兵敗身亡。朱溫同沙陀人李克用因平亂有功而分別獲封為宣武同河東節度使,而佢哋兩個亦響呢段時間留低牙齒印,促成後來梁晉相爭。
黃巢死後,餘黨秦宗權自立為帝,繼續動亂,更派部將秦賢、盧瑭同張晊攻擊朱溫嘅根據地汴州[5],但最後都係俾朱溫殺死,朱溫因為噉而獲封為東平王,唐昭宗亦都賜朱溫鐵券同德政碑[6],朱溫喺朝廷嘅勢力越嚟越強。
天復元年正月,昭宗升朱溫做梁王。[7]當時大唐出現咗三大藩鎮:梁(朱溫)、晉(李克用)、岐(李茂貞)。朱溫利用佢喺朝廷嘅兵力同勢力,一面積極打壓李克用同李茂貞,一面四圍打江山,搶地盤,消滅河北各藩鎮,控制朝廷。[8]同年,太監韓全誨幽禁昭宗,宰相崔胤召朱溫領兵入京誅殺佢,佢挾持住昭宗著草去老友李茂貞控制嘅鳳翔[9],朱溫率兵打鳳翔,最終響第二年逼到李茂貞殺韓全誨求和[10]。朱溫打蛇隨棍上,乘機殺嗮啲太監,完全掌控朝廷,最後殺埋崔胤同昭宗,另立唐昭宣帝李柷,三年後更廢李柷自立,國號梁,史稱後梁。朱溫篡唐標誌住中國正式進入五代十國時期。[11]
朱溫建梁後改名朱晃,是為後梁太祖,年號開平。朱溫執政年間,各地藩鎮大致上臣服於後梁,而契丹王耶律阿保機同埋渤海國亦派使者去後梁見朱溫[12][13],但係,李克用、李存勗兩仔爺同李茂貞呢啲兵強馬壯嘅大藩鎮當然唔會服朱溫,而朱溫亦都想剷除佢哋,所以後梁由建立到亡國都同李存勗嘅晉軍不停打仗,而後尾後梁都係俾李存勗滅國。
朱溫初初做皇帝嗰陣,都進行過一啲改革,實施過一啲明政,但係佢越老越昏庸殘暴,死老婆之後重強姦啲新抱,又成日亂殺人,實行恐怖統治,最後俾個仔朱友珪殺死,自立為帝,但做得一年就又俾均王朱友貞同部將袁象先等人發動政變殺死。朱友貞登基,成為梁末帝,但係到到嗰陣時,後梁經歷咁多政變篡弒,已經搖搖欲墜,同晉王李存勗打仗又成日戰敗,
五代年間,由於唐代大封節度使嘅關係,令武將變得位高權重,又手握重兵,割據一方,所以成日唔聽中央政府支笛,甚至每隔幾年就發動兵變篡位,無論係後梁、後唐、後晉、後漢、後周定北宋,都係以武將身份,靠兵權篡位自立開國。北宋立國後,趙匡胤為咗應對呢種情況,就「杯酒釋兵權」,借啲咦剝奪武將嘅兵權,又採用「強榦弱枝」嘅政策,重文輕武。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.