![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a3/Graham%2527s_Hierarchy_of_Disagreement-en.svg/langzh-yue-640px-Graham%2527s_Hierarchy_of_Disagreement-en.svg.png&w=640&q=50)
人身攻擊謬論
From Wikipedia, the free encyclopedia
人身攻擊謬論(粵拼:jan4 san1 gung1 gik1 mau6 leon6;拉丁文:ad hominem,全名 argumentum ad hominem [1])係謬論嘅一種[2][3][4][5],指有陣時啲人詏嘢嗰陣唔係真係傾場討論嘅重點,而係改為攻擊對手,質疑對方嘅人格、動機、態度、地位、階級、或者處境。好似係以下呢場討論噉:
- A 君:我認為進化論係合理嘅,因為有好多證據顯示...(詳請請睇進化論嘅證據)
- B 君:超,你信進化論只不過係因為你係一個無神論者之嘛。
- A 君:無論呢啲證據由邊個開口講出嚟嘅,證據就係證據。仲有,我係一個理神論者。
![Thumb image](http://upload.wikimedia.org/wikipedia/commons/thumb/a/a3/Graham%27s_Hierarchy_of_Disagreement-en.svg/640px-Graham%27s_Hierarchy_of_Disagreement-en.svg.png)
喺呢場對話入面,B 君避開唔直接噉應對 A 君個論證,而改為攻擊佢嘅個人,但係一個描述緊客觀事實嘅論證合唔合理係唔應該受制於講嗰個人嘅身份嘅[6]。正如 A 君所講嘅噉,無論呢啲理據由一個天主教徒、佛教徒、定係任何人開口講出嚟,都仲會係理據-實際上對手嘅個人特徵根本同個討論嘅重點唔啦更,所以喺哲學上,人身攻擊謬論俾人歸類做唔啦更謬論嘅一種[7]。B 君用人身攻擊嘅原因有好多,可能佢覺得佢冇能力正面噉回應 A 君個論證,又或者佢真係以為人身攻擊可以幫到佢否定 A 君啲證據。
好多時一個人之所以會用人身攻擊對付持有唔同見解嘅人,都係因為佢查實冇能力以理服人,所以先用呢種半發爛渣嘅方式諗住「詏」贏對手[2][8]。