神戶
日本兵庫縣嘅首府 From Wikipedia, the free encyclopedia
神戶（粵拼：san4 wu6；日文：神戸市／こうべし Kōbe-shi）係日本近畿兵庫縣嘅縣廳，亦都係政令指定都市之一[1]，管轄9個區。神戶市嘅面積係552.83平方公里。2014年1月，神戶市有154萬242人[2]，係日本人口第六多嘅都市。神戶同大阪、京都一齊都係京阪神都會區嘅核心都市[3]，同時神戶市亦都同佢附近嘅衛星都市組成咗神戶都市圈[4]。
「神戶」呢個地名係起源喺而家神戶市中心嘅三宮、元町地區，喺古代曾經係生田神社嘅領地，並且住咗生田神社嘅神封戶[5]。神戶喺大阪灣沿岸，風浪平緩並且沿岸水深較深，地形好適宜起港口[6]。喺古代，神戶就係京都同大阪嘅外港之一[7]。1868年，神戶做咗日本最早開放對外國通商嘅五個港口之一，之後神戶好快咁發展做日本最重要嘅港灣都市之一[8]。亦正因為噉，佢係日本最早嘅通商港口，神戶以開放同國際化嘅氣氛而聞名。1995年嘅阪神淡路大地震雖然畀神戶帶嚟巨大嘅打擊，但係經過好多年嘅重建，神戶嘅都市建設同人口都已經超過地震之前嘅水準[9]。神戶係座宜居都市。2007年，神戶市入選福布斯雜誌評出嚟嘅「世界最清潔嘅廿五座城市」[10]。2012年，喺瑞士嘅諮詢公司ECA國際評選出嘅世界宜居都市排名入面，神戶市排名第五位，係唯一入選前10位嘅日本都市[11]。
地形同地質
神戶市喺兵庫縣東南部，六甲山系同瀨戶內海構成咗神戶依山傍海嘅都市景觀。六甲山東西川過神戶市域北部，構成神戶市中心街區同郊區嘅天然分界線。六甲山最高峰嘅海拔高度係931.25米，都係神戶市內嘅最高點[12]。山地北面係神戶市內保存多啲自然嘅地區，關西著名嘅溫泉旅遊地有馬溫泉就喺呢度[13]。喺六甲山地北麓同佢附近嘅丘陵地帶都有一啲新市鎮[14]，有好多條鐵路同公路穿過六甲山連接呢啲新市鎮同神戶市中心市區。喺六甲山麓嘅南便，喺好多神戶開港早期嗰陣起嘅外國人住宅[15]，呢個區域亦都係日本最早嘅近代高檔住宅區。神戶市嘅大部分中心市區就喺六甲山系同瀨戶內海之間嘅沿海平地。呢個地區嘅南北長度淨係有約三公里，搞到神戶嘅中心街區呈現沿海岸嘅東西細長嘅形狀。為咗擴充市區同港口用地，神戶曾經實施好多次填海造地[16]。神戶市沿海嘅兩大人工島—港灣人工島同六甲人工島都係利用六甲山嘅土石填海造成嘅人工島[17]。神戶市入面嘅主要河流有住吉川 (兵庫縣)、生田川、新湊川等等[18]，呢啲河流大多發源喺六甲山並且喺流經神戶市區之後就直接入海，因為咁，佢哋嘅長度好短。
神戶市嘅地質可大概分做兩個區域。六甲山地主要由花崗岩構成，佢個地質構造形成喺約7000萬年之前[6]。因為花崗岩有天然嘅過濾作用，累積嘅降雨喺經過花崗岩嘅過濾之後滲入地底，搞到六甲山做咗神戶重要嘅天然水脈。而六甲山湧出嚟嘅優質水源亦都令到神戶生產嘅礦泉水同日本酒享有盛譽[19]。而市區嘅平地部分就形成喺約3000萬年之前，喺基盤岩類嘅上面覆蓋有好厚嘅沖積層[20]。神戶市入面有好多條活斷層，呢啲斷層大致可以分做須磨斷層・諏訪山斷層、淡路－六甲活斷層系同大阪灣斷層系三個系統[6]。
