柔佛州
From Wikipedia, the free encyclopedia
柔佛州（粵拼：jau4 fat6；馬來話：Negeri Johor，馬來爪夷文：نڬري التّعظيم）係馬來西亞十三個聯邦州之一，西馬來半島南側，北鄰馬六甲州、彭亨州同埋森美蘭州，西隔馬六甲海峽望印尼蘇門答臘島，南眺星架坡，東臨南中國海。柔佛州嘅首府係新山，係柔佛嘅經濟中心，而依斯干達公主城係柔佛嘅行政中心；麻坡係皇城。柔佛嘅舊首府喺哥打丁宜。截至2018年，呢個州人口有3742200人[6]。
| 柔佛 | |||
|---|---|---|---|
 馬來西亞州屬 | |||
| Negeri dan Jajahan Takluk Johor Darul Ta'zim | |||
| 其他轉寫 | |||
| • 馬來文 | Johor جوهر （爪夷文） | ||
| • 淡米爾文 | ஜொகூர் | ||
| |||
| 格言：「獻給真主阿拉」 "Kepada Allah Berserah" （馬來文） "To Allah We Surrender" （英文） | |||
| 頌歌：柔佛州歌 "Lagu Bangsa Johor" "Johor State Anthem" （柔佛州歌） | |||
 柔佛州 馬來西亞 | |||
| 首府 |  新山[a] | ||
| 皇城 |  麻坡 | ||
| 政府[1] | |||
| • 蘇丹 | 蘇丹依布拉欣·依斯邁 | ||
| • 州務大臣 | 哈斯尼莫哈末（國陣巫統） | ||
| 面積[2] | |||
| • 總計 | 19,102 平方公里（7,375 平方英里） | ||
| 人口（2018^e）[3] | |||
| • 總計 | 3,742,200（第3位） | ||
| • 密度 | 193.7/平方公里（502/平方英里） | ||
| 居民稱謂 | 柔佛人 | ||
| 人類發展指數 | |||
| • HDI（2017年） | 0.818 （極高）（第5位） | ||
| 時區 | MST（UTC+8） | ||
| 郵政編碼 | 79xxx－86xxx | ||
| 電話區號 | 07 06（麻坡同東甲） | ||
| ISO 3166碼 | MY-01 | ||
| 車牌 | J | ||
| 柔佛王國 | 1528年-1946年[4] | ||
| 英保護國 | 1904年-1946年 | ||
| 日佔時期 | 1942年1月31號 | ||
| 馬來亞聯邦 | 1946年 | ||
| 馬來亞聯合邦 | 1948年 | ||
| 馬來亞獨立 | 1957年8月31號 | ||
| 馬來西亞成立 | 1963年9月16號 | ||
| 英荷條約 | 1824年 | ||
| 柔佛條約 | 1855年3月10號[5] | ||
| 英柔條約 | 1885年 [4] | ||
| 柔佛憲法 | 1895年4月14號 [4] | ||
| 網站 | www | ||
| ^[a] 依斯幹達城係州行政中心所在地。 | |||
柔佛有高度多樣化嘅種族、語言同文化。柔佛傳統舞蹈雜賓舞聞名。柔佛最高統治者係柔佛蘇丹，政府首腦係柔佛州務大臣。政府系統大部分源自西敏制，柔佛被劃分做多個縣嚟管轄。根據1895年嘅《柔佛憲法》，伊斯蘭教係柔佛嘅官方宗教，而其他宗教可以自由發展[7]。由1914年開始，馬來語同英語都係柔佛嘅官方語言[8]。經濟方面，柔佛以第二產業同第三產業為主。
柔佛州現任蘇丹係蘇丹依布拉欣·依斯邁（已故蘇丹馬末·依斯幹達嘅大仔），喺2010年1月23號朝早10點21分，喺柔佛大王宮依據1895年《柔佛憲法》宣誓就任蘇丹。由2014年1月1號開始，柔佛州公定每星期休息改做星期五同星期六兩日，但係部分私人企業同學校仍然係星期六同星期日休息[9]。
