Tiong-hôa Bîn-kok Hiàn-hoat Cheng-siu Tiâu-bûn
From Wikipedia, the free encyclopedia
Tiong-hôa Bîn-kok Hiàn-hoat Cheng-siu Tiâu-bûn (Hàn-jī: 中華民國憲法增修條文), kán-chheng Hiàn-hoat Cheng-siu Tiâu-bûn ia̍h sī Cheng-siu Tiâu-bûn, sī Tiong-hôa Bîn-kok chèng-hú ūi-tio̍h beh hôe-èng Tâi-oân bîn-chú-hòa ê ho͘-siaⁿ kap pún-thó͘-hoà téng-téng chèng-tī chêng-sè, só͘ sin-cheng ê Tiong-hôa Bîn-kok Hiàn-hoat ê tiâu-bûn. Cheng-siu Tiâu-bûn kap Hiàn-hoat pún-bûn sī hun-khui--ê, che pún-ì sī beh tī goân-iú Hiàn-hoat kà-kò͘ put-piàn ê goân-chek chi-hā, siu-kái pēng tòng-kiat pō͘-hūn ê Hiàn-hoat tiâu-bûn. Chū 1991 nî tē 1 pái siu-tēng í-lâi, bo̍k-chiân si-hêng ê pán-pún sī 2005 nî tē 7 pái cheng-siu.
Tiong-hôa Bîn-kok Hiàn-hoat Cheng-siu Tiâu-bûn ê chè-tēng, tī Tâi-oân le̍k-sú siōng ì-gī chin tōa. I kā Tâi-oân, Pêⁿ-ô͘, Kim-mn̂g, Má-chó͘ téng-téng Tiong-hôa Bîn-kok si̍t-chè koán-hat ê léng-thó͘ hō-chò Chū-iû Tē-khu (Hàn-jī: 自由地區), kan-taⁿ Chū-iû Tē-khu ê kok-bîn ū oân-chéng ê kong-bîn khoân-lī kah chèng-tī khoân-lī, jî-chhiáⁿ chóng-thóng ti̍t-soán, kok-hōe soán-kí, kong-bîn tâu-phiò ê chè-tō͘ piáu-hiān chhut ti̍t-chiap bīn-khoân ê cheng-sîn. Chèng-tī thé-chè hong-bīn, tiong-iong chèng-hú túi gī-hōe-chè choán-piàn ûi �pòaⁿ-chóng-thóng-chè, tē-hong chè-tō͘ lāi-té ê séng-chè hŏng tòng-kiat. Chóng-kóng chi̍t-kù, Hiàn-hoat Cheng-siu Tiâu-bûn sú-tek hiàn-chèng thé-hē ē-tàng tī Tâi-oân chèng-siông ūn-hêng, mā pó-chiong Tâi-oân si̍t-hiān chū-iû bīn-chú ê chè-tō͘.