香港巴士公司 From Wikipedia, the free encyclopedia
九龍巴士(港交所前編號:0062),全名九龍巴士(一九三三)有限公司,簡稱九巴或KMB,係香港一間巴士公司。間公司於1921年成立,1933年攞到政府嘅巴士專營權,自此成為全香港規模最大嘅一間專利巴士公司,而家係香港上市公司「載通國際控股」旗下企業,現任董事長為李澤昌先生。
九龍巴士公司嘅前身九龍汽車有限公司喺1921年成立,當時開辦兩條巴士線:尖沙咀↔深水埗同埋油麻地↔九龍城,得9架巴士行兩條路線。1930年,九巴由中美汽車公司接辦一條旺角至元朗嘅長途巴士線9號,成為九巴首條服務新界路線,直至1930年代,已經有80架巴士行十幾條路線。
1932年5月,殖民地政府重整香港公共交通服務,批出兩個巴士服務專營權-香港島以及九龍/新界,後者俾九巴攞到。
1933年4月13號,鄧肇堅、雷瑞德、雷亮、譚煥堂、吳海霖同埋林銘勳等人為九巴建立公司架構,九龍汽車(一九三三)有限公司正式成立,同年6月11號地區專利生效,九巴接辦當時中華巴士同埋啟德巴士公司經營嘅共18條九龍同埋新界路線。公司成立初期有106部單層巴。當時嘅單層巴設有頭等軟座同埋二等硬座兩級。乘客想落車就要拉郁車頂嘅粗繩,敲響喺車頭司機旁邊嘅銅鈴,司機就會喺下一個巴士站停車。當時九巴車廠位於旺角水渠道(家下始創中心嘅位置)。
1941年12月25號,日軍佔領香港。當時九巴經營17條路線,車隊數字更增至140部。但後來因為啲巴士俾日軍徵用,所以巴士服務幾乎被迫暫停。1945年二次大戰過後,九巴只能夠維持兩條巴士線嘅服務。1946年2月,九巴改裝二手軍車同埋貨車做巴士,並取消座位等級制,以儘快恢復提供巴士服務。
1949年,九巴率先由英國引入首批20部載得多啲人嘅雙層巴─「丹拿A型」,以應付日益增加嘅客量,兼成為香港第一間巴士公司引入雙層巴。從此香港嘅巴士服務趨向以雙層巴為主力。
1972年,香港海底隧道正式通車,一向提供九龍及同埋新界巴士服務嘅九巴,首次開入香港島。同年,九巴革新乘客畀車錢嘅方式。早年嘅巴士設有售票員同埋稽查員,喺架車度走嚟走去。售票員負責賣車飛,稽查員負責查飛,未買飛嘅乘客要補飛。同一車站上車嘅乘客嘅車費可能唔同,視乎車程嘅長短而定。因為巴士車頭同埋車尾都有閘門畀乘客上落,有啲乘客上車之後,售票員未嚟到就已經到站落車,就唔使畀錢買飛。為咗減少逃票情況以及削減人手,經過多個月測試,九巴自1972年起,正式採用「一人控制模式」,即係喺巴士車廂近司機位裝錢箱,由司機兼任稽查員嘅職務,監察每位乘客有冇入夠錢落錢箱。自此,無論車程幾長,同一車站上車嘅乘客都要喺車頭前門上車,兼即刻畀劃一車費。
1975年九巴為吸引揸車人士改搭巴士,推出豪華巴士路線服務。九巴喺七、八十年代營運嘅豪華巴士路線,包括200(機場↔中環)以及201(機場↔尖沙咀)等等,但其後佢哋分別被取消或改組,得208線一直營運至今。
1980年11月11號,新鴻基地產宣佈收購九巴喺股票市場嘅股份,引起收購戰。11月17號,新鴻基地產成功收購九巴,並持有九巴共39.5%股份。
1980年代,隨住地下鐵路通車以及九廣鐵路日漸普及,九巴亦着手重組路線同埋提供鐵路接駁服務(即係K或者M字尾嘅路線),1989年起為方便乘客,幾條M字尾嘅九巴路線,亦容許乘客以通用儲值票畀錢。同期,業務高速發展。1982年更首次開辦市區特快巴士線(即係X字尾嘅路線)14X同埋15X(現已改為215X),以接近點到點嘅行走方式,吸引更多市民選搭九巴。經過多年同生產商合作嘅試驗,九巴喺1988年引入首架雙層冷氣巴-「利蘭奧林比安」11米冷氣巴,令香港嘅巴士服務進一步提升。