.jpg)
柔佛呢笪地方最早嘅稱呼係嚟自北方泰族嘅Gangganu或者Ganggayu（即係指寶石之庫）[12][13][14]，係因為柔佛河附近有大量寶石[15][16]阿拉伯人商人則就，叫呢度做جَوْهَر（jauhar），[12][13][17]。呢個詞源自波斯語嘅گوهر（gauhar），即係指「珍貴嘅石頭」或者「寶石」[18]。由於jauhar呢個詞喺當地語言比較難發音，於是jauhar就逐漸變成咗Johor（柔佛）[19]。而爪哇史頌就叫呢度做Ujong Medini（陸地末端），係因為柔佛處於中南半島嘅最南端。根據葡萄牙作家Manuel Godinho de Erédia記載，馬哥孛羅曾經喺1292年航至Ujong Tanah（馬來半島末端，即係柔佛）[12]Ujong Medini同Ujong Tanah呢兩個稱呼喺馬六甲蘇丹王朝成立前就已經喺民間流傳。而喺呢段時期，柔佛仲有其他名，包括Galoh、Lenggiu同Wurawari[12][19]。
政府
柔佛係馬來西亞第一個實行君主立憲制嘅州屬，喺1895年由蘇丹阿布·峇卡頒佈《柔佛憲法》後開始實行至今[20][21]。憲法上，柔佛最高元首係蘇丹。佢嘅繼位者只可以係柔佛皇室嘅一員或者係蘇丹阿布巴卡嘅後代。現任柔佛蘇丹係蘇丹依布拉欣·依斯邁，佢喺2010年1月23號繼位[22]。蘇丹嘅主宮殿係武吉士林王宮，王儲嘅宮殿則係巴西柏蘭宜王宮；呢兩座宮殿都喺州首府。其他王宮有柔佛大皇宮（喺州首府）、麻坡嘅丹絨皇宮、居鑾嘅斯里南峇同埋昔加末嘅Shooting Box[23]。州政府由州務大臣領導，由州行政議會10名行政議員輔佐，而行政議員必須係柔佛州議員[24]。柔佛州立法部門係沿用西敏制嘅柔佛州立法議會，而州務大臣係喺州議會大多數議員同意下被委任。州立法議會為州入面事務制定法律。州議員由州民喺每5年舉行一次嘅大選中投票選出[25]。州議會有56個席位，其中39個喺2018年馬來西亞大選後由希望聯盟掌控[26]。
柔佛州喺1948年至1957年馬來亞聯邦成立前曾經係一個主權國家，但係佢嘅國防同外交事務由英國掌管[27]。其後，馬來亞聯邦同婆羅洲兩個英國殖民地——北婆羅洲同沙撈越合拼，成立馬來西亞聯邦。由嗰時開始，柔佛發生咗多個極具爭議性事件，例如多宗涉及皇室事件導致咗1993年馬來西亞憲法修正案嘅通過、同聯邦政府嘅爭端、以及相比對岸較富裕嘅新加坡，柔佛發展顯得極為緩慢嘅不滿，而柔佛皇室甚至發表咗「柔佛有權獨立」嘅言論[28][29]。其他社會事件仲包括柔佛喺加入聯邦後唔同種族同宗教之間關係升溫等[30][31]。
| 馬來文歌詞 | 中文歌詞 |
|---|---|
| Allah Peliharakan Sultan | 真主阿拉護佑吾君王 |
| Anugerahkan dia Segala Kehormatan | 賜福陛下尊崇無疆 |
| Sihat dan Ria, Kekal dan Makmur | 歡樂和康泰，安穩與榮昌 |
| Luaskan Kuasa, Menaungkan Kami | 擴展力量，庇護邦民 |
| Rakyat Dipimpini Berzaman Lagi | 引領州內子民再邁下個世紀 |
| Dengan Merdeka Bersatu Hati | 以獨立團結一致一心 |
| Allah Berkati Johor | 真主阿拉護佑柔佛 |
| Allah Selamatkan Sultan | 真主阿拉永佑吾蘇丹 |
柔佛州嘅土地面積有18,984平方千米，係馬來西亞面積排第五大嘅州。柔佛州最高嘅山坐落喺麻坡嘅金山（Gunung Ledang），高度有1,276.2米。
