福隆港
From Wikipedia, the free encyclopedia
福隆港（粵拼：fuk1 lung4 gong2；馬來話：Bukit Fraser；英文：Fraser's Hill）喺馬來西亞彭亨州同雪蘭莪州交界附近，屬於彭亨州界入面中央山脈範圍，海拔1,260米高。呢度環境風涼氣爽，全年溫度維持喺17°C〜28°C /63°F〜85°F；被譽為馬來西亞最靚同最自然嘅山區度假地，亦係馬來西亞三大出名避暑高原之一。喺中心嘅環島鐘樓，係一個仿造英國倫敦大笨鐘嘅鐘樓，同背後嘅福隆港郵政局相映成趣，係福隆港嘅標誌。呢度高原上面設有一個19洞嘅哥爾夫球場、射擊訓練場同埋馬場。每年5月，福隆港仲會舉行觀鳥大會，旅遊者對所觀察嘅雀鳥進行記錄同攝影。
福隆港嘅馬來文名係「Bukit Fraser」，嚟自開闢福隆港嘅先驅、蘇格蘭裔商人劉易斯·詹姆斯·花沙（Louis James Fraser）。Bukit Fraser早期嘅中文名係「白鬚港」[1][2]，根據1905年華民護衛司署官員H.W. Firmstone所講，因礦地原業主花沙留有長白鬍鬚而得名，而「港」字解釋為「mining land」（礦地）[3]。1930年代當地華文報章依然叫「白鬚港」[4][5]，大約喺同一時期亦開始使用現今通行嘅名「福隆港」[6]。另外，亦有音譯「花沙山」[7]、「佛拉沙士山」[7]、「佛蘭昔士山」[8]等名。「福隆港」嘅中文名由來衆說紛紜，主要有人名說同商號說，其中呢啲傳說又有差異。
人名說
其一係1955年《星洲日報》黃枝運嘅講法：據講從前有一個對當地幾有貢獻嘅大包工頭，名叫「福隆」。佢死後，啲人將呢度改叫「福隆」嚟記念佢[9]。
其二係1956年《南洋商報》何榮華嘅講法：據說1914年以前，有一位德國礦家喺呢座冷山開採錫米，請咗好多華人勞工，採錫機械猶存喺牛棚坑下。至第一次世界大戰爆發，嗰個德國礦主應召回國，將礦務咐托畀工頭「福隆」氏（姓同籍貫不詳）去經營。當時華人都爲福隆氏感到光榮，而且礦湖若港，所以改冷山做「福隆港」[10]。新馬潮人歷史學者潘醒農採納呢一個講法，喺佢1961年編著嘅《星馬名勝》中講到：據說1914年前，德國人嘗試喺嗰座山開礦，第一次世界大戰發生，礦主返德國，將礦務託付工頭「福隆」氏，挖錫後嘅坑溝積水，礦潭成個港噉，所以華人叫做「福隆港」[7]。
商號說
其一係1949年《南洋商報》符豹嘅講法：探尋當地老先輩得知，據說喺卅幾年前，當地係華僑同德僑挖錫嘅地方，後者因英德戰爭而撤退，佢嘅錫產就歸併華僑經營，嗰間公司叫做「福隆」，挖錫地點就係兩峯對立嘅峽底，之後因兩峯山水瀉下其間，流成淵泓嘅溝渠，泛如港灣，所以華僑就改名做「福隆港」[11]。
其二係南洋史地學家許雲樵嘅講法，佢喺1975年答覆華人穆斯林領袖伊布拉欣馬天英嘅英文信函中話：19世紀有一位住喺山腳下嘅華裔商人，佢喺小溪邊開咗一間雜貨店，嗰啲要通過峽谷前往彭亨嘅人，經常喺店入面買嘢同休息，因為店入面嘅招牌上寫有「福隆」兩個字，所以啲人就將呢笪地方叫做「福隆港」。之後嗰個峽谷同山都統稱呢個中文名，因為嗰時呢座山仲未改名，實際上「港」字唔係用嚟稱呼呢座山[12]。但係許雲樵曾經喺1972年喺《南洋商報》專欄中肯定咗「福隆港」嘅「港」係「崗」嘅訛講法，佢亦解釋原來嘅港喺山下面，喺19世紀由一個華人所開辟，由嗰度登山通過峽谷可以去到彭亨，所以行人就將山亦叫做港[13]。
早期歷史
一般認爲福隆港嘅開闢係以劉易斯·詹姆斯·花沙喺1890年代爲開始。花沙係喺新加坡出世嘅蘇格蘭裔商人。佢曾經喺1882年宣佈破產，之後因為商業罪案而被判監兩年。出獄之後，花沙離開新加坡前往彭亨，1890年代開始喺都賴經營錫礦運輸業務，之後就將業務轉移去福隆港。花沙喺20世紀退休，1901年7月到英國結婚，1906年8月喺奧地利度假期間逝世。但係多年以嚟，大多數宣傳福隆港嘅旅遊網站同手冊都寫有關花沙嘅錯誤信息，其中以花沙晚年「神祕失蹤」講法最為流行。
