From Wikipedia, the free encyclopedia
小說(粵拼:siu2 syut3)係一種文學形式,一般描寫人物故事,塑造多種多樣嘅人物形象,但亦有例外。佢係擁有完整佈局、發展同埋主題嘅文學作品。而對話係唔係具有鮮明嘅個性,每個人物講嘅嘢係唔係有獨特嘅語言風格,係衡量小說水準嘅一個重要標準。
同其他文學形式相比,小說嘅容量較大,佢可以細緻咁展現人物性格同人物命運,可以表現錯綜複雜嘅矛盾衝突,同時重可以描述人物所處嘅社會生活環境。小說嘅優勢係可以提供整體嘅、廣闊嘅社會生活。
喺19世紀以前,東西方嘅小說可以話係獨立發展。
喺17世紀之前嘅歐洲,「小說(novel)」呢個字嘅意思其實係指小故事同長篇嘅散文之間嘅一種短故文學形式(相當於家陣所謂嘅短篇小說)。例如,塞萬提斯《模範小說集(novela ejemplares)》係短篇嘅故事集,不拘泥於當時嘅散文形式,而創造出一種「新嘅故事敘述」。
另一方面,塞萬提斯所寫嘅《唐吉訶德(Don Quijote)》(1505-1515年)表現出作者嘅世界觀,同時亦呈現人物嘅成長同埋糾葛、心理嘅變化,同近代嘅作品一樣,佢主要嘅着眼點在於「個體」。因此佢被稱為「近代小說之祖」。因為同樣理由,笛福同佢創作嘅《魯濱遜流浪記 - Robinson Crusoe》(1719年)亦被普遍認為係「近代小說之祖」。
近代小說嘅起源,係18世紀喺法蘭西所流行嘅書信體小說(以信嘅形式或互通書信形式創作嘅文學)。近代小說嘅發展,一般認為同18世紀以後英國、法蘭西等地中產階級嘅勃興息息相關。呢啲識字率比較高而且較為有錢嘅人成為其佢主要嘅讀者群,亦即係話,近代小說係因應佢獨特嘅需要而發展嘅。
小說嘅體系異常龐大,以唔同方式分類都可以分出唔同而且眾多嘅類別。
短過短篇嘅小說完全合乎瞬息萬變嘅現代社會中生活忙忙碌碌嘅人嘅閱讀習慣。幾乎每日都可以睇到啲人為呢類小說賦予新名詞同埋新定義,例如極短篇、精短小說、超短篇小說、微信息小說、一分鐘小說、一袋煙小說、袖珍小說、焦點小說、瞳孔小說、拇指小說、迷你小說等,數都數唔晒,連專門嘅文學研究者亦好難如數家珍分敘佢嘅定義,一般人更容易混淆。
一般認為微型小說嘅篇幅應該係兩千字以下。因為題材通常係生活經驗嘅片段,因此可以係有頭無尾、有尾無頭、甚至無頭無尾。高潮放喺結尾,高潮一出即刻完,營造餘音繞樑嘅意境。由於比短篇更短,字句亦需要更加精練,題材可以見微知著嘅比較好。一個意外嘅結局雖然可以吸引眼球,但文章短得嚟都要有伏筆呼應,甚至同畀讀者意外相比,更應該重視帶唔帶到感動畀讀者。
平均字數一萬左右嘅小說會被劃歸短篇小說。喺佢特色中有所謂三一律——一人一地一時,亦即係減少角色、縮小舞台、短化故事中流動嘅時間。另外,雖然佢哋成日惜墨如金,但一般認為短篇小說都係要符合小說嘅原始定義、亦即係對細節有足夠嘅刻劃,絕唔係長篇故事嘅節略或綱要。
平均字數三至四萬嘅小說,一般來講係較容易成功嘅小說。因為對初學者嚟講,寫作長篇易陷入多數情節造成凌亂難收嘅困境,而寫作短篇唔係轉折太少而單調、就係轉折太多但就顯得擁擠。呢個時候考慮將原本嘅構想改成中篇係一個廣受推薦嘅建議。
字數在六萬字以上會被劃歸長篇小說。如果作者打算表現人生中常見嘅錯綜複雜嘅關係,就要寫咁大篇幅。通常就算筆調輕鬆嘅長篇小說,亦會有一個內裏嚴肅嘅主題,唔係就好易搞到零散或者冇晒組織。初心者寫長篇小說最需注意全局對主題嘅呼應、結構嚴密性、以及避免重複矛盾或缺漏。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.