柔佛被分咗10個縣（Daerah）、103個巫金（Mukim）同16個地方政府，呢啲地方政府當中有2個市政廳、6個市議會、7個縣議會同埋1個地方特別機構[33][34]。每個縣都有縣官，而縣裏面每個村都會有一個村長[35][36][37]。英國人到達柔佛前，柔佛各區由蘇丹親戚同好友分別管理。1885年，柔佛王國同大英帝國締結友好條約，成立咗一個較有組織性嘅行政系統[38]。1914年，喺成為馬來屬邦一部分後，柔佛開始接受嚟自英國嘅顧問官[39]。喺轉換為英式行政系統過程中，更加多歐洲人開始陸續被委任為行政官員，職權由管理財政至為行政系統嘅現代化提供建議不等[40]。英國顧問官喺馬來地方長官輔助下進行各項工作[41]。喺馬來屬邦顧問官一職被廢除後，行政系統下原本由歐洲人掌管嘅職位亦畀當地人取代。同其他馬來西亞州屬一樣，地方政府開始由州政府管轄至今[42]。
柔佛州一共有10個縣屬（馬來話Daerah），包括：
| 縣 | 馬來名 | 總部 | 平方公里（km²） | 人口 |
| 新山 | Johor Bahru | 新山 | 1,817.8 | 1,278,000 |
| 麻坡 | Muar | 麻坡 | 2,346.12 | 328,695 |
| 峇株巴轄 | Batu Pahat | 峇株巴轄 | 1,878 | 335,368 |
| 居鑾 | Kluang | 居鑾 | 2,851.8 | 254,631 |
| 哥打丁宜 | Kota Tinggi | 哥打丁宜 | 3,488.7 | 192,220 |
| 昔加末 | Segamat | 昔加末 | 2,851.26 | 178,620 |
| 笨珍 | Pontian | 小笨珍 （Pontian Kechil） |
919.5 | 143,729 |
| 豐盛港 | Mersing | 豐盛港 | 2,838.6 | 67,557 |
| 古來 | Kulai | 古來 | 753.75 | 245,294 |
| 東甲 | Tangkak | 東甲 | 970.24 | 131,890 |
.jpg)
柔佛州面積有19,102平方公里，係馬來西亞面積第五大嘅州屬，東臨南中國海，西瀕馬六甲海峽，南面柔佛海峽。柔佛州海岸線總長度大約係400公里[43]，海岸線大部分位置，特別係西海岸，畀紅樹林同水椰林覆蓋[44][45][46]。東海岸以沙灘同岬角為主，[47]南海岸就由各種岬角同海灣組成。[46]。柔佛州嘅專屬經濟區喺南中國海範圍比起喺馬六甲海峽範圍大好多[48]。柔佛西部有大片沼澤[49]。喺2005年，官方記錄顯示柔佛森林佔地391,499,002公頃（967,415,102英畝），其中包含天然內陸森林、泥炭沼澤森林、紅樹林同埋泥沼地[50]。蒂迪旺沙山脈嘅山麓延伸至柔佛，柔佛州最高點——高達1276米嘅金山，屬於嗰個山脈[51]。柔佛州入面仲有其他10座山，高度介乎273米至1,010米之間[52]。柔佛嘅地形有83%屬於平原，只有大約17%係較高且陡地形[50]。柔佛主要島嶼有澳島、龜咯島、幸福島、拉哇島等。
柔佛中部畀茂密森林覆蓋，發源自山丘密集河流往東、南、西三個方向流去[53]。喺西海岸，峇株巴轄河、麻坡河同笨珍河流去馬六甲海峽，而柔佛河、馬來河、Sg. Perepat、埔來河、士姑來河同地不佬河就流向南面嘅柔佛海峽。興樓河、豐盛港河、大素里里河同小素里里河流去東面嘅南中國海[50]。柔佛河流域達2,690 公里，由布魯木山（居鑾東部）同Gemuruh山開始，往下流至丹戎彭利哥[54]。柔佛河自身就由自拉央拉央、林桂同沙翁嘅河流匯集而成，長度約122.7 公里。佢嘅支流包括Berangan River、勒巴河、勒班河、Panti River、Pengeli River、Permandi River、士蘆育河、斯瑪那河、Telor River、Tembioh River同地南河[54]。喺柔佛境內其他河流仲包括Ayer Baloi河、文律河、Botak Drainage、任羅宏河、大笨珍河、Sanglang河、善地河同埋沙朗布阿亞河[55]。
