From Wikipedia, the free encyclopedia
沙巴(粵拼:saa1 baa1;馬來話:Sabah),以前叫「北婆羅洲」,喺婆羅洲島北部[13][14],係馬來西亞13個州屬之一,亦係馬來西亞境內第二大州,僅次於佢西南面嘅沙撈越,而佢南面同印尼嘅北加里曼丹省接壤,首府係亞庇。沙巴人口主要分為三大民族,包括客家人、卡達山人同巴瑤人,分別使用客家話、華語、英文、卡達山語同馬來語,隨住大量外籍人士湧入,令到沙巴華人只佔沙巴總人口大約一至兩成。
沙巴 Sabah | |||
---|---|---|---|
馬來西亞州屬 | |||
| |||
沙巴 馬來西亞其他州屬 | |||
首府 | 亞庇 | ||
省份 | 一覽
| ||
政府[1][2] | |||
• 州元首 | 朱哈·馬希魯丁 | ||
• 首席部長 | 哈芝芝諾 | ||
面積[3] | |||
• 總數 | 73,631 平方公里(28,429 平方英里) | ||
面積排名 | 第二名 | ||
人口(2018)[4] | |||
• 總數 | 3,889,300 | ||
• 排名 | 第二名 | ||
• 密度 | 53/平方公里(140/平方英里) | ||
居民稱謂 | 沙巴人 | ||
人類發展指數 | |||
• HDI (2017) | 0.703 (高)(第13位) | ||
時區 | MST[5](UTC+8) | ||
汶萊帝國 | 15世紀–1882年 | ||
英屬北婆羅洲 | 1882年–1941年 | ||
日本軍事佔領 | 1941年–1945年 | ||
英屬直轄殖民地 | 1946年–1963年 | ||
獲得自治 | 1963年8月31號[6][7][8][9] | ||
馬來西亞協定[10] | 1963年9月16號a[11] | ||
網站 | 沙巴嘅官方網站 | ||
a 馬來西亞喺1963年9月16號開始存在,但馬來西亞獨立日就被訂喺8月31號(馬來亞獨立日)。2010年以嚟,9月16號被認定為馬來西亞日。呢一個係馬來西亞嘅公眾假期,為咗紀念北婆羅洲、馬來亞、沙撈越同新加坡以同等夥伴地位參組嘅馬來西亞[12]。 |
1881年開始,北婆羅洲一直畀大英帝國所統治。直到1963年8月31號,北婆羅洲喺英國予以自治地位,同時改名做「沙巴」(Sabah),但係並未喺法律上獲得正式獨立,佢嘅國防、外交、財政、內政等事務仍然由英國政府管[15]。
1963年9月16號同沙撈越、馬來亞聯合邦以及新加坡共同組成聯邦國家,成立馬來西亞[16][17]。喺成立馬來西亞之前,沙巴同沙撈越、新加坡一樣,都係英屬自治邦,根據成立協議沙巴喺一定程度上具有行政自治權,例如移民政策自主權。
沙巴享有風下之地(Land Below The Wind)或者風下之鄉嘅美譽,原因係沙巴嘅位置喺飽受颱風肆虐嘅菲律賓以南,颱風唔會經過呢度[18][19][20][21]。沙巴首府係亞庇,前名叫哲斯頓(Jesselton)。其他主要城鎮有山打根、斗湖、根地咬、保佛、古達、仙本那、拿篤、斗亞蘭、吧巴、實必丹、丹南、蘭瑙、古打毛律、哥打馬魯都等。納閩喺1984年由哈里士領導嘅人民黨組成嘅沙巴政府交咗畀聯邦政府,依家係聯邦直轄區,亦係大馬唯一一個岸外金融中心。
人類最早遷移同定居喺沙巴地區嘅時間,可以追溯到大約距離依家2-3萬年前。呢啲早期人類據說係矮黑人群體。下一波嘅人類遷徙,據說係南島語族,發生喺大約公元3000年前。由於缺少正式歷史文件紀錄,沙巴早期嘅歷史比較模糊,只能夠由外國嘅紀錄同考古學家所發現嘅考古證據嚟考證。沙巴博物館收藏咗呢方面嘅資料。
相傳沙巴西面海岸嘅居民鍾意種植一種叫做「Pisang Saba」嘅香蕉。呢種香蕉成為遠近馳名嘅特產,於是啲人就將呢度叫做「Sabah」。
另一個講法係,因為沙巴喺北半球颱風地帶以南,一般唔會受颱風嘅干擾[22],所以被稱為「風下之鄉」(Land Below The Wind),吸引嗰啲到蘇祿群島經商嘅回教商人停駐以避颱風;而喺阿拉伯文,「風下之鄉」被稱為Zir-e Bad,發音亦接近「Sabah」。
早喺15世紀,汶萊同菲律賓南部一帶嘅商人已經將呢個地方叫做沙巴。但係,英國人喺1881年統治沙巴之後,就將呢度地名改為北婆羅洲(North Borneo)。直至1963年,沙巴成為馬來西亞嘅一份子,恢復固有嘅名。
喺7世紀,有一個定居嘅社會名為Vijayapura,向三佛齊帝國進貢,被認定係當時已經存在喺婆羅洲東北海岸附近嘅汶萊帝國最早封地[23]。另一個令人質疑係咪確實存在嘅王國係9世紀渤泥(Po-ni)。學者認為,渤泥喺汶萊河口,並且係汶萊蘇丹國嘅前身[24]。喺汶萊統治者開始接受伊斯蘭教之後,成立咗汶萊蘇丹國。喺第5任蘇丹博爾基亞喺1473年至1524年間統治下,汶萊蘇丹國嘅領海延伸到沙巴、北面嘅蘇祿群島同馬尼拉,以及南方嘅沙撈越一直到婆羅洲島南端嘅馬辰[25]。喺1658年,汶萊蘇丹將婆羅洲北部同東部嘅一部分割讓畀蘇祿蘇丹,以答謝協助平定汶萊蘇丹國嘅一場內戰。喺1749年,婆羅洲蘇丹國將菲律賓巴拉望省南部割讓畀西班牙[26]。
根據記載,沙巴早喺公元6世紀就同中國有經濟來往,喺沙巴博物館可以睇到各式各樣嘅甕,有足夠證明沙巴同中國關係源遠流長。當時中國商人嚟呢度多數係為香料、木材、燕窩等。中國各個朝代古書、史書入面都有渤泥嘅記載,可見當時中國人已經踏足咗婆羅洲,甚至喺中國南京仲保留住明朝渤泥國王嘅墳墓。
