陳皓桓(英文:Figo Chan Ho-wun,1996年4月3號—),香港政治人,前民間人權陣線召集人,2020年10月上任至到第二年5月28號。
2020年12月8號,陳皓桓晨早俾警方拘捕,除咗佢之外,仲有其他民主派人士被拉,包括胡志偉、東區區議員徐子見、陳榮泰、曾健成「阿牛」同埋社民連成員「四哥」鄧世禮[1]。
陳皓桓自細就關心時事,會自行錄影行政長官答問大會,希望終有一日能夠為市民發聲。有一次,佢所讀嘅中學響6月5號搞考試,佢話要為咗紀念六四事件,建議學校放假一日;而當時仲係社民連成員黃毓民嚟到佢所在嘅中學演講,佢深受影響[2]。
之後響同學嘅介紹下,佢加入組織「中學生聯盟」。響 2009年六四當日,佢接受媒體訪問,老豆睇到後覺得佢唔應該搞呢啲野,嬲到拎住把菜刀,叫佢以後都唔好參加;陳皓桓就離家出走咗幾日。老豆一直反對佢參加社運,去到五年後陳皓桓參加雨傘運動,終於明白到阿仔唔係玩嘅,就轉為支持佢[3]。
原本響香港專業教育學院讀旅遊系嘅佢,響雨傘運動期間決定退學。2015年,時任社會民主連線內務副主席黃浩銘睇到陳嘅拍片講話,就睇起佢,決定邀請佢加入社民連。陳最後接受邀請[4][5]。
初期
響加入社民連最初,佢分別擔任黃浩銘響區議會選舉同立法會選舉嘅選舉助理。後嚟黃畀人拉咗[5]。雖然黨內有唔少聲音覺得佢太後生,但有啲都睇起佢。佢做過梁國雄嘅議員助理[6]。
2016年爆發反對起高鐵,陳皓桓聯同黃浩銘、朱凱廸就曾經走去前立法會大樓同高鐵站抗議;2017年中共總書記習近平訪問香港,佢同社民連成員去抗議,因而同愛國人士起爭執,而陳皓桓同時任主席吳文遠畀差人拉咗[7]。
另外佢亦係「社民連行委會」常務委員、「社會行動」幹事,同埋「警權組」召集人[8]。
副召集人時期
去到2018年,佢出任民陣副召集人。響無耐,亦即係2019年,爆發反修例運動。初時,佢聯同其他民主派人士要求香港行政長官林鄭月娥撤回逃犯條例修訂。佢話如果林鄭最後唔收返,佢就會公佈包圍立法會總部嘅計劃,又要求林鄭同李家超落台[9]。後嚟林鄭話條例已經「壽終正寢」[10]。
但係好多人都覺得林鄭冇誠意[10],所以民陣就多次向差人申請不反對通知書,不過成日畀警方拒絕[8]。陳皓桓覺得要持績發聲,就曾經以個人嘅名義發起游行示威去抗議,包括十月二十號嘅遊行[11]。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.