隨住殖民地歐洲人口增長，對高原勝地嘅需求亦日益增加。1917年，新加坡主教弗格森-大衛同雪蘭莪牧師錢皮恩（A. B. Champion）前去岬（The Gap）嘅別墅短期度假。有一日清晨，佢哋帶住午餐行上福隆港。道路好崎嶇，佢哋花咗成日時間，沿住山脊同依家哥爾夫球場所在嘅山谷，揾洋房可能所在嘅地方。佢哋發現經理嘅洋房已被廢棄，破舊不堪，唔適合居住。之後，佢哋唔知咩原因蕩失路，好彩畀兩位錫克籍警員救咗出嚟。返到新加坡後，主教畀高級專員亞瑟·楊寫咗一份報告，表明喺嗰度能夠較易開發避暑山站（Hill station）。1919年8月嘅初步地形測量進一步認可咗呢份建議。同月，聯邦委員會嘅非官方成員金德斯（R. C. M. Kindersley）被告知將撥款將福隆港開發成為避暑勝地，工程喺同年10月開始。彭亨工程師馬格（F. W. Mager）開始喺花沙洋房周圍清理土地，勾勒出一條由岬上山嘅道路，又勘測建築物嘅選址。1920年，福隆港歸屬聯邦政府轄下嘅發展委員會負責，正式改名做Fraser's Hill[14]。
欽差大臣葛尼遇刺
1951年10月6號下晝1點左右，英殖民政府最高專員（British High Commissioner，華人叫做欽差大臣）亨利葛尼，喺前往福隆港途中畀馬來亞共產黨員殺害[15]。當時車隊包括，一架路華越野車喺前開導，入面坐住5位馬來警察同1位司機，葛尼同佢夫人同私人祕書所乘坐嘅勞斯萊斯轎車隨後，再後係一架無線電巡邏車，入面坐住1位護送隊指揮官（副警監）同6位馬來武裝警員、同埋一架裝甲偵察車殿後，入面坐住一位槍手同一位司機[16]。
行至新古毛－福隆港路56英里又四分之三處時，車隊畀馬來亞共產黨游擊隊伏擊。路華車入面除咗一位警員之外，其餘都受傷而跳落車，採取掩護而開槍還擊。欽差大臣架車繼而遭到密集槍火射擊，而停喺路邊，距離路華車大約40碼。葛尼喺右旁行出汽車，向路邊嘅高岸而行，仲未抵達就被擊斃。冇耐偵察車準備轉過欽差大臣架車同路華車遇襲嘅轉角時，遭受射擊，偵察車繼續前行，停喺欽差大臣架車之後，車上人員隨即開槍還擊。經過短時間駁戰之後就停火，當護送隊指揮官落車時又遭到射擊，隨即再次交火，等馬共成員停火撤離後就電告新古毛警長求援[17][18][19]。
行兇者係綽號「小馬」嘅馬共黨員同佢獨立小分隊嘅36名游擊隊員。根據馬共前總書記陳平所講，佢哋當時希望攻擊大型武裝車隊以奪取武器同彈藥，但係事後收聽新聞報導時先知佢哋殺咗欽差大臣[20]。4個月後，英國陸軍副參謀鄧普勒接替葛尼出任欽差大臣。
福隆港嘅建築好大程度上採用仿都鐸設計，反映住殖民時代使用嘅殖民地設計同建築風格。呢個設計用喺福隆港鐘樓作為娛樂設施同埋平房 [21]。截至2019年，福隆港79座建築入面，只有46座被列為1919年至1957年起嘅歷史建築。每座歷史建築都分為以下五種類型之一[22]:
福隆港係一個山區，海拔喺320米（1,050英尺） 同 1,460米（4,790英尺） 之間。大約44%地區係被認定為陡峭，而平坦區域只佔成個土地面積嘅8％。福隆港嘅原始森林覆蓋率大約係總土地面積嘅92%，只有1.5%土地面積用喺城鎮。大約6.5%森林面積已被清除用作二次生植。馬來西亞10條河流系統發源頭都喺呢度，其中包括雪蘭莪主要水源Sungai Selangor同埋彭亨州東部主要河流系統Sungai Teranum。呢個地區地質主要係花崗岩，形成沙質、可滲透土壤同埋好容易導致水土流失[23]。
氣候
福隆港氣候屬熱帶性氣候。呢一區全年降雨量都好充足。平均氣温係20 °C（68 °F）；全年平均雨量係2,665毫米（104.9英寸）。當中7月降雨量最低，平均雨量只有 118毫米（4.6英寸），而11月雨量最多，有341毫米（13.4英寸）。5月係全年平均最熱嘅月份，有20.8 °C（69.4 °F），1月係全年平均最凍嘅月份，有18.9 °C（66.0 °F）。喺最乾同最濕嘅月份之間嘅降雨量差別係223毫米（8.8英寸）[24]。
| 福隆港氣候平均數據 | |||||||||||||