1761年,英國東印度公司官員亞歷山大·達爾林普爾同蘇祿蘇丹締結協議,允許佢喺峇蘭巴雁島設立貿易站,但係由於呢項計劃喺1805年11月遭到失敗,令到島嶼同站點都畀英國所捨棄。
1846年,汶萊蘇丹將喺北婆西海岸嘅納閩島(Labuan)割讓畀英國,而後者喺1848年成為英屬皇家殖民地。幾經轉移,北婆羅洲嘅所有權最後流落到阿爾弗雷德·登特手入面,並由佢喺1881年成立英屬北婆羅洲臨時協會有限公司(British North Borneo Provisional Association Limited)。
1882年,英屬北婆羅洲特許公司成立,以古達為特許公司初始嘅總部,後期喺1883年將總部搬去山打根。1885年,英國、西班牙同德國簽訂咗馬德里議定書,承認西班牙擁有蘇祿群島嘅主權,以交換西班牙放棄對北婆羅洲嘅主張[29]。1888年,北婆羅洲成為英國嘅保護領。
第二次世界大戰期間,日軍喺1942年1月1號登陸納閩,之後繼續入侵北婆羅洲其他地區。1942年到1945年,日本軍隊佔領馬來亞、北婆羅洲同沙撈越,連同呢座島嶼嘅大部分地區。日軍完全佔領沙巴之後,當地人組織咗抗日組織「神山遊擊隊」,由郭益南(Albert Kwok)建立;而喺古達,另一支遊擊隊由敦姆斯達法(Tun Datu Mustapha)建立。1943年10月10號,郭益南嘅部隊開始同日本仔交戰。亞庇市嘅亞庇國際機場正對面有一座Petagas嘅戰爭紀念碑。
盟軍嘅轟炸摧毀咗大多數城鎮,山打根被夷為平地。山打根曾經有一座由日本仔所管理嘅殘酷戰俘營,用嚟關押喺北婆羅州嘅澳洲同英國戰俘。囚犯遭受慘無人道嘅待遇,而且盟軍轟炸令到日本仔將戰俘營搬到內陸嘅蘭瑙,有260公里之遙。當時所有戰俘犯人數量已經減少到2504人,被迫展開惡名昭彰嘅山打根死亡行軍。幾乎所有戰俘都喺呢一場行軍中死亡,只有六名澳洲人逃跑倖存。1945年9月10號戰爭結束,日本投降。
1945年9月10號日本投降後,北婆羅洲由英國軍政府所管理,1946年成為英國海外領地。北婆羅洲首都由山打根搬去亞庇。
1962年,成立科博德委員會(Cobbold Commission),以確定沙巴同沙撈越人民支持組成聯邦嘅方案,呢個委員會發現呢個方案受到人民普遍支持。沙巴嘅大多數族裔社群領袖,由敦慕斯達法代表穆斯林,敦莫哈末·法·史蒂芬代表非穆斯林土著,丘錫州代表華人,到最後表示支持呢個組成聯邦嘅方案。
1963年8月31號,英國駐北婆羅洲總督委任咗沙撈越人Donald Stephens為侯任首席部長(Chief Minister Designate),以組織地方議會政府。形式上表明,北婆羅洲被英國予以自治地位,但係並未從法律上獲得正式獨立,佢嘅國防、外交、財政、內政等事務仍然由英國政府管[15]。英女王依舊通過英屬北婆羅洲總督對沙巴統治持續至1963年9月15號。
1963年9月16號,北婆羅洲喺此後叫做沙巴,同馬來亞聯合邦、沙撈越同新加坡,共同組成獨立嘅馬來西亞[13][14][30][31] 。
由馬來西亞組成之前,一直到1966年,印尼對於英國喺背後撐腰嘅馬來亞同後來嘅馬來西亞政府採取敵對政策。呢種不宣而戰源自於印尼總統蘇加諾,佢認定呢個係英國擴大喺呢個地區嘅影響力,打算奪取成個婆羅洲,歸喺印度尼西亞共和國統治之下。
敦福阿德斯蒂芬斯成為沙巴第一位首席部長(Chief Minister)。第一任元首係敦穆斯塔法。沙巴喺1967年舉行咗第一次州選舉。直到2008年,一共舉行過11屆州議會選舉,國民陣線一直喺嗰個邦穩定執政。截至2009年,沙巴曾經有13位首席部長,9位唔同嘅州元首。由1970年開始,由於喺菲律賓棉蘭老島發生摩洛人叛亂,當地嘅難民陸續抵達沙巴[32]。
2015年6月5號朝早7點20分,沙巴蘭瑙發生5.9級地震,導致京那巴魯山登山道山崩,18人遇難,多人受傷[33]。2016年6月5號,當地政府喺京那巴魯山山腳附近豎立咗一座刻有罹難者嘅名嘅「神山山難紀念碑」。[34][35]。
沙巴州下設有5個省(Bahagian)同27個縣(Daerah)。
沙巴西半部普遍係多山地區,包含馬來西亞三座最高嘅山峰。最突出嘅山脈係克羅克山脈,其中有幾座山峰,高度由大約1000米到4000米。最高峰京那巴魯山有4095米,係東南亞嘅最高山峰。沙巴嘅叢林屬於雨林,擁有生物多樣化嘅植物同動物物種。喺2000年,擁有豐富植物多樣性,再加上佢獨特嘅地質、地形同氣候條件嘅京那巴魯國家公園列入世界遺產[36] 。
沙巴面積76,115平方公里,海岸線長1,440公里,沙巴州喺地圖睇落似一個狗頭,三面環海,海岸線長達1440公里,沙巴東北部同菲律賓為鄰,面向蘇祿海,東部同南部係印尼蘇拉威西同加里曼丹,面向蘇拉威西海,西南部同汶萊達魯薩蘭國同沙撈越州為鄰,西北部面向南中國海。境入面最長嘅河流係京那巴當岸河。
由於沙巴喺巽他板塊範圍入面,受到澳洲板塊同菲律賓板塊壓縮,所以沙巴州好易發生地震,由1923年以嚟沙巴州經歷咗三場大地震,其中2015年沙巴地震係最近期嘅主要大型地震[37]。克羅克山脈同京那巴魯山一齊形成,喺中新世中期由沙巴造山運動通過壓縮將佢整高[38]。
沙巴州喺熱帶雨林氣候位置,呢度經歷東北同西南兩個季候風季節。東北季候風喺11月至3月期間影響沙巴,帶嚟大雨;而西南季候風喺5月至9月期間盛行,降雨量相對較少[39]。由4月至5月同9月至10月,沙巴仲會經歷兩個季候風之間嘅季節。每日平均氣温由 27 °C(81 °F)至 34 °C(93 °F),降雨量由1,800毫米至4,000毫米不等[39]。由於沙巴州喺颱風帶以南,沿海地區偶爾會有嚴重暴風雨影響[39]。
