潘焯鴻

潘焯鴻（英文：Jason Chuk-Hung Poon，1969年12月7號—），係香港中間派政治人^[1]，「中科監察」主席、「香港方略」首席研究員，建築工程師^[2]。佢喺沙中綫事件入面揭露過唔少內幕，被稱為「沙中綫嘅吹哨人」。

潘焯鴻

學歷

• 香港城市大學法律碩士^[2]
• 倫敦南岸大學工程管理一等榮譽學士^[2]

政治立場

潘焯鴻算係親中派出身嘅政治人物，喺2011年香港區議會選舉後，佢曾經加入自由黨但未有積極参與黨內事務，曾對建制派作出猛烈批評，去到2018年7月因沙中綫事件退黨^[3]。

佢曾經形容自己係「淺黃」甚至係泛民主派，話民主、人權、自由、法治等等普世價值係佢嘅政治信仰，又話自己係「良知派」，因為佢一見到唔公義嘅事或者破壞香港核心價值嘅「契弟」，就會出聲批評。^[4]不過，眾新聞喺2021年香港立法會選舉期間，就平反六四、香港選舉制度夠唔夠民主、重啟政改、基本法23條立法以及支唔支持成立獨立調查委員會，調查2019年香港警察喺反送中運動期間嘅不法濫權行為五個問題，向包括潘焯鴻在內14名非傳統親中派候選人以問卷形式想問立場，但潘焯鴻一律無答^[5][6]。

選舉史

2011年區議會選舉

喺2011年區議會選舉，潘焯鴻喺大角咀北選區出戰，但最終只係攞到485票，不敵民建聯同埋工聯會支持嘅劉柏祺以及公民黨支持嘅王嘉盈^[7]。

2020年香港立法會選舉

2020年，潘焯鴻以獨立身份參選立法會九龍西直選^[8]，其後7月於紅磡站外正式宣布參選，但最終政府因為肺炎疫情而單方面宣佈選舉延期。之後，潘焯鴻繼續發表時事評論監察政府施政，同時設立中科媒體，討論時政。

2021年選舉委員會選舉

2021年8月，潘焯鴻報名參加宗教界中入面嘅「天主教香港教區」代表，但天主教香港教區有多達40人報名，最終潘焯鴻喺抽簽制度下落選。^[9]

2021年香港立法會選舉

喺呢次選舉，由於北京未經諮詢或香港人同意，大幅度削減直選議席，所以好多泛民主派都唔參與。不過，潘焯鴻就以獨立身份參選，最初計劃出選九龍西選區，但之後就改去香港島東選區，並且得到長實執董周偉淦（「喜悅一生」、「瀟灑一生」馬主）、全國政協常委胡定旭（「逍遙駒」馬主團體成員）等親中派人士提名^[10]。選舉期間，佢被形容為「非傳統建制」，得到一啲傳媒嘅關注。

之後喺一啲競選宣傳入面，佢同一啲將自己定位為非建制嘅候選人亦有聯合宣傳嘅安排^[11]，又同時得到一啲具有民主派背景嘅人士，同埋部分親中派支持^[12][1]，但亦引起泛民主派入面一啲爭議。例如，民主黨副主席梁翊婷為佢站台，就被黨主席羅健熙批評，話佢作為黨員違反黨內機制，之前已經喺黨入面討論過話唔支持潘焯鴻，梁翊婷做法令黨友嚴重質疑佢嘅誠信^[13][14]。另外，潘焯鴻亦被連登仔指控，濫用中文維基百科幫自己宣傳，違反中文維基百科關於利益衝突條文，唔符合中文維基百科「維基百科唔係未經篩選嘅資訊收集處」同埋「維基百科唔係宣傳工具」嘅做法^[15]。

喺一個未有披露機構背景嘅民調入面，潘焯鴻被指同吳秋北一同領先對手，二人嘅支持度分別約為一成半^[16]。不過，佢就指自己選情唔樂觀，因為自己資源唔多，選舉氣氛低迷。^[17]