1990年,九巴荔枝角新總部啟用,取代旺角舊總部。
1992年,九巴率先引入用符合「歐盟1型」廢氣排放標準引擎嘅巴士。
1994年,為咗建立企業形象,九巴開始改叫司機做「車長」,並喺司機位旁邊車頂位置加上一塊綠色膠牌,寫上車長嘅名同埋職員編號。
1996年九巴引入「歐盟2型」巴士。同年九巴嘅全資附屬公司龍運巴士有限公司獲當時香港政府批出專營權,經營北大嶼山以及赤鱲角新機場嘅巴士路線,並喺1997年開始投入服務。對九巴嚟講亦係一個創舉,因為首次有嚟自大嶼山以外嘅巴士行走。同年九巴亦引入低地台巴士-「丹尼士飛鏢」單層巴,方便傷殘人士使用巴士服務。
1997年,用咗100億港元起嘅青嶼幹線正式通車,5月至6月期間吸引大量市民去觀光。九巴於是喺假日特別加開兩條觀光線X31同埋X32,分別由荃灣碼頭以及葵芳地鐵站出發,途經青嶼幹線同埋北大嶼山快速公路之後,唔入東涌新市鎮原車折返,以一償市民參觀青嶼幹線「遊車河」嘅心願,可算係香港巴士史上嘅第一次。與此同時,九巴引入首款低地台雙層巴-「丹尼士三叉戟」雙層巴,方便巴士公司喺傷殘人士使用巴士服務同埋大載客量之間作出平衡。同年九巴同埋其餘四大運輸機構九廣鐵路、地鐵公司、城巴以及香港小輪聯合推出「八達通」聰明卡收費系統。同年,當時嘅九巴集團進行重組,九巴、龍運巴士等成員公司成為一間新成立嘅「九龍巴士控股有限公司」旗下嘅子公司,主要股東仍然係新鴻基等。九巴控股喺2005年改名做載通國際控股有限公司。
1998年,九巴成立全資附屬公司陽光巴士有限公司,專門提供屋邨巴士、員工以及學童接送專車、購物商場穿梭巴士等各種非專利巴士服務。該公司現時係香港其中一間最大嘅巴士租賃服務公司。
2000年,用聰明卡「八達通」畀車錢已經非常普遍,九巴喺同年4月完成為整個車隊裝上八達通讀卡機。同年11月25號,九巴率先引入「路訊通」系統(之前叫「資訊娛樂共同睇」),乘客可透過裝喺車上嘅電視屏幕,收睇資訊以及娛樂節目;但亦有乘客視為騷擾。
2001年九巴引入「歐盟3型」巴士,同年11月九巴沙田車廠攞到ISO 14001品質證書 ─ 環保管理體系,成為香港巴士運輸業之中首間得到呢個殊榮嘅車廠。
2002年,九巴再次通過ISO品質認證,成功將所有ISO 9001:1994證書升級至ISO 9001:2000版本。同年10月九巴獲《福布斯 Forbes》雜誌頒發美國以外地區「200家營業額10億美元以下的傑出企業」殊榮。
2002年10月,九巴喺藍田地鐵站嘅42C線巴士總站月台,整咗全港首個冷氣候車室。候車室採用透明強化玻璃密封設計,並設有恆溫冷氣,由獨立系統供應鮮風,等乘客喺空氣清新、寧靜舒適嘅環境下等巴士。候車室亦設有一組多媒體資訊系統,裝設一組電子屏幕顯示屏,詳細列出下一班巴士嘅開車時間、路線同埋票價等資料。
2003年9月,九巴喺尖沙咀廣東道新港中心外裝設全港首個數碼巴士站,個巴士站有電腦螢幕,提供交通以及旅遊資訊;同年11月,九巴新荔枝角車廠攞到ISO 14001品質證書。
2007年12月,九巴推出近年嚟最大規模嘅轉乘優惠,涉及七組共21條路線,覆蓋範圍包括西九龍,尖沙咀、荃灣、深井、葵青、沙田、大埔、元朗、洪水橋、屯門同埋新界北區,至此,九巴已經有68組唔同嘅轉乘優惠,共涉及258條路線。另外為配合兩鐵合併,九巴更改旗下位於兩鐵車站嘅巴士站站名,一律叫XX鐵路站,有大概300個巴士站受影響。
2011年底,九巴嘅冇冷氣巴士已經冇幾多架剩。九巴喺其中一架冇冷氣巴士貼上「再見熱狗巴士(2012)」嘅廣告,隨後亦有幾個巴士迷組織喺第二啲冇冷氣巴士賣形形式式嘅送別廣告。2012年5月9號,九巴將剩低4條有用冇冷氣巴士行嘅巴士線(5A、16、93K、98A)改晒做全冷氣,自此香港再冇冇冷氣嘅專營巴士行。