由於沙巴嘅位置好接近颱風帶,所以沙巴喺1996年12月25號經歷咗到目前為止最嚴重嘅熱帶風暴格雷格[42]。風暴造成多過100人死、200-300人失踪、3,000-4,000人無家可歸[43][44]。
2010年沙巴人口為3,120,040人[45],係馬來西亞人口第三多嘅區域,僅次於雪蘭莪同柔佛。由於菲律賓南部省份好多非法移民搬嚟沙巴,所以沙巴成為馬來西亞人口增長率最高嘅區域之一。
根據2015年馬來西亞人口普查,沙巴州人口有3,543,500人,係馬來西亞人口第多嘅州,其中非公民人口係馬來西亞之冠,有870,400人[4]。但係,由於馬來西亞係亞洲其中一個人口最稠密嘅國家之一,沙巴州嘅人口特別稀少,人口主要集中喺沿海地區,因為城鎮同城市中心嘅大規模擴張。
沙巴州估計有42個族群,其中200幾個亞族裔群體,佢哋有各自唔同嘅語言、文化同信仰體系ref>Julia Chan (13 February 2015). "Sabah lists 42 ethnic groups to replace 'lain-lain' race column". The Malay Mail. 原著喺1 June 2016歸檔. 喺1 June 2016搵到.</ref>。其他居民為61萬外國人(當中包括25萬持有合法證件嘅勞工同36萬無合法證件入境居留者等)。
42個族群入面,最大嘅非土著族群係華人(13.2%),沙巴最主要嘅漢族語言係客家話,之後係粵語同福建話。沙巴大多數華人都集喺大城市同城鎮,包括亞庇、山打根同斗湖等地。最大嘅土著民族係卡達山-杜順人,之後係巴瑤族同姆律人(Murut)。華人係喺19世紀時先大量移民嚟呢度,主要係客家人、廣府人、潮州人、福建人、海南人同一啲廿世紀來嚟嘅天津人、河北人。相對其他馬來西亞州屬,沙巴嘅印度人同其他南亞裔族群規模唔多。科科斯人(Cocos)係住喺沙巴嘅少數族群,特別喺斗湖省。總睇嚟講,所有嚟自沙巴嘅人被稱為「沙巴漢」,佢哋亦自我認同呢個稱呼[47]。
沙巴人口包含好多唔同族群,相對較普遍有:
|
|
其他居民:
所謂土著係馬來西亞政府政治定義為原居民人士,沙巴因馬來西亞政府施行嘅種族政策(將喺印尼出世嘅馬來人同喺菲律賓出世嘅回教徒引入同畀公民權以及土著地位)而造成人口激烈增長[49][50]。
根據2018年統計,沙巴有480,000華人,其中客家人佔大多數(大約54%)以祖籍惠州居多,其次係廣東人(大約28%),主要集中喺山打根,另外沙巴亦有嚟自華北地區嘅人,主要集中喺山東村(大約18%)。
回教係沙巴州嘅主要宗教,即使社會仍然留喺世俗主義[52][53]。喺2010年人口普查入面,大約65.4%人信回教、26.6%人信基督教、6.1%人信佛教[54]。喺1960年,回教徒大約只有37.9%,同萬物有靈論大致上一樣(33.3%),而基督教係16.6%、其他宗教12.2%[55]。呢個增長主要係因為喺呢幾十年嚟有唔受控制嘅移民同有爭議性嘅大規模轉換[54][56]。另外,沙巴州亦有其他宗教,例如中國民間信仰以及印度嘅宗教,印度教同錫克教[57]。
沙巴州經濟主要係第一產業,包括農業、林業同石油產業[59][60]。依家,服務業對沙巴州經濟都好重要,特別係旅遊同服務相關行業。沙巴州擁有豐富嘅生物多樣性,有好多生態旅遊。旅遊業即使受到菲律賓南部嘅激進組織影響,佢哋越境去沙巴襲擊同綁架遊客,但係隨住沙巴東部同蘇祿海安全巡邏提高,旅遊業亦保持穩定[61]。旅遊業佔沙巴州國內生產總值(GDP)10%,預計會繼續增加[62]。大部分遊客嚟自中國(60.3%)、之後分別係韓國(33.9%)、澳洲(16.3%)同台灣(8.3%)[63]。旅遊業喺沙巴州經濟中扮演住好重要嘅角色,係州入面收入第三多行業,呢個州喺2018年一共接待咗3,879,413名遊客,比2017年嘅3,684,734名增加咗5.3%[64]。由1950年年代開始,橡膠同椰子核成為北婆羅洲主要農業經濟[65]。由於工業國家對原材料大量需求,木材行業喺1960年代開始興起。但係喺1970年代,當沙巴西海岸地區發現石油之後,就畀石油行業所取代[66]。同年,可可豆同棕櫚油亦被加入列表入面[60][67]。沙巴州政府設法將州基金由6百萬令吉增加到120億令吉,而貧窮率幾乎減低咗一半去到1980年嘅33.1%[68]。因應沙巴州第一產業急速發展,吸引咗好多鄰國印尼同菲律賓嘅求職者外勞,因為本身於州入面勞動力不足[69]。當時沙巴州嘅GDP排喺雪蘭莪同吉隆坡之後,係第三有錢,即使製造業規模依然好細[70][71]。但去到2000年,沙巴州開始變得馬來西亞最貧窮,因為同第二產業製造州屬相比,呢個州依然依賴天然資源作為主要收入來源[72]。所以,Sabah Development Corridor(SDC)由馬來西亞第五任首相阿布都拉·巴達威喺2008年成立,喺18年時間入面投資1050億令吉,到2025年將沙巴州嘅GDP增加至632億令吉[73]。每年大約撥出58.3億令吉用作機建發展,並創造900,000個工作職位[73]。聯邦政府嘅目標係喺第九屆馬來西亞計劃(9MP)完結前消除極端貧困問題,總體貧困率由2004年嘅23%下降到2010年嘅12%以及2012年嘅8.1%[73]。由2008年成立以嚟,沙巴州嘅GDP增長去到10.7%,高過國家嘅經濟增長4.8%同世界經濟增長嘅2.7%。之後2009年全球金融危機,沙巴州嘅GDP增長係4.8%(同期全國GDP增長率-1.5%,世界水平GDP增長率-0.4%)[73]。
