中國歷史嘅王朝,皇室係滿洲族嘅愛新覺羅氏,首都順天(現今北京),陪都奉天(現今瀋陽) From Wikipedia, the free encyclopedia
大清[1](粵拼:daai6 cing1;滿文:ᡩᠠᡳᠴᡳᠩ
ᡤᡠᡵᡠᠨ,穆麟德:daicing gurun),亦叫做中華大清國、大清國、大清帝國、中國[2](滿文:ᡩᡠᠯᡳᠮᠪᠠᡳ
ᡤᡠᡵᡠᠨ,穆麟德:dulimbai gurun)等,或者係就咁叫清,因為皇室係滿洲人,又叫滿清(mun5 cing1),係個已滅亡政權,漢族歷史學説等視佢為中國史上最後一個皇朝,叫清朝。大清由滿人統治,發源響今日中國東北地方,皇帝姓愛新覺羅。大清1616年由努爾哈赤創立,最初叫金,史稱後金。1636年先改國號做大清。1644年越山海關進入中原,滅大明同大順,以及平定四周諸國,直至1912年溥儀退位而亡,取而代之嘅係中華民國。
中國斷代史來講,清朝係入關開始計,接住明朝,為中華民國所代,年份由1644年到1911年。
外文原先多數叫大清做Ch'ing。響1958年,有漢語拼音系統之後,外文逐漸寫做Qing。
滿人,原本係女真人,一直住響滿洲,即係今日叫嘅東北。大明皇帝朱元璋(洪武皇帝),為咗壓制元朝(北元)勢力,喺滿洲一帶設遠東指揮使司,開始落手控制女真部各族。女真建州部猛哥帖木兒(努爾哈赤六世祖)嗰陣係大明建州衛左都督,北方有部族勢力強大,南下壓迫住建州女真。猛哥帖木兒被殺,建州部被迫南移,最後定居赫圖阿拉(之後改稱為興京,喺今日中國嘅遼寧省新賓縣境內)。
南移後,建州女真部同大明交往密切,建州部社會生產力提高,經濟繁榮,開始有八旗制。咁啱呢個時候,係努爾哈赤任大明建州部阿頭。1583年(大明萬曆十一年),努爾哈赤襲封為指揮使,以祖、父遺甲十三副,相繼兼併海西女真部,征服東海女真部,統一咗分散喺滿洲各地嘅女真各部。
1616年(大明萬曆四十四年),努爾哈赤喺赫圖阿拉稱汗,建立大金(史稱後金),改元天命,定都赫圖阿拉。1618年(天命三年,大明萬曆四十六年),努爾哈赤公告「七大恨」嘅討明檄文,起兵反明。1621年遷都遼陽,叫東京。1625年又遷都瀋陽,改名盛京。1626年,努爾哈赤響寧遠之戰一役中,畀明軍大炮打到重傷,無幾耐就死咗。
1627年,努爾哈赤第八個仔皇太極繼位。1636年(大明崇禎九年),皇太極改國號做大清,改元號為崇德稱帝。1643年皇太極病死,第九個仔愛新覺羅福臨(順治皇帝)繼位。
1644年(甲申年,大清順治元年,大明崇禎十七年,大順永昌元年),李自成喺西安建立大順,之後重帶兵攻陷大明國都北京,明思宗朱由檢吊頸自殺。李自成喺北京做齊儀式,準備做全中國皇帝。之但係佢仍然堅持喺北京推行軍法,結果好多人唔妥佢,所以穩定唔到民心。大清軍說服大明將軍吳三桂投降,喺佢嘅帶領之下入關。李自成入城40日就急急退守到西安,隨後多爾袞迎關外嘅清世祖愛新覺羅福臨入關,國都搬到北京。開始推行剃髮易服,有好多人反抗。
呢個時候,中國境內,大清、大明同大順三國鼎立。大清入關企穩之後,就向大明同大順推進。大明官員迎福王朱由崧做皇帝。大明想聯大清抗大順,大順不敵,最後敗亡。大清轉移向大明埋手,南下過程中,江南一帶受到血腥鎮壓,揚州十日,嘉定三屠。大清一直遇到好大反抗,但係大明朝廷同宗室唔團結,俾人逐個擊破,最後回天乏術,南方各省失守,最後大明皇帝朱由榔(永曆帝,桂王)要敗走緬甸,始終落入大清手裏面。而比較大規模嘅反抗得返喺臺灣嘅鄭成功,不過1662年魯王朱以海同鄭成功都病死,大明滅亡,1683年,連鄭成功後人鄭克塽都投降,清康熙帝玄燁統一中國。
1911年(清宣統三年)辛亥革命之後,各省都逐一宣佈獨立。清帝溥儀喺1912年退位,大清正式滅亡。滿清自從入關,皇帝總共有十二個,統治咗中國268年,成為中國最後一個君主政權。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.