動作 RPG

動作 RPG（英文：action role-playing game，簡稱 ARPG）係一種電子遊戲類型，顧名思義係結合咗動作遊戲同 RPG，會

• 好似動作遊戲噉，考玩家反應夠唔夠快同埋手眼協調夠唔夠好；同時
• 又會好似 RPG 噉，有經驗值同升呢嘅遊戲機制。

ARPG 好興畀玩家直接控制角色，由角色嘅眼度睇嘢。

喺一隻典型嘅 ARPG 當中，隻遊戲會要求玩家親手控制住自己個角色郁動同攻擊（就好似動作遊戲噉），而唔似得傳統嘅 RPG 噉，畀玩家淨係靠住選單嚟命令角色行動，同時喺戰鬥過後，玩家控制嘅角色會得到經驗值同升呢－所以隻遊戲定義上仲算屬於 RPG ^[1]。

ARPG 一路到咗廿一世紀初都仲有唔少出名嘅作品，例子可以睇吓《闇龍紀元系列》同埋《艾爾登法環》噉，而風靡全球 RPG 界嘅《最終幻想系列》亦都畀人話係愈嚟愈趨向 ARPG，放棄咗早期作品當中嗰種回合制嘅戰鬥^[2]。

常見機制

内文：動作遊戲同電子 RPG

睇埋：決策樹

ARPG 成日會用以下呢啲機制：

• 郁動控制：ARPG 正路都會畀玩家直接控制角色郁動；喺《最終幻想系列》早期啲嘅作品^{[註 1]}同埋《寵物小精靈系列》入面，玩家戰鬥嗰陣冇得直接控制角色郁動，淨係有得透過選單嚟揀「自己控制緊嘅角色要採取乜嘢行動」；相比之下，好似《艾爾登法環》同《最終幻想 XVI》等嘅 ARPG 作品，玩家郁手掣上面條類比搖桿，就會令玩家角色喺戰鬥空間裏面郁嚟郁去^{[註 2]}。
• 體力（stamina）：每個角色都會有嘅一個值，有異於血值同魔法值－
  1. 個角色做親乜嘢行動－每吓格鬥武器攻擊，或者每次用咒語... 呀噉－都要消耗一定量嘅體力，唔同行動要消耗嘅體力嘅量都唔同；
  2. 一個角色唔夠體力淨嘅話，就唔能夠行動；
  3. 如果一個角色乜行動都唔做，過咗一陣（例如 3 秒）之後佢就會開始恢復體力；
  • 體力呢種機制，限住玩家可以採取幾多行動，等佢就冇得（例如）靠住喺 1 秒內施 10 次咒語嚟屈對手機，而係焗住要有策略噉計劃自己嘅行動^{[註 3]}。
• 閃避：隻遊戲有個閃避指令，玩家一撳閃避指令，玩家角色就會－
  1. 突然郁動，郁動嘅幅度啱啱好夠佢避開大部份嘅攻擊；又或者
  2. 玩家一撳閃避指令，玩家角色就會喺地下度翻滾一段距離（dodge roll；閃避翻滾），翻滾期間玩家角色會暫時進入完全唔能夠畀人打中嘅狀態；
  • 正常情況下，閃避用起嚟會受某啲限制，通常係每吓閃避都要消耗若干體力（睇返上面講體力嘅機制）；而視乎隻遊戲點設計，閃避可以幾有技巧－想像玩家太早撳閃避指令，佢個角色太早做閃避同太早離開閃避嗰陣嘅無敵狀態，因而畀敵人打中^[3]。
• 擋：隻遊戲有個擋指令，玩家一撳擋指令，玩家角色就會揸實自己個盾，用個盾抵擋嚟緊嘅攻擊，令吓攻擊造成嘅傷害減少若干 %，甚至令嗰吓攻擊完全冇嗮效；隻遊戲會將盾當做道具一種，會有若干款嘅盾畀玩家揀用，唔同盾性能唔同，可能（例如）有啲盾能夠抵擋更多嘅傷害但重啲，會搞到個角色郁得慢咗^[4]。
• 出招流露（telegraph）：當一個 ARPG 角色要出大招式嗰時，佢往往會喺出招前做啲動作－想像一位大魔法師準備要施展佢最勁嘅咒語，佢會一路面露痛楚噉唸咒，又或者一隻惡龍準備要出絕招噴火燒著嗮成笪戰場，佢會打開個口喉嚨開始發光發幾秒，先至真係噴火－呢啲「話畀玩家知個角色就嚟要出招」嘅訊號，就係電子遊戲上講嘅流露；設計 ARPG 嘅人成日都會運用流露嚟調節一場戰鬥嘅難度－如果一招絕招流露少（出招嗰方冇乜明顯睇到嘅變化，好快就出到招）通常就會令到嗰一招難避，間接令場戰鬥難打咗^[5][6]。
• 動搖（stagger）：好多 ARPG 都有動搖嘅機制；喺呢種機制下，玩家每吓攻擊都會提升個敵人嘅動搖程度，動搖程度去到咁上下個敵人就會進入受到動搖（staggered）嘅狀態^{[註 4]}，一個受到動搖嘅敵人會暫時郁唔到，而且佢畀人打嗰陣受嘅傷害會大咗，玩家就可以趁機會猛咁打佢，令佢損失大量嘅血^[7][8]。