由2010年至2011年,沙巴州嘅經濟增長有所放緩,因為石油同天然氣行業嘅疲弱表現。根據2014年嘅調查,沙巴州碌得5.0%嘅GDP增長,依然係農業嘅最大貢獻者,佔18.1%,排喺之後有沙撈越、柔佛、彭亨同霹靂。不過,呢度嘅人均收入最低依然為19,672令吉,僅次於所有13個州入面嘅吉蘭丹(11,815令吉)同吉打(17,321令吉)[74]。同年,沙巴州嘅出口額為453億令吉,進口額為365億令吉。機器同運輸設備佔大多數進口,之後係燃料、礦物潤滑劑同其他。沙巴主要出口原油同棕櫚油[75]。沙巴州依家一共有8個港口,其中Sepanggar有兩個,而亞庇、山打根、斗湖、古達、Kunak同Lahad Datu各一個,每個港口由沙巴州港口管理局(Sabah Ports Authority)營運同管理,管理局由Suria集團管理[76]。作為馬來西亞第十一屆計劃(11MP)嘅一部分,聯邦政府批准咗撥款8億令吉,將Sapangar灣貨運港口由每年50萬擴大到1.25 million20呎標準貨櫃,以適應巴拿馬型大小船隻[77][78]。同年又撥款3.3351億令吉,令到計劃總額為11.3億令吉,計畫將會喺2017年開始[79][80]。漁業仍然係沙巴第一產業經濟嘅重要部分,每年貢獻大約200,000公噸魚獲,價值700令吉,為沙巴州年度GDP貢獻咗2.8%[81]。水產養殖同海水網箱行業生產咗35,000公噸鹹淡水嘅水產養殖同360公噸嘅石斑魚、瀨魚、鯛魚同埋龍蝦,價值分別大約6000萬令吉同1300萬令吉。沙巴亦係其中一笪製造海藻地方,大多數種植場喺仙本那海域附近[81]。但係最近嘅海藻行業受到菲律賓南部武裝恐怖組織阿布沙耶夫一連串嘅綁架事宜所影響[82]。
截至2015年,沙巴每日生產180,000石油換算桶油[83],根據1974年石油發展法,依家馬來西亞國家石油將沙巴水域石油開發收入嘅5%支付畀沙巴作為石油特許權使用費(採礦公司支付畀租賃所有者嘅石油產量百分比)[68][84]。大多數石油同天然氣儲存藏喺沙巴西海岸一側嘅盆地[85]。沙巴仲獲得到沙撈越民都魯嘅馬來西亞國家石油公司液化天然氣(LNG)10%股份[86]。收入分配唔平均同生活水平高昂依然係沙巴州主要經濟問題[87]。生活水平高昂歸咎喺沿海航行政策,即使原因係由於貿易量較少,運輸成本同港口貿易處理效率所引致[88]。即使原因係歸於其他原因,政府已經著手審查沿海航行政策,世界銀行表示,呢一個結果係由於分銷渠道薄弱、手續費高昂同埋內陸運輸效率低所造成[89]。最終同意喺2017年6月1號開始豁免呢個政策,外國船隻可以直接進入東部港口,而無需前往西馬,不過沿海政策喺沙巴、沙撈越同納閩聯邦直轄區入面嘅貨物轉運依然繼續[90][91]。馬來西亞首相納吉仲承諾通過改善同起多啲機建,以縮細沙巴州同馬來西亞半島之間嘅發展差距[92],呢個計畫喺希望聯盟統治下仍然繼續,副總理旺阿茲莎話,聯邦政府應該同馬來西亞半島有同等發展,聯邦政府將會一如既往地致力幫助發展沙巴州[93][94]。根據最新數據,即使總失業人口依然好高,但係已經由2014年嘅總失業率5.1%,下降至2015年嘅4.7%[95]。隨住經濟有所提升,貧民窟幾乎喺全馬來西亞唔再存在,但係由於有大量菲律賓難民逃避菲律賓南部嘅摩洛衝突,令到沙巴菲律賓貧民窟大大提升。為咗減低水污染同改善衛生,沙巴州政府努力緊將呢班難民安置喺更好嘅屋住環境入面[96]。作為汶萊達魯薩蘭國-印度尼西亞-馬來西亞-菲律賓東盟增長區(BIMP-EAGA),沙巴亦會繼續將自己定位為區域投資嘅主要門戶。外國投資主要集中喺亞庇工業區(KKIP)範圍[84] 即使喺第二次世界大戰結束以嚟,日本等國家主要集中開發同投資各種項目,主要集中喺內陸同島上面[97]。美國喺2017年初放棄跨太平洋夥伴關係(TPPA)經濟協議之後,沙巴開始將貿易轉向中國同印度市場[98]。為咗進一步加快經濟增長,沙巴州仲繼續增加緊主要貿易夥伴,包括德國、韓國、泰國同阿聯酋作為食品製品嘅出口目的地。而汶萊、印尼、台灣、美國同新西蘭作為棕櫚油同物流行業嘅目的地,俄羅斯為石油同天然氣行業嘅目的地,以及日本同越南作為木製傢俬嘅目的地[99]。
沙巴州嘅森林擁有好多唔同種類嘅動植物物種。沙巴大部分嘅生物多樣性都喺森林保護區範圍,佔沙巴州總面積7.34百萬公頃嘅一半[100]。佢嘅森林保護區係根據「婆羅洲核心」倡議劃定嘅2000萬公頃赤道熱帶雨林一部分[100]。森林圍繞住京那巴當岸河河谷係馬來西亞最大嘅被森林覆蓋嘅洪泛平原[101]。克克洛克山脈國家公園係沙巴州最大嘅國家公園,佔地面積有139,919公頃。呢個公園大部分地區都畀茂密嘅森林所覆蓋,同時亦作為一個重要嘅集水區,佢同河源連接住喺西海岸地區嘅五條主要河流[102]。京那巴魯國家公園因為擁有豐富嘅植物多樣性,同時具有獨特嘅地質、地形同埋氣候條件,喺2000年畀聯合國教科文組織列為世界遺產[103]。呢個國家公園擁有多過4,500種動植物種類,其中包括326種鳥類,大約100種哺乳類動物,以及110多種蝸牛品種[104][105]。
