From Wikipedia, the free encyclopedia
戰列艦，戰鬥艦（英文：Battleship），係裝有厚裝甲同大口徑艦炮嘅大型軍艦，係人類創造嘅最龐大同復雜嘅武器系統之一。從19世紀末到第二次世界大戰，戰列艦作為海軍入面最大嘅武裝艦艇，曾經係一個國家海軍力量嘅標誌，因此經常被稱為主力艦（Capital ship）。後來，隨著航空母艦同制導武器嘅興起，戰列艦已唔再被認為係建立海上優勢所必須嘅裝備，因此已經全部退役。
 |
戰列艦呢個名詞來源於風帆戰鬥艦（line-of-battle ship）由17世紀中葉到19世紀中葉，主要排成戰列線進行戰鬥嘅大型軍艦[1]。隨著蒸汽機、高爆彈同鋼鐵裝甲嘅發展，19世紀後期出現咗稱為鐵甲艦（Ironclads）嘅蒸汽動力裝甲戰艦，即係後來嘅戰列艦同裝甲巡洋艦嘅前身。1906年服役嘅英國海軍無畏號（HMS Dreadnought）標誌著「巨艦大炮時代」嘅開始。後來所有按無畏號嘅概念設計嘅戰列艦都被稱為無畏艦，而之前設計嘅戰列艦就稱為前無畏艦。冇幾耐之後，出現咗強大過無畏艦嘅巨型戰列艦「超無畏艦」。
海軍大國爭相建造戰列艦，引起咗長期嘅軍備競賽。 第一次世界大戰裡面嘅日德蘭海戰，係史上規模最大嘅戰列艦海戰。戰後，各個海軍大國通過《限制海軍軍備條約》對締約國戰列艦嘅數量同性能作出限制。條約生效期間被稱為「海軍假日」。條約失咗效之後，出現咗最後一波建造戰列艦嘅熱潮，出現咗排水量超過60,000噸嘅巨艦。不過，雖然係恁，但係戰列艦嘅價值一路都受到質疑。魚雷、潛艇同飛機嘅造價低過戰列艦好多，但係都能夠對戰列艦造成嚴重傷害。 第二次世界大戰期間，航空母艦逐漸取代咗戰列艦，成為海戰嘅主導力量。戰後，生還嘅戰列艦紛紛走上退役嘅道路，而剩返嘅建造計劃亦都被人取消咗。只有美國海軍曾經喺幾次戰爭入面重新將幾部戰列艦投入使用。美國嘅最後兩部戰列艦威斯康星號同密蘇里號分別喺1991年同1992年退役，並分別喺2006年同1995年被海軍除籍。
風帆戰列艦係一種大型嘅木質帆船，其主要武器，即射程同精度都有限嘅火砲，主要安裝於低層甲板，與龍骨成直角，通過舷側炮眼向外開火。 風向對佢嘅戰鬥性能有非常大嘅影響，喺戰鬥中，軍艦之間嘅通信亦由於噪音同煙霧嘅影響而相當困難[2]。呢啲條件同戰爭實踐喺17世紀中葉產生嘅結論係喺戰鬥中，軍艦必須始終排成縱列，喺通過敵艦附近時側舷齊射。強大到足以列於呢條戰列線中嘅軍艦就稱為戰列艦，[3]風帆戰列艦有兩層或三層火砲甲板，裝有50門以上門甚至上百門各種口徑嘅火砲。最常見嘅係裝有74門火砲嘅船型。典型嘅74門砲風帆戰列艦排水量達1630噸，長52米，寬14米，食水7米，有700名船員。19世紀上半葉，蒸汽機同螺旋槳亦被應用於風帆戰列艦，1850年下水嘅法國海軍拿破崙號（Le Napoléon）係世界上第一艘使用蒸汽動力嘅戰列艦，同時亦保留咗風帆[4]。1860年代開始，風帆戰列艦俾鐵甲艦所代替。
風帆戰列艦係風帆時代海軍嘅主力艦，1800年，各海軍大國風帆戰列艦總噸位為英國33.0萬噸，西班牙17.6萬噸，法國13.6萬噸，沙俄14.5萬噸[5]。 特拉法爾加海戰中英國皇家海軍指揮官納爾遜嘅旗艦勝利號（HMS Victory）係唯一保存至今嘅風帆戰列艦。
鐵甲艦逐漸取代風帆戰艦，係基於19世紀中葉後科學技術同造船工業嘅快速發展。比起風帆戰列艦，鐵甲艦擁有三個主要特徵：包覆裝甲嘅艦殼，蒸汽動力系統同發射爆破彈嘅火砲。海戰中出現嘅第一批鐵甲艦係1853年至1856年克里米亞戰爭中法國砲擊金伯恩（Kinburn）時使用嘅淺水砲艦（Floating Batters）[6]。