- 柔佛風景
金山
拉哇島海灘
油棕園嘅日出
布魯木山瀑布
天氣
柔佛屬於赤道多雨氣候，每年11月至第二年2月都會受嚟自南中國海嘅季候風影響，所以呢段時間之間成日受季風雨影響。全年平均氣溫介乎25.5 °C到27.8 °C之間。西海岸平均降雨量為2,000至2,500毫米，而東海岸平均降雨量相對較高，其中興樓同邊佳蘭一年內降雨量超過3,400毫米。柔佛每年都會經歷兩次季候風期，即係東北季候風同西南季風。東北季候風由11月開始持續至下年3月，而西南季候風史5月開始持續至9月，4月至9月係兩個季候風過渡期[50]。
柔佛州有個熱帶嘅氣候，年均嘅降雨量有1,778毫米，而平均溫度有大概25.5 °C（78 °F）－ 27.8 °C（82 °F）。濕度有82%到86%咁高。
由2006年12月17號，柔佛州同鄰近嘅州由中國南海嘅季風吹向馬來半島嘅地區[56]，就喺幾日之間不停噉落雨，柔佛州好多地方遭受到水災。去到20號，柔佛州有28,000人受水災影響而要疏散[57]。水災最嚴重嗰時，當地嘅統計報道有大概90,000人由佢哋嘅屋疏散到水災救濟中心[58][59]。喺呢個時候，好多間學校[60]同埋公共場所[61]都用咗嚟做水災救濟中心[62]。截至12月28號，呢場水災造成嘅十人死亡[63]。
2006年12月19號，柔佛州發生咗一場百年大水災，幾乎各個大城市都引發水患。其中昔加末、麻坡、哥打丁宜水患問題最嚴重，大約有七萬幾災民被疏散。多處水深達十幾尺。好多地方水電供應都被切斷，交通幾近癱瘓。連綿細雨更加劇咗水災情況，造成好多財務損失同設施破壞。由於柔佛喺巽他板塊，附近印尼蘇門答臘發生地震時成日都有震感[64]。
柔佛州又喺2007年1月12號遭受季風雨，又再令州區好多地方遭受水災，其中浸得最勁嘅地方係哥打丁宜同埋昔加末[65]。水災最嚴重嗰時，有104,000人被送去水災救濟中心[66]。到1月16號，天氣又好轉，難民就開始返屋企[67]，但同水災有關嘅疾病爆發同其他因素令死亡人數升到1月14號嘅15個人[68]。
| 年份 | 人口 | ±% |
|---|---|---|
| 1980 | 1,638,229 | — |
| 1991 | 2,162,357 | +32.0% |
| 2000 | 2,740,625 | +26.7% |
| 2010 | 3,348,283 | +22.2% |
| 2019 | 3,764,300 | +12.4% |
| Source: CityPopulation.de[69] | ||
根據2017年馬來西亞人口普查，柔佛人口有3,697,000人，係馬來西亞各州排名第三，其中有352,500人係非公民。[3]馬來西亞公民方面，1,996,667人（59.7%）係馬來人、1,093,651人（32.7%）係華人、234,115人（7.0%）係印度人、20,067人（0.6%）係其他土著[3]。2010年嘅人口普查方面，柔佛人口達3,230,440人，其中1,698,472人（52.0%）係馬來人、997,590人（30.0%）係華人、209,260人（6.0%）係印度人、49,773人（1.0%）係其他土著[70]。就算柔佛種族多樣化，多數柔佛人亦自稱「Bangsa Johor」（柔佛子民），呢個稱呼亦獲得柔佛皇室響應，以團結州入面各民族[71]。