迪加島喺1897年泥火山爆發形成。呢個島而家同Kalampunian Besar島同埋Kalampunian Damit島同屬迪加島國家公園一部分,作為一個遊客景點[106],同泥浴旅遊[107]。東姑阿都拉曼國家公園係由Gaya島、Manukan島、Mamutik島、Sapi島同Sulug島,五個島嶼組成。據信呢啲島嶼曾經同克洛克山脈有關,但係因上一個冰河時期完之後海平面上升而分開[108]。敦慕斯達化海洋公園係沙巴北部最大嘅海岸公園。佢包含3個主要島嶼邦吉島、峇蘭巴雁島同埋馬拉瓦利島[109]。另一個海岸公園係敦薩卡蘭海洋公園(Tun Sakaran Marine Park),佢喺沙巴州東南部。呢個海洋公園由博德加亞島(Bodgaya Island)、Boheydulang島、Sabangkat島同埋Salakan島同埋沙小礁島Maiga、Mantabuan、Sibuan組成。博德加亞島(Bodgaya Island)被列為森林保護區,而Boheydulang島被列為鳥類保護區[110]。呢啲島係由第四紀爆發性火山活動中噴出嘅火山碎屑物質而形成[111]。
斗湖山國家公園建立為一個自然嘅集水區。公園入面有崎嶇嘅火山景觀,包括一個溫泉同壯觀瀑布。同菲律賓海龜島接連嘅海龜島國家公園,包含三個島Selingaan、 Bakkungan Kechil同埋Gulisaan,係一笪綠海龜同玳瑁出名嘅築巢地[112]。沙巴州其他重要嘅野生動植物地區包括馬里烏盆地(Maliau Basin)、達努姆谷(Danum Valley)、塔賓野生動物園(Tabin Wildlife Reserve)、Imbak Canyon自然保護區同埋西必洛人猿保護中心(Sepilok Orangutan Rehabilitation Centre)。呢啲地方被指定為國家公園、野生動植物保護區、原始森林保護區或者森林保護區。沙巴海岸亦有好多有豐富珊瑚礁嘅島嶼,例如利吉丹島、西巴丹島、Selingaan島、迪加島同埋拉央拉央島(燕子礁-Swallow Reef)。其他主要島嶼包括詹文安島(Jambongan Island)、丁文馬達島(Timbun Mata Island)、汶汶島(Bum Bum Island)同埋北部屬馬來西亞沙巴州管轄,南部屬印尼東加里曼丹省管轄嘅石巴迪島。沙巴州政府頒布咗多項法律保護森林同瀕危野生動植物物種,包括1962年動物條例[113]、1968年嘅森林法[114] 同埋1997年野生動物保護法[115] 等等[116][117]。根據野生動物保護法,任何人喺保護區範圍狩獵將會被判處5年徒刑,並罰款50,000令吉[115]。沙巴州政府仲計劃實施季節性狩獵,作為佢哋保護工作一部分,以防止瀕臨滅絕嘅野生動植物物種繼續消失,同時又保持住沙巴州原居民嘅狩獵傳統[118]。
由第二次世界大戰以嚟,大量工業國家需要大量木材作為原材料,沙巴森林逐漸受到不受控制嘅木材開發所侵蝕,以及將沙巴森林用地轉化為棕櫚油種植場[120]。1970年以嚟,林業為沙巴州收入貢獻咗50%以上,其中1997年進行嘅一項研究更加顯示,呢個州幾乎將所有保護區以外嘅原始森林消耗[119]。沙巴州政府希望維護州入面嘅生物多樣性,同時亦確保州經濟繼續發展[121]。即使有法律禁止伐林,但係與此同時要面對控制呢類活動嘅難題[117]。喺保護大自然同時,發展同埋基本所需嘅需要亦成為咗一個問題[122][123]。採礦活動將有毒重金屬直接釋放到河流、水塘、池塘入面,並通過尾礦浸出嘅礦影響地下水。1994年發佈嘅一份環境報告指出,Damit/斗亞蘭河嘅重金屬含量超出咗飲用水嘅安全水平。里瓦古河(Liwagu River)嘅水質亦有報告指有源自馬穆特銅礦(Mamut Mine)嘅重金屬存在[70]。由乾旱同唔負責任嘅農夫或者個人所引發嘅森林大火亦成為咗最新關注嘅問題,例如發生喺2016年嘅森林大火,令到沙巴州西海岸嘅Binsuluk森林保護區入面,幾千公頃嘅森林保護區受到破壞[124][125]。
猖獗嘅魚炮捕魚摧毀咗沙巴州好多珊瑚礁同埋影響到漁業生產[126][127]。另外,喺帕達斯(Padas)、吧巴(Papar)同埋斗亞蘭(Tuaran)河流嘅非法提取河砂同碎石活動,連同野生動植物同海洋狩獵同偷獵,成為咗最新關注[70]。由於嚴重嘅森林砍伐以及大量野生動物同海洋偷獵,蘇門答臘犀喺2015年初宣佈絕咗種[128]。其他一啲瀕臨絕種嘅物種有爪哇野牛[129]、婆羅洲鬚豬[130]、雲豹、儒艮[131]、婆羅洲象、馬來長吻鱷、綠蠵龜、玳瑁、婆羅洲猩猩、馬來穿山甲[132]、長鼻猴[133]、婆羅洲河鯊[134]、roughnose stingray[134]、水鹿、婆羅真鯊同理馬來熊[130][135]。雖然原居民種群亦有參與狩獵,但係佢哋係根據自己嘅精神主義信仰同習慣,而且規模亦較細,同偷獵者唔同[136]。出名原居民習慣有「maganu totuo」 或者 「montok kosukopan」、 「tuwa di powigian」、 「managal」或者「tagal」同埋「meminting」,幫助維持資源同埋防止資源枯竭[136]。
沙巴州嘅文化各式各樣,因應好多唔同種族而異[137]。喺沿海地區,沙巴文化受到汶萊馬來人同西海岸巴瑤族所影響,而喺東海岸,就受到東海岸巴瑤族、布吉人同Suluk人文化所影響,而伊斯蘭係佢哋生活重要嘅一部分[138][139]。基督教係住喺內陸地區嘅卡達山-杜順人、Lundayeh、Murut人同Rungus人嘅土著日常生活入面嘅土著文化發揮好重要作用,同時亦保留住佢哋傳統嘅萬物有靈論同異教徒主義嘅古老習俗[138]。
