სტოკჰოლმი (შვედ. Stockholm) — შვედეთიშ ნანანოღა დო უდიდაში ნოღა. თაქ იდვალუაფუ შვედეთიშ თარობა, პარლამენტი დო შვედეთიშ მონარქიშ ოფიციალური რეზიდენცია. 2011 წანაშო სტოკჰოლმიშ აგლომერაციას ოხორანდჷ ქიანაშ მახორობაშ 22% დო თინა ქიანაშ ედომუშამი დინოხოლენი პროდუქტიშ 29%-ს აწარმენდჷ. ნოღას, 2016 წანაშ ეჭარუათ, 917 297 ადამიერი ოხორანდჷ, ურბანულ რეგიონს (ტატორტი) — 1,372,565, აგლომერაციას — 2 198 044.
სტოკჰოლმი შვედეთიშ კულტურული, პოლიტიკური დო ეკონომიკური ცენტრი რე XIII სოშწანურაშე. თიში სტრატეგიული დვალუა შვედეთიშ ობჟათე-ბჟაეიოლ წყარპიჯის, ვითაანთხ კოკის ტობა მელარენიშ ნოჸულწკჷმა, სტოკჰოლმიშ არქიპელაგწკჷმა, ისტორიული შანულობაში რე. კოკეფს დვალუაშ დო გიშაკერზაფილი სისქვამეშ გეშა, ნოღას მეტჯოხოთ „ოორუეშ ვენეცია“ გიოდვეს. ნოღა ჯოხოგოლაფირი რე სქვამი პარკეფით, ბაღეფით დო არხეფით, მუშ გეშა სკანდინავიას ართ-ართი არძაშე პოპულარული ნოღა რე საირქიანო ტურიზმიშო.