柔佛州係馬來西亞人口密度最低地方之一，而人口分佈唔平均情況喺呢度相對明顯。柔佛大多數人口集中喺沿海地區。1991年至2000年，柔佛年均人口自然增長率達2.39%，其中新山縣最高，達4.59%；昔加末縣最低，只有0.07%[72]。隨住柔佛南部住宅區不斷發展，柔佛總人口每隔10年大約就增加大約600,000人，以呢種情況持續落去嘅話，柔佛人口喺2030年將會達到560萬人，比政府預計嘅400萬人高[73]。喺馬來半島南部嘅地理位置促進咗柔佛作為馬來西亞嘅交通同工業中心急速發展、創造好多就業機會，吸引咗好多嚟自其他州屬同海外，尤其係印尼、菲律賓、越南、緬甸、孟加拉、印度、巴基斯坦同中國嘅移民同埋勞工。截至2010年，喺柔佛、沙巴同雪蘭莪做嘢嘅外籍勞工佔咗馬來西亞外籍勞工總數三分之二[74]。
唐人之中，福建人多數住喺麻坡，峇株巴轄同埋昔加末；客家人多數係喺居鑾、古來同埋新山；廣東人多數住喺丰盛港同埋哥打丁宜；潮州人多數住喺新山、笨珍同埋麻坡；瓊籍人多數住喺新山。
宗教
根據2010年馬來西亞人口普查，柔佛各個宗教信仰中，穆斯林佔咗58.2%、佛教徒佔咗29.6%、印度教徒佔咗6.6%、基督徒佔咗3.3%。另外，1.2%係其他宗教信徒或者宗教信仰未明、0.8%信奉道教或者中國民間信仰、無信仰者佔0.3%[75]。呢個人口普查顯示，柔佛嘅華人人口當中，89.8%係佛教徒、6.8%係基督徒、2.1%人信奉中國民間信仰同埋0.4%係穆斯林。而印度人大多數係印度教徒，佔87.9%，其他信仰有基督教（4.05%）、伊斯蘭教（3.83%）同佛教（3.05%）。非馬來西亞土著當中，42.3%係基督徒、25.3%係穆斯林、13.7%係佛教徒。作為柔佛最大嘅族群，幾乎全部馬來人都係穆斯林[75]。
語言
多數柔佛人至少可以使用馬來語同英語。有啲柔佛人仲識講漢語或者泰米爾語。
柔佛境內絕大多數馬來人使用一種叫做柔佛馬來語嘅方言，呢種方言亦叫做柔佛-廖內語，源自柔佛、廖內、馬六甲、雪蘭莪同新加坡，係標準馬拉話同印尼語嘅標準腔[76]。由於柔佛喺海洋東南亞多個貿易路線嘅交匯處，曾經係一個強大嘅王國，柔佛馬來語由15世紀開始就成為咗呢個地區嘅通用語[77]。
除咗華語之外，柔佛州嘅華人社區亦使用多種唔同漢語方言，包括福建話（多個地區）、潮州話（新山地區為主）、客家語（古來地區為主），而有較少人使用嘅福州話（永平地區為主）、廣東話同海南話。受新加坡講華語運動影響，柔佛只有好少後生華人仲可以流利咁使用方言，而呢個情況喺城市地區比較明顯。州入面嘅印度人社區大多數人都使用泰米爾語。由於大馬年輕人英文水平不斷下降，2017年，作為馬來西亞英語教學協會（MELTA）嘅皇室贊助人嘅柔佛王後呼籲各界關注呢個現象，並提供一個更加好嘅環境畀大馬後生一代能夠更有效咁學英文[78][79]。
柔佛州經濟以服務業為主。以前，柔佛主要以第二產業為主，但係自從州政府實行經濟多元化之後，柔佛唔再依賴一個產業。柔佛州公司（JCorp）係一間國有企業集團，喺國內外從事各種商業活動。拿督斯里·穆罕默德·哈立德·諾丁（Datuk Seri Mohamed Khaled Nordin）Menteri Besar話，柔佛係「第二吉隆坡」，同埋由於地理位置優越，所以有信心成為投資者嘅選擇[81]。柔佛繼續係本地同外國投資者嘅選擇，由2014年1月至2014年5月，工業投資總額達149億令吉[82]。柔佛將會喺未來幾年內獲得依斯干達馬來西亞投資公司（Iskandar Malaysia Investment）參與涉及幾十億令吉發展項目投資。
除咗巴生谷地區之外，柔佛州已經成為國家增長動力嘅主要貢獻者之一。柔佛州擁有現代化港口同良好基礎設施，擁有龐大嘅中產階級，同埋具有多元化社會融合。州政府決心令到柔佛州成為馬國增長最快嘅經濟中心。
2017年，柔佛州嘅國內生產總值（GDP）係1,044億令吉，僅次於雪蘭莪同沙撈越成為馬來西亞第三大州屬，中位數收入係5,652令吉，失業率係3.6％。早一年，柔佛州經濟增長率係5.7％，佔馬來西亞GDP 9.4％，人均GDP係31,952令吉，勞動力總數係16.39萬人。柔佛州2015年GDP貢獻最大嘅主要行業係服務業（41.0％）、製造業（30.7％）、農業（14.9％）、建築業（5.8％）同採礦業（0.4％）。