爆破彈對於木質船體係巨大嘅威脅。1841年，呢種武器喺傳入法國同美國後立刻成為戰列艦嘅標準裝備[7]。喺克里米亞戰爭中，6艘俄羅斯帝國風帆戰列艦同兩艘三桅砲艦（Frigate）用爆破彈摧毀咗奧斯曼土耳其嘅7艘三 桅戰艦同3艘平甲板砲艦（Corvette），[8]砲擊金伯恩時法軍亦使用咗類似嘅武器[9]。
然而木質軍艦唔容易被實心彈擊沉。喺1866年利薩海戰（Battle of Lissa）中，奧地利帝國嘅皇帝號（Kaiser）無裝甲風帆戰列艦穿過混亂嘅戰場，衝撞一艘意大利鐵甲艦。同 時被意大利鐵甲艦擊中80次，[10]其中大多係實心彈，[11]但至少一發係300磅砲彈。儘管失去咗前桅同船首斜桅並起火，呢艘戰艦仲係非常快做好咗再次參戰嘅準備[12]。
爆破彈喺克里米亞戰爭中顯示咗威力之後，裝甲成咗軍艦嘅必須裝備，1859年，法國建成咗第一艘大型鐵甲艦光榮號（Gloire） ，排水量 5,630 噸，航速13節，船體包覆有110到119毫米厚嘅裝甲。 1861年，英國亦建成咗第一艘鐵甲艦勇士號（HMS Warrior），排水量達9,358噸。木質艦殼外包覆有102毫米厚嘅裝甲，最大航速達到14.5節。呢兩艘鐵甲艦嘅火砲與風帆戰列艦一樣向側舷發射。
1862年3月9號，漢普敦海戰發生於美國南北戰爭期間，係第一次近代意義嘅海上砲戰。雙方為率先採用密閉迴旋砲塔嘅北方聯邦莫尼特號（USS Monitor），與南方邦聯嘅弗吉尼亞號（CSS Virginia）。
1870年，單脹式發動機喺軍艦上應用。 1873年服役嘅英國蹂躪號（HMS Devastation）乃史上第一艘唔用風帆，完全蒸汽動力嘅主力軍艦，排水量達9180噸。 1885年，三脹式發動機喺軍艦上應用。 1860年代到1890年代，英國皇家海軍一直使用火管鍋爐產生蒸汽（將熱管道穿過密閉水容器），1890年後開始使用蒸汽壓強更高嘅水管鍋爐（加熱裝水管道），燃料係煤。
1870年代，蒸汽裝甲戰艦已有相當發展。除咗提供推進動力，蒸汽機仲能操縱方向舵、錨泊、轉動裝甲、裝填彈藥、抽水同升降艦載小艇等。大型蒸汽裝甲戰艦嘅排水量有8,000-9,000噸，蒸汽機功率有6,000-8,000馬力。裝甲砲塔能360度旋轉，裝喺主甲板中央軸線上或艦體兩側，並普遍採用螺旋膛線，增強攻擊威力。
清朝北洋水師嘅定遠號、鎮遠號即係此類。
1892年，英國建成世界首先嘅全鋼質戰艦君主號（HMS Royal Sovereign），其將主砲塔設置於中軸線上，亦喺風氣之先，各國隨後仿照。此後，戰艦普遍以鋼質艦體，螺旋膛線嘅主砲可達300-350毫米口徑，防護裝甲可達230-450毫米厚，滿載排水量可達12,000噸，航速可達16-18節。火力、裝甲防護力、航速同排水量，乃各國公認嘅戰艦四大要素。英國、法國、德國、美國、日本、意大利、俄國、奧匈帝國、奧斯曼帝國等，紛紛建造或進口大批戰艦。
此時，戰艦大多裝設兩種口徑嘅主砲。大主砲喺中軸線上，對抗敵方主力艦。小主砲喺兩側，對抗巡洋艦及輕型軍艦。動力多為往復式蒸汽機。直到1906年。
1906年，英國建成一艘全新嘅戰艦無畏號（HMS Dreadnaught），但類似概念喺之前已見雛型。
無畏號採用同一口徑嘅大型火砲，同高功率嘅蒸汽輪機，排水量18,110噸，最高航速21節。各國海軍學習模仿並加快競爭。如，德國嘅拿騷級、美國嘅南卡羅來納級。英國同德國並展開大規模嘅海軍軍備競賽。 1914年一戰爆發前，此類戰艦喺英國已有73艘，德國52艘。包括裝甲稍弱，但航速航程較大嘅戰鬥巡洋艦。佢哋被統稱為“無畏艦”。其基本特徵為：主砲統一口徑（通常11-13.5英寸），主砲塔設喺艦艏同艦艉，並於艦舯交錯佈置。動力為蒸汽輪機，排水量常超過20,000噸，速度超過18節。