順帶一提，因為 ARPG 咁睇重動作，佢哋好多時都會因而冇咁睇重能力值：例如喺傳統嘅回合制 RPG 裏面，一個角色避唔避得開一吓攻擊，往往係由佢能力值決定嘅；而喺 ARPG 當中，閃避睇嘅係玩家反應夠唔夠快，做唔做到喺適當嘅時間點撳閃避掣，唔係咁關能力值嘅事^[1]。

職業機制

睇埋：角色職業

包括 ARPG 在內嘅 RPG 不溜都深受《龍與地下城》（D&D）影響，傾向大量噉使用奇幻同埋相關嘅橋段。呢啲噉嘅奇幻 RPG 成日都用角色職業嘅機制：顧名思義角色職業即係指一位角色可以有職業，常見嘅職業包括咗騎士同魔法師呀噉，而唔同職業有唔同專長^{[註 5]}。

ARPG 嘅角色職業基本上可以分兩大類^[9]－

• 好似騎士等主要靠近身肉搏嘅職業，佢哋啲攻擊通常冇乜射程可言；
• 好似魔法師等主要靠長距離攻擊嘅職業，佢哋可以企喺離敵人遠嘅地方用魔法射敵人，但一旦敵人靠得太近佢哋就好多時會無力反抗；

ARPG 好多時會設計成要求唔同職業嘅角色互補不足，而唔同嘅 ARPG 作品可能會用唔同方法達到呢個目標：《闇龍紀元》會畀玩家控制住一隊角色，玩家預設會控制住故仔嘅主角，但佢有權喺戰鬥途中改做控制主角嘅其中一個隊友，所以玩家可以例如要啲騎士企喺魔法師前面做人盾，等啲魔法師可以安心施咒^[10]；而喺《艾爾登法環》裏面，故仔嘅主角係獨來獨往嘅，大多數時間都冇隊友幫手，不過隻遊戲有靈灰（spirit ash）嘅機制－玩家可以用靈灰呢種道具召喚啲 NPC 嚟幫手打，玩家如果用緊個身為魔法師嘅角色，可以召喚騎士型（血量高又會企喺召喚者前面）嘅 NPC 要佢哋做自己人盾，等自己可以安心施咒^[11]。

名作

ARPG 喺電子遊戲早期經已存在。一般認為，呢種遊戲類型源自 1980 年代，由《屠龍劍系列》（Dragon Slayer）同埋《伊蘇系列》（Ys）等嘅作品帶起。

廿一世紀初出名嘅 ARPG 就有^[1]

• 《暗黑破壞神系列》（Diablo）
• 《魔物獵人系列》（Monster Hunter）
• 《質量效應系列》（Mass Effect），採用咗科幻嘅美學，結合埋射擊遊戲
• 《闇龍紀元系列》（Dragon Age）
• 《最終幻想系列》（Final Fantasy），尤其係個系列喺 2010 年代起嘅作品，當中《最終幻想 XVI》（2023 年）已經係完全嘅 ARPG ^[2]。
• 《寵物小精靈傳說：阿爾宙斯》（Pokémon Legends: Arceus）
• 《艾爾登法環》（Elden Ring），結合咗魂系遊戲同開放世界，受到極正面嘅評價。

睇埋

• 魂系遊戲（Soulslike）：多數屬 ARPG，特徵係特登設計到難度高而且重視環境敘事，成日都會用黑暗奇幻嘅美學。
• 戰術 RPG
• 奇幻

註釋

1. 可以睇第 13 集同打前嘅作品。
2. 可以睇吓 Giant Bomb 講 ARPG 嘅文。
3. 可以睇吓 Giant Bomb 講體力機制嘅文。
4. 通常唔同敵人對動搖嘅抵抗力都唔同。有啲敵人難啲動搖。
5. 至少理論上係噉。喺實際嘅遊戲設計當中，設計師可能會做平衡做得唔好，搞到有某啲職業明顯好打啲。

攷

1. Musgrave, Shaun (July 13, 2017). "RPG Reload Glossary: The Origins of Action-RPGs". TouchArcade.
2. Final Fantasy Is Better As An Action RPG. CBR.com.
3. How to dodge faster in Elden Ring. sportskeeda.
4. Elden Ring: How To Guard Counter. Game Rant，仲有提到《艾爾登法環》當中擋中反擊嘅機制。
5. Elden Ring: How to Beat the Fire Giant Boss. Game Skinny.
6. Final Fantasy 16 Combat Tips: 13 Things I Wish I Knew Before Playing. Push Square.
7. Final Fantasy 7 Remake's Trick For Getting Chadley's Materia Real Fast. Kotaku.
8. Final Fantasy 16: How To Deal 50,000 Stagger Damage. Dual Shockers.
9. Why Dragon Age 4 Should Retain Traditional Classes. Game Rant.
10. Do I have to control the entire party in Dragon Age Inquisition?. Game Guides.
11. Elden Ring: 20 Best Spirit Ashes, Ranked. Game Rant.

拎

• Action RPG （英文），TV Tropes 講 ARPG 呢種遊戲類型，有列表式噉將 ARPG 作品列嗮出嚟。
• Action RPG （英文），Giant Bomb 講 ARPG 呢種遊戲類型。
• Elden Ring - Malenia, Blade of Miquella Boss Fight (4K 60FPS) （英文），《艾爾登法環》其中一個大佬，段片包埋啲劇情畫面－隻遊戲畀玩家控制嗰陣，畫面會見到血條等嘅 HUD。