氣候
神戶市係一個瀨戶內海式氣候區域，全年氣候比其他城市溫和啲[21]。六甲山地北面嘅地區就具有內陸型氣候嘅特徵，同市區相比有好大嘅溫差。同日本其他地區相比，神戶嘅降雨相對少啲，全年平均嘅降水量大約1,200毫米。櫻花盛開的嘅春季係神戶最令人開心嘅季節。喺經過潮濕嘅梅雨季節之後，神戶入去熱辣辣嘅夏季。因為神戶空氣乾燥並且有海風吹住，所以神戶嘅夏天雖然炎熱，但相對近畿地方其他大都市嚟講，夏天仲係咁舒適[22]。喺夏秋交接嗰陣，神戶有時會受到颱風嘅影響。神戶嘅秋天好短。而冬天嘅神戶就因為山地地形嘅影響，成日被人叫做六甲颪嘅季候風吹襲[23]。雖然六甲颪嘅影響令到神戶冬天氣好凍，但係因為冬天空氣乾燥搞到神戶市區好少落雪。
古代
神戶嘅歷史喺舊石器時代開始，喺神戶市入面多地都發現舊石器時代同繩文時代嘅文物[24]。神戶喺彌生時代之後，因為稻作技術同金屬器嘅傳入，神戶嘅人口急劇增加。據日本書紀寫話，神戶三大神社入面嘅生田神社[25]和長田神社[26]:65都係喺彌生時代嘅後期起嘅。而喺古墳時代之後，因為豪族嘅興起，喺日本各地開始出現巨大嘅前方後圓墳。神戶市入面最出名嘅古墳係五色塚古墳，呢座古墳亦都係兵庫縣入面最大嘅古墳[27]，呢樣嘢顯示喺呢個時期神戶已經有一定程度嘅文明發展。喺奈良時代，當時嘅朝廷喺兵庫區起大輪田泊，開始咗神戶作為港口嘅歷史[26]:10。大輪田泊係攝播五泊之一，係當時日本重要嘅貿易據點[28]。喺平安時代後期，日本因為財政問題而冇維修大輪田泊，大輪田泊被荒廢。
大輪田泊嘅蕭條狀況喺平氏政權興起之後發生巨大嘅變化。平清盛喺大輪田泊起人工島經島，試圖將大輪田泊發展做日宋貿易嘅據點[29]。1180年，平清盛仲強行宣布遷都福原京，佢個位置位於而家神戶市嘅中央區同兵庫區北部[30]。由於反對勢力太強大，福原遷都淨係實施咗半年之後日本嘅首都就遷返去平安京。平氏政權亦都喺平清盛瓜柴之後好快咁崩潰，而神戶仲係平氏政權瓦解過程入面重要戰役一之谷之戰嘅戰場。福原京嘅修築雖仲可以話淨係停留喺計劃層面[31]，而喺鎌倉時代初期，高僧重源又重振咗大輪田泊嘅港口[32]。喺鎌倉幕府時代，神戶嘅人口大多數住喺而家嘅兵庫區一帶，呢個地區叫做兵庫津，係嗰陣日本重要嘅港口[33]。喺14世紀前期呢個自建武新政轉換去室町幕府嘅劇變時期，神戶係湊川之戰嘅舞台。呢段時間亦係同一時期開始，除咗嘉吉之亂至應仁之亂之間嘅廿幾年間神戶曾經由山名氏統治之外，神戶開始大約200年嘅赤松氏統治時期[34]。1591年，結束戰國亂世時期而統一日本嘅豐臣秀吉喺神戶山頭嘅有馬溫泉開有馬大茶會[35]。喺江戶時代，神戶嘅主要市區仲係喺兵庫津一帶[36]:65。嗰陣嘅兵庫津係自西日本去北海道嘅北前船的重要據點港口[37]，同時亦都係西國街道重要的宿場町[38]。
開港至二戰期間