Iskandar開發區同南柔佛經濟區（馬來西亞Iskandar）包括新山市中心、Iskandar Puteri、Kulai區、Pasir Gudang同South Pontian係呢個州主要開發區，面積係221,634公頃（2,216.34平方千米）。南柔佛主要專注貿易同服務；柔佛州西部專注現代製造業、商業同農業；柔佛州東部主要發展生態旅遊；柔佛中部主要係發展第一產業同生態旅遊。
醫療旅遊亦發展蓬勃，2012年有27,500名醫療遊客嚟，2014年有33,700名醫療遊客[83]。
呢個州主要農業活動係油棕種植園、橡膠種植園同種各類農產品[34] 。2015年，柔佛州用喺農業嘅土地面積達11,555平方公里（4461平方英里），佔全州60.15％，其他種植包括香草同香料。2016年，油棕種植園面積係7,456平方公里（2,879平方米）（佔州總土地面積38.8％），係馬來西亞第三大種植園，僅次於沙巴同沙撈越[84]。農民市場（pasar peladang）用嚟分配州入面各地嘅農產品[85]。
柔佛州係馬來西亞最大生果種植州，總種植面積有414平方公里（160平方英里），總收穫面積有305平方公里（118平方英里）。2016年種咗大約532,249噸水果，其中Segamat District係呢個州最大生果種植區。同年，柔佛州係馬來西亞所有州中僅次於彭亨州第二大蔬菜生產州，種植面積有154平方公里（59平方米），收成區有143平方公里（55平方米）。Kluang區亦係最大嘅蔬菜種植同收割區域，面積有36平方公里（14平方米），蔬菜總產量最高可以去到60,102噸。
由於柔佛州靠近新加坡，一個金融同國際貿易中心，呢個州可以由新加坡投資者同遊客中受益[29][86][87]由1990年到1992年，新加坡喺柔佛州嘅投資大約5億美元，272個項目[88]。1994年，新加坡投資額幾乎佔柔佛州總外國投資總額40％。呢個州仲採取咗「同新加坡結盟」嘅政策嚟促進工業發展，呢個發展增加咗人員同貨物之間流動[89][90][91]。兩者之間嘅緊密經濟聯繫開始咗「印尼-馬來西亞-新加坡增長三角」（SIJORI Growth Triangle）喺1989年嘅成立[92]。
2014年，喺柔佛州投資嘅主要外國國家包括新加坡（67億令吉）、美國（54億令吉）、日本（46億令吉）、荷蘭（31億令吉）、中國（13.7億令吉），小額投資有印尼、南韓、德國同印度等，呢個州收到價值79億令吉嘅外商直接投資（FDI），僅次於沙撈越，喺馬來西亞所有州中排名第二[93]。州入面主要FDI外國公司嚟自英國、南韓同中國[94]。
公路
.jpg)
公路係柔佛人民最常用嘅陸路交通。州入面起咗各大大小小嘅公路，同時仲起咗多條聯邦公路同州轄公路，例如南北大道、巴西古當大道、新山東部疏散大道同迪沙魯大道等收費同免收費高速公路。
柔佛新山南岸亦有新柔長堤同馬新第二通道連接柔佛同新加坡兩地。銜接新山市區蘇丹伊斯幹達大廈嘅新柔長堤全長1,038米，由英國殖民政府為方便前往新加坡而喺1909年起，喺1923年完工。而喺柔佛西南部馬來西亞伊斯幹達經濟特區嘅馬新第二通道全長1,920米，喺1997年10月完工，銜接柔佛州振林山同新加坡大士。馬新第二通道唔單止緩解新柔長堤交通擠塞問題，同時亦令到柔佛西南部同新加坡之間嘅交通變得更加方便。
由於柔佛州入面公共交通系統唔係太完善，大多數柔佛人普遍鍾意自己揸車。州入面巴士主要喺市區、人口集中嘅住宅區同主要遊客區行駛，導致一啲住喺偏遠地區嘅人唔可以享用公共交通服務。另外，州入面巴士唔似得吉隆坡、檳城、關丹咁由大型公司管理，柔佛州巴士主要由小型私人公司負責，公交設施例如巴士站同巴士本身都存在安全同失修問題，所以搭巴士嘅乘客多數係老人家、學生、外勞同埋遊客。另外，柔佛州亦有的士、Grab等出租車服務。但係一部分傳統的士司機唔肯用收費表而擅自收費，間接導致年輕人偏向乘搭價錢較平而有定價收費嘅手機召車服務，例如Grab。