結果，佢以14,435票落選，成為香港島東選區直選入面，得票最低嘅一位，事後話，投票率創新低、香港免費乘車日係佢落選嘅原因。

參考

1. 頭條日報。〈專欄｜周梁劉健儀撐潘焯鴻 自由黨撇清關係〉。《頭條日報 Headline Daily》 (中文)。原先內容歸檔喺2021-12-16。喺2021-12-16搵到。
2. 吳婉英。〈田北俊讚中科潘焯鴻「夠pop過好多黨友」　嘆自由黨難再有直選議員〉。原先內容歸檔喺2021-12-07。喺2020-05-07搵到。
3. 鄭榕笛。〈【專訪】沙中線案成退黨最後稻草　潘焯鴻：政界有人想我收聲〉。原著喺2019-02-03歸檔。喺2020-05-07搵到。
4. 林劍 (2021-11-30)。〈專訪︱沙中線吹哨者潘焯鴻：我是良知派 斥林鄭挑矛盾不配做特首〉。《香港01》 (香港中文)。原先內容歸檔喺2021-12-13。喺2021-12-02搵到。
5. 〈眾新聞 | 【立會選舉】直選14人非傳統建制 僅2人稱目前制度不夠民主 3人承諾提平反六四動議〉。《眾新聞》 (中文)。原先內容歸檔喺2021-12-05。喺2021-12-16搵到。
6. 〈香港立法會選舉：「愛國者治港」下新崛起的政治力量〉。《BBC News 中文》 (繁體中文)。2021-12-02。原先內容歸檔喺2021-12-07。喺2021-12-07搵到。
7. 吳婉英。〈田北俊讚中科潘焯鴻「夠pop過好多黨友」　嘆自由黨難再有直選議員〉。原先內容歸檔喺2021-12-07。喺2020-05-07搵到。
8. 〈【立法會選舉】建制九西現暗湧 傳中科潘焯鴻考慮參選〉。喺2020-05-07搵到。{{cite web}}: CS1 maint: url-status (link)
9. 〈選委會｜天主教40人爭10席　潘焯鴻參戰：拒爭建制票　交天主決定〉。2021-08-11。原先內容歸檔喺2021-12-29。喺2021-11-17搵到。
10. 立場新聞。〈【立法會爭位】獲新相識胡定旭提名　潘焯鴻入到閘：我哋越講越投契〉。《立場新聞》。立場新聞。原先內容歸檔喺2021-11-22。喺2021-11-15搵到。
11. 吳倬安 (2021-12-01)。〈政圈風聲｜非建制研結盟催票 共同綱領爭普選 冀泛民猛人牽頭〉。《香港01》 (香港中文)。原先內容歸檔喺2021-12-02。喺2021-12-02搵到。
12. 〈信報即時新聞 -- 梁翊婷現身潘焯鴻造勢大會〉。《信報即時新聞》。原先內容歸檔喺2021-12-13。喺2021-12-16搵到。
13. 〈【立法會爭位】梁翊婷現身潘焯鴻造勢大會 民主黨連續 2 日有黨員站台 羅健熙批評：令黨友嚴重質疑其誠信 | 立場報道 | 立場新聞〉。《立場新聞 Stand News》。原先內容歸檔喺2021-12-17。喺2021-12-16搵到。
14. 〈2021立法會選舉 - 立會選戰2021〉。hd.stheadline.com。原先內容歸檔喺2021-12-16。喺2021-12-16搵到。
15. "LIHKG". 《LIHKG 討論區》. 原先內容歸檔喺2021-12-16. 喺2021-12-16搵到.
16. 吳倬安 (2021-12-05)。〈政圈風聲｜潘焯鴻獲梁翊婷簽支持同意書 與吳秋北同領先滾動民調〉。《香港01》 (香港中文)。原先內容歸檔喺2021-12-12。喺2021-12-05搵到。
17. 周皓宜 (2021-12-11)。〈立法會選舉｜港島東建制全告急 潘焯鴻：無佢哋咁多資源分析選情〉。《香港01》 (香港中文)。原先內容歸檔喺2021-12-12。喺2021-12-11搵到。