沙巴州有好多展示沙巴原居民文化嘅文化村,例如婆羅洲文化村[140]、Mari Mari文化村[141] 同埋Monsopiad文化村 [142],嗰度仲會有文化表演。沙巴州博物館收集咗好多唔同嘅遺物、黃銅器具同陶瓷,涵蓋咗沙巴州好多種唔同文化、自然歷史、貿易歷史同埋伊斯蘭文明,裏面有一個植物園同科學技術中心[143]。其他博物館包括Agop Batu Tulug Museum、Agnes Keith屋、山打根文化博物館、Teck Guan Cocoa Museum同3D Wonders Museum[144][145][146]。另外,仲有一啲保育嘅英國、德國同日本殖民地建築,例如 Atkinson鐘樓、Batu Tinagat燈塔、 Jesselton酒店、Kinarut 大廈遺跡、 沙巴州旅遊局大樓、斗湖鐘樓,以及其他好多唔同紀念館同埋紀念碑。其他特別旅遊景點包括Rumah Terbalik (反轉嘅屋) 同婆羅洲螞蟻屋 (Borneo Ant House)[147][148]。
手工藝品同紀念品係沙巴嘅旅遊產品一部分。另外,由2011年以嚟,每年都會喺當地一啲唔同細型博物館舉行沙巴工藝品異國情調計劃 (Sabah Crafts Exotica programme)[149][150]。喺州政府採取各種措施鼓勵本地企業家製造沙巴州特色手工藝品之後,2012年一共有526名企業家,2013年增加到1,483名,而2014年增加到1,702名,總銷售額由3,100萬令吉至5,600萬令吉[151]。
沙巴州每個民族都有佢哋傳統出名樂器[152],沿海人包括巴瑤族、汶萊馬來人、布吉人、Illanun人、卡達央族同埋Suluks人樂器有gendang、 rebana同埋kulintangan[153];而內陸地區人士,例如Dusun人主要樂器有bungkau、sompoton同turali,弄巴灣族或者Lun Dayeh部落帶住低音鼓、卡達山人帶住tongkungon、Mutut人帶住tagunggak而Rungus人有佢哋嘅sundatang、 tontog同turuding[154][155];suling係最多內陸種群玩嘅樂器,包括沙巴州嘅卡達山-杜順人、Murut人、Rungus人同理弄巴灣族/Lun Dayeh人[156]。每個民族都有自己出名嘅傳統舞蹈;卡達山-杜順人以Sumazau舞出名、 Murut人出名嘅傳統舞蹈係Magunatip[157] the Rungus with their Mongigol Sumundai,[155]、弄巴灣族/Lun Dayeh人 係Alai Busak Baku舞、汶萊馬來人Adai-Adai舞[158]、西岸巴瑤族有 Limbai舞同Kuda Pasu舞,東岸巴瑤族同Suluk人 Pangalay舞 (亦叫Daling-Daling或者Mengalai)、比薩揚人Liliput同埋科科斯群島馬來人Dansa同埋Nona Mansaya舞,以及其他亞族群嘅其他舞蹈[159][160]。除此之外,沙巴州仲以蠟染生產而出名,即使呢個行業仍然比馬來西亞半島東海岸嘅蠟染生產少[161]。沙巴州嘅蠟染已經商業化以進入國際市場[162]。
沙巴州出名菜式包括保佛麵(Beaufort mee)[163][164] bosou,[165]、卡達山醃魚(hinava)[166]、牛肉麵(ngiu chap)、酸辣魚(pinasakan)[167]、Sipitang沙爹[168][169]、斗亞籣麵(Tuaran mee)[164][170]、tuhau[171]、班邦水果(mangifera pajang野芒果)以及其他唔同種類[172]。除咗以上提及嘅食品,沙巴州仲有好多唔同小食,例如amplang、cincin、lidah、roti kahwin、UFO撻、pinjaram同埋山打根撻[173]。甜品好似lamban、nuba tingaa、punjung、sinamu同埋Tuaran椰汁布甸[174]。每個種族都有佢哋自己嘅美食以及各自嘅烹飪方式,包括準備、烹飪、擺設同食用。例如,以沙巴作為基地嘅公司,推廣佢哋嘅奶製品同州特色飲品有Desa Cattle、丹南咖啡同埋Sabah Tea[175]。原居民亦有佢哋唔同嘅特色酒精飲品,例如 bahar、kinomol、lihing、montoku、 sagantang、sikat同埋tuak[176];沙巴州成為咗全國第三大酒精消耗量州屬,僅次於吉隆坡同沙撈越[177]。山打根嘅英國茶屋同餐廳(English Tea House and Restaurant)係沙巴州另一個景點推廣緊英國茶文化。其他國際商舖同餐廳,例如西餐、中東式食物、汶萊食物、印尼食物、菲律賓食物、日式食物、韓國食物、台灣食物、泰國食物同埋越南食物,亦喺嗰度揾到。以美食旅遊為目的嘅遊客人數係咁增加,提高咗當地人對當地食物對沙巴州旅遊業嘅重要性[178]。