機場
柔佛州入面古來縣有士乃國際機場（國際機場代號：JHB），係馬來西亞南部主要國內同國際交通中樞，亦係亞洲航空區域航空樞紐。呢幾年嚟，士乃國際機場逐漸開放更加多國際航班以吸引更加多遊客嚟柔佛州旅遊，國際線包括廣州、雅加達、泗水、龍目島、胡志明市、曼谷等地，呢個機場2017年載客量首次突破300萬人次。
內陸碼頭
柔佛州唯一內陸碼頭喺昔加末縣，係柔佛州北部一個商業碼頭。呢個碼頭提供服務包括鐵路、海運同空運集裝箱、港口清關保稅同理非保稅倉儲等。呢個碼頭曾經喺2006年12月開始無限期關閉，之後喺2013年4月重新啟用，以期帶動柔北工商業發展。
海港
柔佛一共有四個港口，全部喺依斯幹達公主城或者巴西古當，分屬3個唔同公司管理。丹戎帕拉帕斯港係馬來西亞聯邦貨櫃港一部分，[95]而另外兩個貨櫃港就同樣喺丹絨帕拉帕斯嘅綜合集裝箱終站同喺巴西古當嘅柔佛港[96][97]。丹絨浪沙港口係呢一個區域嘅石油同天然氣中心，支援近海石油產業嘅開發同生產活動[98][99]。另外，柔佛部分碼頭亦有提供去印尼巴淡島、民丹島嘅丹戎檳榔同埋新加坡樟宜碼頭嘅船運服務[100][101]。
鐵路
馬來亞鐵道公司經營嘅西海岸鐵路線由馬泰邊界玻璃市州嘅巴東勿剎站一直延續到新加坡站，途經新柔長堤，喺1909年通車。2011年7月，新加坡政府將丹戎巴葛火車總站移至兀蘭火車總站。
馬來西亞前首相納吉阿都拉薩政府提出嘅新柔捷運系統計劃喺2024年取代現有馬來亞鐵道接駁火車服務，銜接計劃緊嘅隆新高鐵。但喺2018年第14屆馬來西亞下議院選舉後，馬哈迪政府以國庫身負巨債為由宣佈暫停隆新高鐵計劃，但係新柔捷運計劃因效益大而得以保留。新柔捷運落成後將惠及喺新加坡返工但住喺新山嘅馬來西亞人，減緩新柔長堤每日嘅擠塞問題。根據非官方統計，每日往返兩地人數保守估計大約有30萬人左右。
柔佛州仲有好多島。有啲島適合浮潛、游水、釣魚、水上運動等娛樂項目，旅客較稀少嘅島嶼更加適合觀賞日出日落，放鬆身心。柔佛離岸島嶼係馬國人甚至係外國旅客鍾意嘅度假聖地。
新山
- 拿督賽阿都卡迪爾－柔佛州
- 黃亞福：馬來西亞早期華人移民，係柔佛大皇宮嘅建築師同商業師[103][104][105]，承包工程包括1892年12月完工的泰瑟爾皇宮[106]。
- 郭鶴年：馬來西亞企業家同首富，有「亞洲糖王」稱呼[107]。
- 楊秀惠：2003年馬來西亞華裔小姐競選冠軍、香港無綫電視藝員[108] 。
- 陳徽崇：馬來西亞音樂家、藝術家、教育家，有「大馬華人音樂教父」稱呼。2008年，馬來西亞團結、文化、藝術及文物部宣佈將佢列為「國寶級文化遺產在世人物」；馬來西亞國家文物遺產「廿四節令鼓」創辦人之一，2008年7月27號因為癌細胞擴散，喺屋企病死，終年61歲[109]。
- 陳再藩：馬來西亞作家、文化人，筆名小曼。馬來西亞國家文物遺產「廿四節令鼓」創辦人之一。2018年獲國家文化部列為國家級文化人物，係繼陳徽崇後第二為獲頒此獎的大馬華人[109]。
- 張詒博：2010年Astro新秀大賽冠軍，2010年TVB全球華人新秀歌唱大賽亞軍[110]。
- 戴祖雄（Hero）：演員、模特兒同電視節目主持人，旅台發展藝人[111]。
- 李幸倪：第四季中國好聲音學員，依家喺香港發展[112]。
- 姚新光：馬來西亞相聲之父，中國相聲國寶馬季弟子，喺2004年病死[113]。
- 朱主愛：藝名「四葉草」，馬來西亞華語創作歌手[114]。
- 黃勁達：出身新山嘅網絡紅人
- 蔡卓宜：馬來西亞女歌手、演員。2020年因為參加中國大陸選秀節目《青春有你》第二季而好快紅咗。
居鑾
麻坡
- 拿督賽阿都卡迪爾－柔佛州第8任州務大臣（1952/02/20 - 1955/06/05）