|---|---|---|---|---|---|---|---|---|---|---|---|---|---|
| 月份 | 1月 | 2月 | 3月 | 4月 | 5月 | 6月 | 7月 | 8月 | 9月 | 10月 | 11月 | 12月 | 全年 |
| 平均高温 °C（°F） | 23.3 (73.9) |
24.1 (75.4) |
25.1 (77.2) |
25.4 (77.7) |
25.5 (77.9) |
25.3 (77.5) |
25.1 (77.2) |
24.9 (76.8) |
24.6 (76.3) |
24.4 (75.9) |
24.1 (75.4) |
23.4 (74.1) |
24.6 (76.27) |
| 每日平均氣温 °C（°F） | 18.9 (66) |
19.5 (67.1) |
20.1 (68.2) |
20.7 (69.3) |
20.8 (69.4) |
20.6 (69.1) |
20.3 (68.5) |
20.2 (68.4) |
20 (68) |
20 (68) |
19.8 (67.6) |
19.1 (66.4) |
20 (68) |
| 平均低温 °C（°F） | 14.5 (58.1) |
14.9 (58.8) |
15.2 (59.4) |
16 (61) |
16.2 (61.2) |
15.9 (60.6) |
15.5 (59.9) |
15.5 (59.9) |
15.5 (59.9) |
15.6 (60.1) |
15.6 (60.1) |
14.9 (58.8) |
15.44 (59.82) |
| 平均降水量 mm（英寸） | 261 (10.28) |
172 (6.77) |
237 (9.33) |
270 (10.63) |
226 (8.9) |
128 (5.04) |
118 (4.65) |
137 (5.39) |
195 (7.68) |
287 (11.3) |
341 (13.43) |
293 (11.54) |
2,665 (104.94) |
| 平均降雨日數 | 29 | 23 | 29 | 30 | 31 | 30 | 31 | 30 | 29 | 31 | 30 | 31 | 354 |
| 平均相對濕度（%） | 83 | 80 | 80 | 85 | 83 | 85 | 85 | 81 | 83 | 88 | 88 | 88 | 84.1 |
| 每月平均日照時數 | 202 | 184.5 | 189.5 | 137.5 | 184 | 158 | 177.5 | 173.5 | 191 | 146 | 166 | 157.5 | 2,067 |
| 出處 #1：Climate-Data.org[24] | |||||||||||||
| 出處 #2：World Weather Online[25] | |||||||||||||
生物多樣性
福隆港位處係馬來西亞少數嘅原始森林之一，1897年植物學家H. N. Ridley發現呢度擁有好高嘅生物多樣性，令科學家同研究人員對呢頭好感興趣。超過一成喺馬來西亞半島發現嘅植物品種都喺福隆港，嗰度有952種土生品種同36種特有種。其中13個已經超過60年冇再被觀察到，被認定係滅絕咗。呢度亦係世界上三個已知有罕見嘅Trig Oak（「Trigonobalanops verticillata」）地方嘅其中之一[26]。
喺福隆港可以揾到嘅動物主要係無脊椎動物，當中包括螞蟻、蜜蜂、甲蟲、蟬、草蜢、飛蛾、蜘蛛同白蟻。佢哋對維持呢區健康生態系統發揮重要嘅作用。根據IUCN Red List，截至2013年，三種哺乳類動物被列為瀕臨滅絕，包括馬來貘、合趾猿同馬來亞虎，另有兩種哺乳類動物鬣羚同馬來熊被列為易危[26]。福隆港擁有250種候鳥同留鳥品種。部分由俄羅斯、中國同日本飛嚟福隆港避寒。其他會喺福隆港休息幾個月，之後向南飛去有更溫暖氣候嘅澳洲同新西蘭。因為呢度有好多雀仔品種，國際鳥盟將呢度訂為重要鳥類保護區[27]。