沙巴人全年都有好多假期同節日[179]。除咗國家嘅馬來西亞獨立日、馬來西亞日慶祝以及沙巴州管治者生日,沙巴州亦要喺8月31號慶祝北婆羅洲自治日[180][181]。每個民族都有慶祝自己嘅節日同開放文化(rumah terbuka) 係同嚟自其他種族同宗教嘅家庭同朋友到訪嘅一種常態,尤其係喺唔同種族唔同背景之間進行嘅異族通婚情況下[182]。沙巴州係馬來西亞唯一一個宣佈將慶祝豐收節(Kaamatan)作為公眾假期嘅州屬[183]。沙巴同沙撈越亦係馬來西亞唯一兩個州宣佈定耶穌受難節為公眾假期[182][184]。沙巴每年亦有好多節慶,例如日本盂蘭盆節 (Bon Odori Festival)[185]、Sabah Jazz[186]、婆羅洲雀仔節 (Borneo Bird Festival)[187] 婆羅洲昆蟲節 (Borneo Bug Fest)、婆羅洲生態電影節 (Borneo Eco Film Festival)[188]、亞庇美食節[189]、亞庇爵士音樂節 (Kota Kinabalu Jazz Festival)[190]、沙巴龍舟節、沙巴節 (Sabah Fest)[191]、沙巴國際民俗節 (Sabah International Folklore Festival) 同埋沙巴日落音樂節 (Sabah Sunset Music Festival)[192]。
沙巴嘅交通仲未算發達,公路網絡雖然普遍,乘搭巴士可以去到各個大小城鎮,但係有啲地方仲需要用船或者四驅車先去得到,就算普通細車無法進入,有時更加要出動直升機去內陸較偏遠地區,將病人送到大醫院救治。
沙巴各大城市都流行迷你巴士(Mini bus),當中業者水準參差不齊,仲有一啲霸王車。以前喺亞庇、鬥亞蘭、兵南邦、丹絨亞路各有三間比較大型嘅巴士公司(Tuaran United Transport (TUT)、Penampang United Transport (PUT)同Luen Tong)提供服務,但係依家呢三間巴士公司都已經停駛。亞庇市區仲可以乘搭長途巴士、Grab或者的士來往根地咬、蘭瑙、沙撈越州嘅老越等地方。長途巴士站已經搬到下南南一帶,嗰度啲巴士去到山打根同斗湖,山打根依家有兩間巴士公司提供主要路線載客服務,佢哋係Labuk Road Bus Ltd.同Leila Road Bus Ltd.。
亞庇國際機場係馬來西亞第二繁忙嘅機場,主要航空公司有馬來西亞航空、亞洲航空同馬印航空。差唔多每個城鎮都有自己嘅機場,但係由於陸上交通發達,有啲已經荒廢咗。
亞庇國際機場提供往返沙巴州山打根航線,其他國內航線有斗湖、詩巫、美里、哥打巴魯、吉隆坡等地,國際直航線有中國大陸各地、香港、台灣、菲律賓、曼谷、韓國、東京、柏斯等地。
沙巴仲保留住婆羅洲唯一嘅鐵路,雖然佢嘅光輝日子已不再,但係仍然服務部分去市區嘅居民同用作觀光用途,令遊客可以欣賞到沙巴鄉村大自然風景[193]。
保佛-EB, B_S, SB | |
古達-K, EK, K_S, SK | |
根地咬-EU, SU | |
山打根-S, ES, S_S, SS, SSA, SM(2018年開始) | |
拿篤-D, D_S, SD | |
斗湖-T_S, ST,STA, SW(2018年開始) | |
政府車-EG, SG |
北婆羅洲派出自己嘅隊伍參加1956年夏季奧林匹克運動會[194]、1958年嘅大英帝國及英聯邦運動會同埋1962年大英帝國及英聯邦運動會[195] 以及1962年嘅亞運會,1963年之後運動員開始代表馬來西亞參賽[196][197]。喺沙巴成為馬來西亞一部分之後,為咗培養更加多運動員同埋提升運動水平,沙巴州體育委員會喺1972年成立[198]。另外,沙巴體育及文化局喺1976年9月1號成立,之後由於特殊原因係1978年12月停辦咗兩年幾,直到1981年1月1號[199]。喺1996年12月31號,呢一個局分咗做沙巴州體育局以及沙巴州文化局,一直運作到依家[199]。沙巴仲成為咗2002年馬來西亞運動會嘅主辦地方。沙巴州亦派隊代表馬來西亞參加東南亞運動會。除咗專注喺主要運動之外,沙巴州仲擁有11種傳統運動[200]。
沙巴州入面有12個綜合運動場同埋3個主要體育場[201]。Likas體育場係沙巴足球協會嘅主場,之後係兵南邦體育場同斗湖體育場。沙巴足球協會喺1963年成立,贏過1995年嘅馬來西亞足總盃、1996年馬來西亞頂級聯賽、2019年馬來西亞首要足球聯賽(第二級)、1999年嘅馬來西亞總統盃、13次以前嘅婆羅洲盃冠軍以及女子足球比賽Tun Sharifah Rodziah杯11個冠軍[202][203]。呢個協會長期以嚟一直由州政府負責,喺1996年初重歸私營部門[204]。但係,由於呢個協會同沙巴州體育局之間有爭執,沙巴足球協會喺1998年1月15號畀州體育委員會停止營運,改由馬來西亞青年及體育部負責管理[205]。有人覺得呢個舉動違反咗國際足球協會規則,因為規則規定政府唔應該干預足球組織[205]。1980年代以嚟持續嘅問題困擾住沙巴足球協會,唔單只令到球隊表現惡化,亦令到球員士氣低落。另外,1994年爆出醜聞亦令到馬來西亞足球陷入困境[206]。喺2019年,沙巴州同沙撈越部委共同合作成立咗「東馬體育委員會」(East Malaysia Sports Commission),以促進兩個地區(包括婆羅洲其他地方)組織更加多體育項目[207]。隨住青年對電子競技增加興趣,沙巴州政府亦致力發展體育運動作為沙巴州旅遊業發展嘅一部分[208][209][210][211]。