- 拿督旺依德利斯－柔佛州第9任州務大臣（1955/10/01 - 1959/06/16）
- 丹斯里哈山·尤諾斯－柔佛州第10任州務大臣（1959/06/27 - 1967/01/31）
- 丹斯里奧斯曼·沙阿－柔佛州第11任州務大臣（1967/02/01 - 1982/04/29）
- 丹斯里慕尤丁－柔佛州第13任州務大臣（1986/08/12 - 1995/05/03）、馬來西亞第10任副首相（2009/04/10 - 2015/07/28）、馬來西亞第8任首相（2020/03/01 -至依家）
- 拿督斯里卡立諾丁－柔佛州第15任州務大臣（2013/05/08 - 2018/05/02）
- 拿督沙魯丁嘉瑪－柔佛州第17任州務大臣（2019/04/14 - ）
- 敦阿旺·哈山－檳城州第5任州元首
- 敦蘇萊曼·尼南沙－前國會上議院副議長、巫統大會主席(1978-2003)
- 黃明志網絡歌手、音樂人、導演、YouTuber、制作人，有音樂創作鬼才稱呼。
- 拿督梁維泮－前馬來西亞房屋及地方政府部長、前馬華副總會長、馬華代總會長
- 拿督蔡銳明－前馬來西亞衛生部長、前馬華副總會長、前人民公正黨副主席
- 敦法蒂瑪·哈欣醫生－前馬來西亞社會福利部部長、新聞及廣播部部長、前巫統婦女組主席，亦係馬來西亞第一位女性部長
- 雅絲敏·阿莫－導演同製作人
- 郭清江 — 《星洲日報》總編輯
- 許國偉 — 《南洋商報》新聞編輯、前988電台主持人、時事評論員
- 李萬千 — 時事評論員、前左翼運動之星、華教鬥士
- 拿督蔡兆源－馬來西亞經濟學家、商人，馬來西亞同新加坡Burger King嘅擁有者。
- 張鍾霖 — 馬來西亞國營電視台TV2華語新聞主播、制作人
- 莊文傑 — AstroAEC頻道－華語新聞主播
- 娜娜·馬哈贊 — XFM電台主持人、電視節目主持人、演員、歌手
- 蔡沁凱 — 新傳媒八頻道《獅城有約》主持人兼製作人
- 葉錦福－前國家羽球隊隊員，同謝順吉搭檔，多次攞到國際羽球賽事冠、亞軍，包括1996年為馬來西亞攞到奧運史上第一枚銀牌
- 淩霄－歌手、演員，已經移民新加坡
- 陳美光－歌手、演員，早年移居去新加坡
- 何蔚庭－旅居台灣嘅電影導演，2005年憑短片《呼吸》攞到康城影展國際影評人周兩個獎，亦憑長片《台北星期天》攞到2010年金馬獎最佳新導演
- 範俊福－唱片製作人、詞曲作者，係馬來西亞第一位將本地福建歌曲創作同歌手帶去台灣發片嘅音樂人
- 顏慧萍－2011年Astro新秀大賽攞到冠軍，第一屆華人星光大道第五名。
- 蔡佩璇－馬來西亞演員
峇株巴轄
- 林吉祥（馬來西亞民主行動黨領袖，自稱係馬來西亞民主改革之父）
- 林冠英（檳城第四任首席部長、前馬來西亞財政部長。現任民主行動黨秘書長，身兼峇眼國會議員、檳城州議會阿逸布爹州議員）
- 潘儉偉（馬來西亞雪蘭莪州白沙羅行動黨國會議員，亦係民主行動黨全國宣傳秘書，亦曾經擔任雪蘭莪州民主行動黨主席，依家喺馬來西亞財政部擔任特別官員一職）
- 張念群（現任柔佛州古來國會議員、民主行動黨國際秘書、希望聯盟柔佛州婦女署理主席）
- 蔡細歷（曾經擔任第9任馬來西亞華人公會總會長、馬華峇株吧轄區會主席。1990年開始出任柔佛州行政議員，2004年至2008年任馬來西亞衛生部長）
- 蔡智勇（前馬來西亞國際貿易及工業部副部長，曾經係柔佛州拉美士國會議員，亦係馬來西亞華人公會嘅副總會長）
- 依斯邁巴卡（馬來西亞第14任政府首席秘書）
- 諾萊妮（巫統黨員，由2008年馬來西亞大選以嚟代表國民陣線當選為柔佛巴力士隆嘅國會議員）
- 尤長靖（馬來西亞華語男歌手，香蕉娛樂旗下藝人，喺南京藝術學院畢業，本科流行音樂演唱專業）
- 陳慧恬（馬來西亞女歌手、主持、演員）
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