野竹蘭花 (竹葉蘭)
Dusky Langur (鬱烏葉猴)
Carpenter bee (Xylocopa caerulea)
Bracca maculosa
Silver-eared Mesia (銀耳相思雀)
_(4139447130).jpg)
_-_Flickr_-_Lip_Kee.jpg)
環境問題
喺Jeriau瀑布附近嘅第二座哥爾夫球場建設涉及森林砍伐，嗰度嘅陡峭山坡可以揾到一啲稀有物種。呢個問題引起咗植物學家嘅關注，因為呢個地區進一步發展將會帶嚟極大嘅環境影響，包括導致稀有同瀕危植物物種消失。第二座哥爾夫球場嘅建設亦令到Jeriau瀑布同Sungai Hijau河堆積淤泥。Jeriau瀑布係福隆港受歡迎嘅娛樂區[28]。
新路馬來西亞聯邦第148號聯邦公路嘅修建亦對福隆港環境構成威脅。呢個建設涉及砍伐森林，造成棲息地破碎化，過程中亦會清除一部分原始森林。條路出現裂縫、道路倒塌同埋冧山泥情況。巨石暴露喺坍塌嘅斜坡度，當中有啲搖搖欲墜咁懸喺山上面，有啲已經跌埋落條路上面。呢啲問題令新路啟用日子由1996年6月推遲去1997年下半年，最終喺2001年8月正式向公眾開放[29]。
有居民同遊客報告福隆港有非法收集同偷獵野生物種嘅情況。有藥用價值植物例如豬籠草、蘭花同香草等以及動物包括蝴蝶至昆蟲同鳥類都被定為收集對象。現有嘅小徑令啲人好容易入到去森林，增加呢啲非法活動嘅可行性。缺乏對呢種非法活動嘅實時監察，有可能導致野生物種過度捕撈，導致佢哋喺福隆港嘅數目減少[30]。
福隆港嘅經濟好依賴旅遊業。呢度大約有一半嘅受僱人士從事酒店業，包括經營自己企業人士，其餘就喺公共部門做嘢[31]。福隆港嘅商業活動主要係酒店、餐廳同埋紀念品同零售商店組成，係呢度旅遊業嘅重要補充行業[32]。
福隆港嘅農業活動喺1976年開始，當時福隆港發展公司（Fraser's Hill Development Corporation）同FIMA公司合伙建立咗面積有180英畝（73公頃）嘅種菜同家禽農業活動範圍，生產雞蛋、雞同埋菜。蔬菜農場種植嘅農作物包括：白菜、辣椒、蘿蔔、法國豆、青豆、生菜、蜜柑、洋蔥、士多啤梨同番茄[33]。一個士多啤梨農場喺2018年成立，擁有4,800士多啤梨植物，如果遊客反應積極，會計劃再種植30,000士多啤梨植物。士多啤梨嘅種植令到福隆港成為金馬侖高原之後馬來西亞第二個士多啤梨種植區[34]。一個花卉苗圃亦喺福隆港營運，向居民同遊客甚至大型顧客，包括莎阿南國家植物園（National Botanic Gardens Shah Alam）、吉隆坡市政局同埋馬來西亞其他市政委員會賣鮮花[32]。一個叫「the Glasshouse」嘅細溫室喺2018年7月開張[35]，嗰度展示住唔同品種仙人掌同有間café[36]。
截至2013年，福隆港人口只有1000居民。福隆港嘅人口增長自2000年開始滯後，原因係呢個地區無乜就業機會，主要原因係對任何形式嘅發展需求都好低，當中由2000年開始無任何住宅發展。另外，呢個地區無高中亦導致人口減少，迫使學生搬到有高中嘅大城市，例如劳勿、新古毛同吉隆坡 [31]。老人家退休或者家人去世後[37]，或者佢哋嘅仔女喺其他地方揾到工做時，佢哋亦會搬走[38]。截至2018年，呢個鎮只剩返40名華人，當中大多數都係50歲以上，呢個數字估計已經由2015嘅人數減少咗100人[39]。福隆港亦因為缺乏資訊科技而受到數字落差所困擾[40]。就算有以上呢啲原因，有啲人仲會由市區，主要係吉隆坡搬去福隆港，主要想享受當地綠色大自然環境或者希望改善當地旅遊業[41][35]。
隨住人口減少，報紙嘅銷售亦下降，導致鎮入面無報紙賣。居民需要依賴電視、互聯網或者睇網上新聞先可以得知世界各地最新消息[42]。