沙巴州有4間主要政府醫院,佢哋係伊利沙伯女王醫院、伊利沙伯女王醫院II、根德公爵夫人醫院同埋斗湖醫院,以及其他13間政府區域醫院。女士同兒童醫院、精神病醫院、公共衛生診所、一個馬來西亞診所同埋鄉村診所。除咗政府醫院同診所之外,沙巴州亦有好多私家醫院,例如亞庇鷹閣醫院、KPJ Sabah Specialist Hospital(DSC)、Rafflesia Specialist Centre(RSC)同埋 Jesselton Medical Centre(JMC)[212]。喺州首府亞庇仲有一個叫做Solace Sabah嘅上癮治療設施,用嚟治療同酒精有關同埋藥物上癮有關嘅問題。
喺2011年,沙巴州嘅醫生病人比例係1:2,480,低過世界衛生組織(WHO)建議嘅1位醫生對600位病人嘅比例[213]。由於工作量好大同埋好多畢業生對做醫生無興趣,沙巴面對緊醫生短缺問題[214]。好多曾經喺公立醫院任職嘅醫生決定轉去私立醫院做,因為公立醫院工作量大、人工低,即使私立醫院唔係咁容易聘請佢哋,有啲申請更加被拒絕咗[212]。所以,為咗防止醫生持續短缺,聯邦政府已經採取咗各種措施,喺每年國家預算入面,撥出大筆資金聘請更加多醫生,又將大量資金分配畀醫療保健部門[215]。
所有中小學都由沙巴州教育局管轄同監督,喺馬來西亞教育部轄下[216]。沙巴州最古老學校有山打根St. Michael's School(1886年)、兵南邦St. Michael's School(1888年)、All Saints' School, Likas(1903年)同埋斗湖 St. Patrick's School(1917年)[217]。根據2013年數據,沙巴州一共有207間政府中學[218]、5間國際學校,包括 Charis International School[219]、Kinabalu International School、[220]、Sayfol International School[221] 以及亞庇印尼學校(Indonesian School of Kota Kinabalu)[222] 同埋亞庇日本學校教育(Japanese School of Kota Kinabalu)[223]。另外,亦有9間華文獨立中學。沙巴州有相當多嘅原居民學生喺華文學校就讀[224]。
沙巴州政府亦強調州內嘅學前教育。隨後,沙巴基金會(Yayasan Sabah)同埋雀巢協助喺州入面建立學前教育學校[225][226]。沙巴州有兩間公立大學,佢哋係沙巴大學(UMS)同埋瑪拉工藝大學(UiTM)。敦阿都拉薩大學(UNIRAZAK)亦有喺亞庇設立佢哋嘅區域中心[227]。截至2016年,沙巴州大約有15間私立學院、2間私立大學學院同埋其他新成立嘅學院[228]。喺1960年,北婆羅洲嘅整體識字率只有24%[229],到2011年研究得知識字率已經增加到79%[230]。大多數中學畢業生喺完成馬來西亞教育文憑(SPM)後無繼續學業,主要係因為經濟負擔以及缺乏興趣同信心喺當地高等院校繼續學習。2015年一項調查顯示,有超過20,000名中學畢業生中,只有16,000名繼續學習[231]。
喺2016年初,沙巴一共有42,047名老師喺各種學前學校、小學同中學任教[232]。隨住馬來西亞聯邦政府施壓州政府去改善沙巴州教育水平,佢哋目標係希望有90%老師係沙巴人,減少依賴其他州屬老師數量[233]。沙巴州圖書館係呢個州主要公共圖書館[234]。沙巴州仲有另外11間印尼學校(除咗喺州首府亞庇嗰間主要印尼學校)喺呢個州各地,主要為住喺沙巴州嘅印尼移民細路提供服務[235]。由2014年以嚟,菲律賓嘅移民細路亦加入由沙巴嘅菲律賓義工同地方非政府組織合作建立嘅Alternative Learning Centre(ALC)[236]。
沙巴州有好多出名嘅觀光區:
年份 | 首席部長 |
---|---|
1963-1964 | 敦法史迪芬(Tun Fuad Stephens) |
1965-1967 | 丹斯里拿督羅思仁(Tan Sri Datuk Peter Lo Sui Yin) |
1967-1975 | 敦姆斯達發(Tun Mustapha bin Harun) |
1975-1976 | 敦沙益(Tun Said Keruak) |
1976(44日) | 敦法史迪芬(Tun Fuad Stephens) |
1976-1985 | 拿督哈里士沙烈(Datuk Harris Mohd Salleh) |
1985-1994 | 拿督斯里百林吉丁岸(Datuk Seri Joseph Pairin Kitingan) |
1994-1995 | 敦沙卡然(Tun Sakaran Dandai) |
1995-1996 | 拿督沙烈沙益(Datuk Salleh Mohd Said) |
1996-1998 | 拿督楊德利(Datuk Yong Teck Lee) |
1998-1999 | 丹斯里Bernard Dompok |
1999-2001 | 拿督奧蘇(Datuk Seri Osu Haji Sukam) |
2001-2003 | 丹斯里章家傑(Tan Sri Chong Kah Kiat) |
2003-2018 | 拿督斯里慕沙阿曼(Datuk Seri Musa Aman) |
2018-2020 | 拿督斯里沙菲益阿達 |
2020-至今 | 拿督斯里哈芝芝 |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.