2017年6月,九巴宣布改革巴士車隊車身嘅顏色同風格,由自引入超低地台車款丹尼士三叉戟開始就一路用到而家嘅香檳金車身會改為英倫風「城市紅色」(City Red)車身配銀白色線條,車廂嘅顔色同風格亦都唔同咗好多。九巴表示新形象名為「城市脈搏」(Heartbeat of the City)。
截至2018年12月31號,九巴營運緊401條路線,其中有九龍區路線、新界區路線、過海路線、馬場路線、通宵路線同埋墳場特別路線。至於機場同北大嶼山路線,就由佢嘅姊妹公司龍運巴士營運。
截至2021年1月31號,九巴擁有服役緊嘅載空巴士數量為3997架,係全球最大型嘅私營公共巴士公司之一,全部都係可以畀輪椅人士乘搭嘅低地台冷氣巴。
到咗2011年11月9號,九巴(唔包括龍運巴士)擁有服役緊嘅載客巴士數量3887架,係全球最大型嘅私營公共巴士公司之一,其中近98%係冷氣巴士。上得輪椅嘅超低地台巴士(包括單層同雙層巴士)佔成個車隊總數58%。受到運輸當局嘅「保鐵」政策影響,九巴嘅巴士數量不斷減少,由2003年起,巴士數量已經累積下跌超過400架,重令到九巴喺2008年開始出現嚴重車荒,需要同旗下車齡達17年嘅冷氣巴士申請續牌,初期除咗沙田車廠外其他車廠都唔會安排呢類巴士行走途經快速公路嘅路線,雖然係一年期行車證,但呢類巴士喺距離首次登記日期就到18年嗰陣除牌(同2008年天水圍燒車事件嘅額外8架續牌巴士程序一樣)。另外,為咗解決長遠問題,因應龍運投入新型巴士嘅同時,陸續將部份丹尼士三叉戟巴士髹上全金身,改喺九巴服務。
九巴已經同運輸署保證,由2011年開始,所有專利巴士會回復喺17年或之前退役,並進一步縮細車隊數量;不過因為區議會要求九巴保留冇冷氣巴士服務,所以九巴已經決定安排FZ牌後(首次登記日期1994年4月27日同之後)嘅冇冷氣巴士續牌(服役時間就來18年)。
九巴為咗方便分配同管理車隊,就將車隊分配喺九龍同新界嘅4個車廠,並且用唔同嘅英文字母(K、L、S、U)做區分。九巴將呢啲分類廠房嘅貼紙貼喺巴士擋風玻璃嘅左下角。九巴車廠嘅分類有:
行政人員 | |||
母公司管理層 | |||
梁乃鵬 | 載通國際主席及獨立非執行董事 | 何達文 | 載通國際董事總經理 |
高層管理人員 | |||
何達文 | 董事總經理 | 歐陽杞浚 | 副董事總經理 |
胡蓮娜 | 公司秘書 | 何世基 | 財務及行政總監 |
雷兆光 | 商務總監 | 霍彩福 | 車務總監 |
施偉廉 | 運輸發展總監 | 陳碧君 | 企業事務總監 |
部門主管 | |||
麥守行 | 財務會計部主管 | 關永祥 | 企業傳訊部主管 |
陳碧燕 | 顧客服務部主管 | 唐東明 | 商務及資產管理部主管 |
劉冠坤 | 財務策劃及成本會計部主管 | 黃佩儀 | 人力資源部主管 |
梁開添 | 資訊科技部主管 | 梁美芬 | 保險部主管 |
梁文龍 | 稽核部主管 | 邱麗明 | 辦公室行政部主管 |
梁彩明 | 策劃及發展部主管 | 李文浩 | 採購部主管 |
梁健宏 | 工程部主管 | 沈乙紅 | 首席機械工程師 |
邵慧雯 | 交通部主管 | 張澤盛 | 財政部主管 |
王家豐 | 安全及服務質量部主管 | 何志文 | 車廠總主管 |
溫健添 | 車務配置部主管 | 關智偉 | 荔枝角廠署理總經理 |
馮兆雄 | 沙田廠總經理 | 胡堅強 | 屯門廠總經理 |
楊國豪 | 九龍灣廠署理總經理 |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.