喺江戶幕府末期，日本喺歐美嘅壓力之下被迫打開國門。1858年，幕府同美英法俄荷五國簽訂安政五國條約，條約規定開咗五個港口做通商港口。列強雖然原本諗住揀已經有一定規模嘅兵庫津做關西地區嘅開放港口，但因為兵庫津排外風氣好盛加上兵庫津附近嘅神戶村嘅沿岸水深深啲，起港口最啱[39]:227，因此神戶村即做咗五個開放港口嘅其中之一[40]。1868年，神戶正式開港[41]。嗰陣神戶嘅港口以湊川做界線，湊川西便嘅港區主要由日本船用，叫做兵庫港；東面就主要由外國船用，叫做神戶港。兩港喺1892年統合，統稱係神戶港[42]。市區同樣用湊川做界線，湊川西面嘅兵庫係舊市區，而湊川東面嘅神戶就有好多外國人住，搞到嗰陣嘅神戶出現雙子都市嘅格局[43]:58。因為市區範圍嘅擴大，兩大市區合埋一齊，市中心都慢慢咁移向東側邊嘅神戶，而「神戶」亦都做咗包埋兵庫喺入便嘅正式名稱。喺神戶開港嗰陣時，神戶市裡便仲開咗專畀外國人住嘅神戶外國人居留地[41]。神戶居留地喺日本係最早有近代都市計劃嘅其中一個地區，運營都係由國人自己管，佢嘅都市經營方式亦為日本其他都市帶來巨大影響[44]。好多外國教堂、銀行、企業同埋領事館集中喺度，神戶居留地做咗嗰陣日本最國際化嘅地區之一。1899年，日本廢除治外法權，居留地制度都廢咗，神戶外國人居留地畀翻日本管理[45]，而神戶市中心市區嘅地位保持到依家。作為西洋文明喺日本嘅窗口，神戶喺東西文化交流裏面發揮咗重要嘅作用。日本第一個鐵路隧道[46]、第一個咖啡廳[47]、第一樽波子汽水[48]、第一個水族館[49]、第一個高爾夫球場[50] 、第一個日本國內做嘅蒸汽機車[51]、第一個爵士樂隊[52]等咁多新嘅事物都係喺神戶出現。1889年，神戶開始行市制，成為日本最早嘅一批市[53]。
20世紀之後，神戶繼續快速發展。1905年，阪神電氣鐵道開通咗神戶（三宮站）去大阪（出入橋站）嘅鐵路[54]，呢條係日本第一條都市間鐵路。因為鐵路嘅開通，神戶同大阪之間嘅經濟活動變得更加活躍，仲開啟咗阪神間摩登嘅時代[55]。一樣都喺20世紀前期，隨著築港事業嘅進展[56]，神戶做咗遠東最重要嘅港口其中之一個。1920年，神戶港開通咗去美嘅航路[57]。喺大正同昭和初頭，神戶同倫敦、紐約、漢堡一齊被叫做世界四大海運市場[58]。但係喺1930年代之後，跟住日本就開始行入戰爭軌道，神戶嘅發展都受到重大嘅影響。1938年，神戶受到阪神大水害嘅侵襲，市裏面有多過600人喺水害入面死咗[59]。喺二戰末期，神戶成日比美軍嘅空襲，尤其1945年3月17日同埋6月5日嘅空襲最慘烈。神戶市多過20%嘅市區面積喺空襲其間被破壞，同埋最少有8,841個市民喺空襲其間死咗，受傷嘅就超過15萬人。神戶係當時日本大都市裏面比美軍空襲損害得最嚴重嘅都市[60]。
戰後
