From Wikipedia, the free encyclopedia
《勁歌金曲》(英文:Jade Solid Gold,JSG)係一個喺香港電視史上相當長壽嘅音樂節目,由電視廣播有限公司製作。呢個節目總共播咗41年7個月,成為全球最長壽嘅華語音樂節目,而從意義上嚟睇,現時喺無綫收費電視內播放嘅華語音樂頻道「無綫音樂台」,可算係《勁歌金曲》節目嘅延伸。
勁歌金曲喺1981年10月10號播出第一集,當時第1代嘅節目主持人係蔡楓華(據知亦係任期最長嘅一位),並喺逢星期六晚九點左右播映,節目嘅內容以訪問歌手,以及播放過去一個禮拜內嘅新歌MTV為主。起初並無一個正式嘅頒獎典禮,直到1984年1月28號,至開始舉辦1983年度《十大勁歌金曲頒獎典禮》,至1986年2月1號設立「勁歌金榜」,呢個「傳統」一直維持到而家。
1981年至1990年中,《勁歌金曲》以現場直播方式,邀請歌星亮相表演。1990年中期開始,轉為訪問歌星同埋播放歌曲嘅錄影節目,較後時期轉返做歌星亮相表演方式,但大多數係錄影播出(「季選」除外)。節目形式大致係同歌手玩遊戲,噉亦引嚟歌手謝霆鋒批評過節目無聊。
2004年改為星期日晚7點35分播出時,曾經一度以現場直播方式播出,但喺2005年隨著《勁歌金曲》改喺逢星期三晚11點05分播出,轉返做錄播。另外高清翡翠台會喺星期日播出一個鐘完整版嘅《勁歌金曲》,同樣係錄播。2009年2月2號起,無綫電視晚間新聞提早播出,勁歌金曲因而再進行再調動至逢星期六晚7點35分現場直播。2009年7月,勁歌金曲再次改為錄影播出。
2010年9月,因為香港電台時段對調,《勁歌金曲》10月2號起再次改為逢星期六晚7點30分播出。2011年3月,《勁歌金曲》改為逢星期六晚7點播出。
2011年5月,《勁歌金曲》播映時間將改為逢星期六下晝5點30分到6點。
2009年至2013年期間,香港音像聯盟(HKRIA)就旗下成員唱片公司嘅音樂作品版權收費問題,同無綫電視唔啱牙。期間香港環球唱片(包括環球、寶麗金、新藝寶、正東)、索尼音樂娛樂(香港)(包括新力、博德曼、藝能動音)、香港華納唱片(包括華納、金牌大風)、百代唱片(香港)(剩係包括百代)同埋種子博美娛樂(前四者係比較早期加入,最後者係後期加入)呢五間唱片公司旗下歌手包括香港環球唱片代表譚詠麟、鍾鎮濤、李克勤、張學友、陳奕迅、張敬軒、陳慧琳、陳秋霞、區瑞強、關正傑、關淑怡、陳慧嫻;香港華納唱片代表葉蒨文、許廷鏗、林欣彤、呂方、郭富城、杜麗莎、吳雨霏、小肥、鄭秀文、方力申、鄧麗欣;索尼音樂娛樂(香港)代表徐小鳳、林志美、蔡楓華、劉美君、甄妮、盧巧音、王秀琳、孫耀威、高皓正、鄧穎芝;同埋百代唱片(香港)代表顧媚、葉振棠、葉麗儀、盧冠廷、黃敏華、葉德嫻、陳司翰同葛蘭都無得喺TVB唱歌、露面及接受訪問,佢哋啲歌都無得喺「勁歌金榜」得到任何排名。亦有上述歌手因為唱咗好多年,要俾機會啲新人,所以無得上TVB嘅講法。[未記出處或冇根據]風波亦教識好多人聽歌同追星都要緊貼時代同潮流。[未記出處或冇根據]
期間,TVB亦多咗啲機會走去「捧紅」新晉歌手,亦都間接令節目變新人、自家歌手同自家藝人嘅天下,更加令正視音樂喺2013年變成星夢娛樂。[未記出處或冇根據]有越來越多00後亦自己作歌,希望上到「勁歌金榜」。[未記出處或冇根據]
2014年,周柏豪憑《同行》回歸勁歌金曲,做咗第一位回歸勁歌金曲嘅四大歌手(佢係華納唱片代表。),然後有李克勤、張學友、陳奕迅、徐小鳳等人回歸。HKRIA雖然喺2017年再同TVB唔啱牙,但嗰間公司喺2021年2月尾都係正式同TVB和好。
2021年曾志偉入主無綫電視後,一度為《勁歌金曲》搞大改革,並安排喺禮拜日21:30到22:30播一個鐘,同隔籬台ViuTV音樂節目《Chill Club》正面交鋒,不過改革約莫半年之後就打回原形,逐漸縮短成臨停播前逢禮拜六23:00播15分鐘。2023年5月20號,《勁歌金曲》播出最後一集,而5月21號播出特備節目《勁歌43年情.讓音樂高飛》,宣告《勁歌金曲》正式結束。不過同一時段用《勁歌金榜》個名義繼續播出,變成齋數榜嘅節目。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.