一戰中嘅1916年，英德兩國發生日德蘭海戰，乃史上規模最大嘅海戰之一。主要海權國家採取其中教訓，改進無畏艦嘅設計。自此又稱“後日德蘭型戰列艦”（Post-Jutland Battleship）。其主要改進包括：增大主砲口徑；加厚砲塔、火藥庫等重點部位嘅防護裝甲，同時減少次要部位者；艦內劃分多層隔艙，以加強水中防護；加強水平防護；增大蒸汽輪機功率等。
1918年，一戰以同盟國嘅失敗告終。此時，各國嘅大型戰艦即已唔合時宜，而且其建造同維護費用極為高昂。
1922年，五大海軍強國舉行華盛頓會議。美國、英國、日本、法國同意大利簽訂《限制海軍軍備條約》（即華盛頓海軍條約），限制主力艦（戰艦與戰鬥巡洋艦）嘅噸位（35,000噸以下）、主砲口徑（16英寸以下），同主力艦嘅噸位比例（10:10:6:3.5:3.5）。1930年再以《限制同削減海軍軍備條約》（即倫敦海軍條約）補充規定。華盛頓海軍條約到1936年期滿，呢幾近15年間，各國皆停止新建大型戰艦，轉而改造已有嘅戰艦。因此被稱為“海軍假日”時代（Navy Holiday）。
凡爾賽條約於1920年生效，規定德國戰艦排水量必須低於10,000噸，主砲口徑低於280毫米。德國遂改而建造重量較輕、裝甲較薄、火力同機動力較強嘅戰艦，稱之為裝甲艦（Panzerschiffe)。前後共三艘。英語國家稱為袖珍戰艦（Pocket Battleship）。其船體以焊接而非鉚接來減輕重量，並採用新型柴油機取代蒸汽輪機，續航力增加且最高航速達28節。 希特勒於1934年掌權後，德國唔再遵守凡爾賽條約，重新建造大型戰艦，該級艦改稱巡洋艦。
排水量喺25,000噸以上者，另稱為「超級無畏艦」（Super-Dreadnaught），喺日本叫做「超弩級戰艦」。諸如，英國嘅獵戶座級戰列艦同伊利沙伯女王級戰列艦、德國嘅巴伐利亞級戰列艦、美國嘅內華達級戰列艦、日本嘅扶桑級戰列艦 。
1936年12月31號，華盛頓海軍條約期滿作廢，各強國重新建造戰艦。英國建成5艘英王喬治五世級戰列艦同1艘前衛號戰列艦。美國建成2艘北卡羅來納級戰列艦、4艘南達科他級戰列艦，同4艘衣阿華級戰列艦。日本建成2艘大和級戰列艦。德國建成2艘俾斯麥級戰列艦。法國、意大利亦係噉。呢個時期嘅戰艦大多為15-16英寸主砲，速度可達27節，甚至30節。
然而喺二戰中，航空母艦同潛艇至係海戰嘅主要艦種，戰艦逐漸淪為次等角色。大西洋戰場上，英國海軍大規模圍剿德國嘅2艘俾斯麥級戰列艦（俾斯麥號同鐵必茲號戰艦）。諾曼第戰役中，英國同美國嘅舊戰艦用於炮轟岸上目標。其餘時間，戰艦主要用於護航任務。太平洋戰場上，美國8艘舊式嘅慢速戰艦喺珍珠港事件受損。6艘修理後用於轟擊岸上目標，新建嘅高速戰艦就用嚟航空母艦戰鬥群嘅防空警戒。1944年，美國6艘戰艦參與萊特灣海戰嘅蘇里高海峽，擊沉日本山城號戰艦。此為史上最後嘅戰艦砲戰。1945年上半年嘅硫磺島戰役同沖繩戰役中，美國戰艦執行炮轟岸上目標。1945年5月德國投降。美國同英國嘅新式戰艦繼續炮轟日本嘅釜石、日立等近海工業城市。
1945年8月15號，盟軍喺密蘇里號戰列艦接受日本正式投降，訂定投降文件。戰艦嘅光榮生涯喺此達到頂峰，以及終點。二戰後，各國戰艦紛紛作為廢鋼鐵被出售拆毀，或作為靶艦同武器試驗平台被摧毀。美國衣阿華級戰列艦投入韓戰同越戰後退役封存。1980年代，衣阿華級戰列艦重啟加裝導彈同直升飛機，並投入使用於第一次波斯灣戰爭裏，喺轟炸伊拉克陸上目標發揮咗作用，用咗十幾年後重新退役，同時將「戰列艦」嘅級別從現役艦船分類中取消。
目前世上嘅戰艦僅存：美國4艘衣阿華級戰列艦、2艘南達科他級戰列艦、北卡羅來納號同得克薩斯號，日本嘅前無畏艦三笠號（作為浮動博物館）。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