喺二戰結束之後，神戶好快就復興。造船、鋼鐵等等重工業變咗神戶新嘅主要產業，令到神戶喺戰後發展成為日本重嘅工業都市。1956年，神戶成為咗日本第一批政令指定嘅都市[61]。神戶市仲喺呢一年舉辦咗國民體育大會。喺1960年代，神戶港係佢開港以嚟100年嘅紀念，神戶港個樣都跟住神戶嘅地標建築神戶港塔完工[62]同埋港灣人工島嘅開工[56]發生咗劇變。由於神戶市中心市區面積好細，所以喺1960年代開始，神戶市開始挖掘丘陵用嚟建造新市鎮，仲將挖出嚟嘅泥用嚟填海起海上新都市。1970年代，跟住山陽新幹線的開通、神戶祭嘅舉辦[63]同埋NHK電視劇風見雞嘅播出[64]，神戶嘅旅遊產業有咗好大嘅發展。喺1971年，神戶市電[65]被廢咗，取代佢嘅係喺1979年，神戶嘅第一條地下鐵綫開始行[66]，即係話神戶市內嘅交通發生咗好大嘅變化。1981年，港灣人工島第一期工程搞掂。神戶市喺工程搞掂之後就開咗個港灣人工島博覽會，嚟參觀嘅人多過1,610萬同埋賺咗多過60億日元，攞倒巨大嘅成功[67]。1985年，神戶開咗個世界大學生運動會[68]，搞咗個大型體育賽事更加提高咗神戶喺世界上嘅知名度。
1995年1月17日，喺神戶市近海發生咗阪神淡路大地震。神戶市入面部分地區嘅烈度去到7級，死者人數好多，有4,571人，災情非常嚴重[69]。地震雖然令神戶受到巨大的打擊，但係亦都代表神戶新嘅復興嘅開始。交通網絡嘅齊全係神戶震後復興嘅重要內容。明石海峽大橋嘅通車令到神戶市同淡路島之間嘅交通情況有大幅改進[70]。而神戶機場嘅開張令到神戶做咗一個有海空雙港嘅城市[71]。但係神戶嘅震後復興亦都有好多問題。例如長田等等因為地震嚴重受破壞嘅街區雖然喺震後推行咗都市更新事業，但係因為人口越嚟越少等等問題搞到開發事業企咗喺度。21世紀之後，神戶市喺2008年被聯合國教科文組織選做設計都市，係亞洲第一個攞到呢個殊榮嘅城市[72]。喺最近幾年，醫療產業已經發展做神戶新嘅重要產業[73]。神戶試圖發展除咗傳統嘅港口同工業之外新嘅支柱產業，令到神戶嘅經濟構造好多樣化。
神戶嘅教育水準發達。2012年嗰陣，神戶市入面有150間幼稚園、172間小學、102間初中、56間高中同埋20間大學[74]。
神戶一開始淨係得2.5萬人[75]，之後神戶嘅人口快速增加。1889年嗰陣，神戶已有人口約13萬人[75]。喺1920年日本第一次人口普查嗰陣，神戶嘅人口已經超過60萬，係當時日本人口第三多嘅城市[76]。1939年，神戶市人口超過100萬人[75]。二戰期間，由於美軍多次空襲令大量人口離開城市去農村避難，神戶嘅人口劇減至38萬人[75]。戰後隨住神戶市復興進程嘅進展，暫時走去農村嘅人口亦翻城市。1956年，神戶人口數再次超過100萬人。之後神戶嘅人口持續增加，喺1992年超過咗150萬人[77]。
神戶最受歡迎嘅職業體育運動係棒球同足球。雖然冇職業棒球球隊將佢嘅主場設喺神戶市，關西嘅兩大職業棒球球隊阪神虎同歐力士野牛都同神戶市有密切嘅關係。其中歐力士野牛更喺1991年至2004年期間將主場擺神戶。家下神戶綜合運動公園棒球場仍然係歐力士野牛嘅主場球場之一，每年都有幾場職棒賽事喺嗰度舉行[78]。神戶勝利船係神戶唯一嘅男子職業足球隊，而家重參加J聯賽嘅賽事添[79]。INAC神戶雌獅係日本女子職業足壇嘅豪強，曾多次攞到日本女足聯賽嘅冠軍[80]。
- 京阪神
- 神戶港
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
