Strandieng van de Doris
From Wikipedia, the free encyclopedia
From Wikipedia, the free encyclopedia
De strandieng van de Doris voeng plaets op 13 december 1907 voh de kuste van Wasschappel. De Iengelse schoener liep mee nie goe roer vast op de "Rassen", een zandbanke tun zuujen van Wasschappel. Het schip liep gliek vol waeter en de bemannienge kon z'n eige alleên mè redde deur de masten in te klimme en zuch di vast te maeke. Alleên de 18-jaerige kokke Ernest Crowters bon zuch nie vast en, zoô verklaerde de kap'tein laeter,[1] wier krankzinneg van angste en kouwe, liet van uutputtienge los en verdroenk.[2] De reddingsboôt Koning Willem III uut Vlissienge vaerde, naeda deur de bevolkienge van Wasschappel alarm was esloge, saemen mee de sleêpboôte Elbe uut, mè ze konne deur't arde weer nie kort enoeg bie't estrande schip komme en moeste onverrichter zaeke trug ni Vlissienge.
 | Dit artikel is 'n etalageartikel. |
Jacob Schroevers (1853-1927) redde di nae op 14 december 1907, saemen mee vuuf zeunen en een kleinzeune, drie opvaerende van de Doris.[3]
Op zaeterdagmiddag alluf viere voer de 54-jaerige Jacob Schroevers mee de botter Vijf Gebroeders uut om te kieken of'n assistentie kon biede. Omdat'n de Doris nie in zicht kon kriege, vaerd'n trug ni Vlissienge. Toen'n saevuns echter 'oorde dat'er toch nog meèssen an boord moeste wizze vroeg'n z'n vuuf zeunen; Job (30 jaer), Gerard (27 jaer), Jacob jr. (24 jaer), Klaas (20 jaer), Lieven (17 jaer) en kleinzeune Jacob van de Ketterij (13 jaer) om mee'm mee te gae om te prebere de schipbreukeliengen te redde.[1] Jacob sr. verklaerde in eêste instansie de anwizugied van z'n kleinzeune dat'n im eêst oôh verboôde om mee te gaen, mè ie was ezwicht omdat'n bleef zeure. Laeter verklaerde Jacob Schroevers jr. dat z'n neefje stiekem an boord was ekrope en wier ontdekt toen ze allufverwege't Oôstgat vaerde.
Schroevers vaerde om 11 uren saevuns uut. Toen ze in de buurte van de Doris kwaeme was de zeê zô ruw da ze nie kortbie konne komme. Pas s'ochens, naeda't weer lichter wier, konne ze een poôgienge waege om mee de ankerkaebel een lijne te leien mee de Doris, wi drie schipbreukeliengen nog oalmè vastgemaekt in de achtermaste, en eên in de vohmast ienge. Nae't toewerepe van de lijne kreeg eên van de drenkeliengen van de achtermast dizze te pakke, wi nae'n zuch vastmaekte, in't waeter sproeng en kon'oore binnenegaele op de Vijf Gebroeders. 'T lukte mee groôte moeite oôk d'andere tweê op dezellufde wieze te redde, mè ze zaege gin kanse om de man uut de vohmaste te benaedre. Laeter wier dien deur de reddiengsboôte asnog ered. Onderwege ni Vlissienge weire d'eredde schipbreukeliengen, die 35 uure in de maste ienge, van waeremte en voedsel verzien.
De ereddene en de redders wiere in Vlissienge ontaeld as'elden. De bemannienge van de Doris wier onderebracht in een 'otel en een inzaemeliengsactie onder de bevolkienge van Vlissienge en Middelburg leverde geld op voh nieuwe kleren, de trugries en uldeblieken. As andenken wiere de bemanniengslêden van de drie scheêpen apart en'ezaemelijk op de foto ezet en ontvienge van Harmonie Ons Genoegen.[4] een serenade. Uut innezonde brieven in kranten 'oor dudelijk dat'er oôk Vlissiengers die nie best te spreken waere over het onverrichter zaeke trugkere van de reddiengsboôte Koning Willem III[5]. Oôk was'er kritiek op de overeid, zôwe over't beschikbaere reddiengsmatrieel as de kadevohzieniengen, die zwaer onvoldoende waere eacht voh'n dergelijke omvangrieke reddiengsoperoatie.[6]
Voh de reddienge van de opvaerende van de estrande schoener Doris ontviengen Jacob Schroevers en F.H. Jilleba op 6 jannewari 1908 de zilvere medalje van de Maetschappij toet Nut van't Algemeên, in januari 1908 de groôte zilvere medalje van de Zuud-'Ollandse Maetschappij toet Reddieng van Schipbreukeliengen, op 24 jannewari 1908 de gouwe medalje van Koningin Wilhelmina voh menschlievend eerbetoon, op 23 maart de zilvere medalje van Lloyds[7], via zeêmanscollege de Groninger Eendracht en op 6 juli 1908 de gouwe medalje van Z.M. Koning Eduard VII van het Verenigd Koninkrijk[8]. De zeunen en kleinzeune van Schroevers en de overige bemanniengsleêden van de Koning Willem III ontviengen dito medaljes in't brons en zilver. De medaljes en biebe'orende oorkonden bin in 1956 eschoenke an de hemeênte Vlissienge en'oore bewaerd in't Hemeêntearchief Vlissienge en het Zeeuws maritiem muZEEum.
De Doris was'n Iengels zeilschip, een driemaster van 99 brt die was ebouwd in 1904. De tuushaven was Padstow. Ezagvoerder was Thomas Magor uut die plaets. Tiedes de onfortuunlijke laetste reis was't mee'een vuufkoppige bemannienge op weg van Plymouth ni Gent met een laedieng pijpaarde. In 2009 wier deur duukers van Wrakduikstichting De Roompot 't kompas van't schip evonde en overedraege an't maritiem muZEEum wi't wier openome in de vaste presentatie.[13].[14] In't museum van Padstow angt een aquarel wi op de Doris in volle zeê staet afebeêld.
De Rassen, op ouwe zeêkoarten Oôsterrassen enoemd, leie tun zuujen van Wasschappel. Tun Noord-Westen leie de Noorderrassen. Tussen dizze zandbanken is'n ondiepe vaergeule, deur vissers ebruukt om van de Deurlo ni't Oôstgat te vaeren en andersom. Aeremuënaers en Vlissiengers noeme't 'de Vleie', in Bresjes spraeke ze van T geultje van Doris'.[15]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