1971年1月，起咗一個特高頻電磁波基地，叫做「吉隆坡–福隆港」（Kuala Lumpur–Fraser’s Hill），呢個基地允許福隆港、吉隆坡同全國其他地區之間嘅無線通訊[43]。2017年喺福隆港起咗一個數碼電視無線電塔，令到住喺彭亨州近福隆港居民能夠接收由MYTV Broadcasting提供嘅地面數碼電視服務[44]。另外，由馬來西亞電訊公司、明訊同Celcom管理嘅幾座無線電塔亦安裝喺福隆港，為居民同遊客提供流動網絡[45]。
觀鳥
由於福隆港擁有豐富各種各樣鳥類品種，所以呢度成為一個出名觀鳥愛好者嘅聚集地。嚟自亞洲同歐洲嘅觀鳥者成日去福隆港影相同研究呢區嘅雀仔[38]。觀鳥嘅熱門程度導促使一年一度嘅活動Fraser's Hill Bird Race嘅舉行辦，佢喺1988年由福隆港發展公司（Fraser's Hill Development Corporation）同馬來西亞自然協會（Malaysian Nature Society）首次舉行[46]。活動通常喺6月舉行[47]。目的係喺限時內揾、識別同記錄喺官方清單入面嘅物種。呢個活動鼓勵保護自然同推廣福隆港作為鳥類保護區。呢個活動吸引咗唔同國家嘅參與者，同時亦為福隆港嘅旅遊業帶嚟幫助[27]。
另外，2010年6月一個有關鳥類嘅博物館叫做Bird Interpretive Centre向外開放[48]。呢個博物館提供福隆港上嘅7條山徑嘅資訊同導賞團遊覽，以及一個互動式設施畀遊客了解有關呢個地區動植物更多信息，同埋了解森林保護嘅重要性同欣賞大自然嘅美貌[49]。
運動
福隆港變咗登山者熱門嘅路線，因為嗰度有完善嘅行山徑。由於小徑唔干擾大自然，行山人士會接觸到各種動植物。參加福隆港centenary celebrations嘅登山者可以表示對保護大自然嘅支持[47]。呢啲行山徑無咩點積極由福隆港旅遊計劃推廣[50]。最熱門嘅行山徑係Bishop Trail、Rompin Trail、Maxwell Trail同埋Kindersely Trail[51]。
- Mager Trail-350m
- Abu Suradi Trail-500m
- Hemmant Trail-1,000m
- Bishop Trail ―― 1,500m
- Maxwell Trail ―― 1,800m
- Kindersley Trail-750m
- Rompin Trail-500m
- Pine Tree Trail-5,100m
同時，福隆港亦成為一個踩公路單車同爬山單車熱門地方[38]。每年舉辦嘅「山中之王」（King of the Mountains）挑戰賽都有過千人參加中反映喺呢區踩單車受歡迎程度[52]。福隆港亦係幾個專業公路單車賽同世界單車總會（UCI）批准嘅單車賽，例如Tour de Langkawi[53]、 Le Tour de Femina[54]同Malaysian National Road Championships[55]嘅舉辦地點。
福隆港亦擁有馬來西亞其中一個最古老嘅哥爾夫球場。嗰座9個洞嘅哥爾夫球場喺1925年起，前身係一個錫礦，喺錫耗盡之後封咗。一個新嘅18洞哥爾夫球場喺1970年代喺Jeriau起[56]。幾位備受矚目嘅單人同職業哥爾夫球手，包括阿都拉薩（Tun Abdul Razak）[57] Rodger Davis[58]，同埋彭亨蘇丹阿末沙（Ahmad Shah of Pahang）曾經喺哥爾夫球場玩過[59]。其他福隆港運動包括射箭、腳踏船、騎馬、[60]網球、游水同埋壁球[61]。
電影
Kolej 56，一套馬來西亞時代劇青春片，1988年喺福隆港同金馬侖高原拍攝。揀喺呢頭拍係為咗確保電影有1950年代嘅真實元素[62]。
Misteri Dilaila，一套馬來西亞恐怖片，喺福隆港拍攝，之後喺2019年上映[63]。呢部電影故事情節涉及喺福隆港度假時某啲人物失咗踪，據說係受1910年Louis James Fraser失踪嘅啟發[64]。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
