From Wikipedia, the free encyclopedia
სამი ნასერი (ფრანგ. Samy Naceri; არაბ. سعيد ناصري; დ. 2 კვირკვე 1961, პარიზი, საფრანგეთი) — ბერბერული გორჩქინაშ ფრანგი არტისტი. ჩინებული რე მუში როლით ფილმის „ტაქსით“ დო თიში გაგინძორებეფით. სამი ბიბი ნასერიშ უკლაში ჯიმა რე.
სამი ნასერქ დებადჷ 1961 წანაშ 2 კვირკვეს საფრანგეთიშ ნანანოღა პარიზის. დიდა ჟაკლინი ნორმანდიალი ფრანგი რე, მუმა ჯილალი ალჟირალი რე, ნამუქჷთ საფრანგეთშა გინორთჷ ალჟირიშ დუდიშალაშა. სამიქ ირდჷ არხებული ოხორინალს სენ-მარტინიშ შოშეს ამშვი ჯიმაწკჷმა დო დალეფწკჷმა ართო. ართ-ართი ჯიმა ლარბი (ბიბი) ნასერი ხოლო არტისტი რე. გვიანო თიში ფანიაქ დარინალო პარიზიშ ელიურთიშა, ფინტენე-სუ-ბუაშა გინორთჷ.
ნასერიქ სკოლა 16 წანაშ ხანს დიტუ დო დიჭყჷ მუშობა. მარგინალური რინაშ მათხოზინექ 18 წანაშ ხანს დიჭყჷ ნარკოტიკიშ მოხვარა. 1984 წანას, თის მიესაჯჷ ხუთი წანიანი დოხუნაქ ხირუაშო, ჯიხას 4 წანა იღჷ.
სამის ჸუნს ქომოლსქუა დუნაბადი 1995 წანას, ჯოხოთ ჯულიანი. 2005 წანას იგურგინჷ არტისტი მარი გიარდშა.
მუსხირენ წანაშ გოძვენას თინა ოცადჷდჷ მეუგორუაფუდუკო მუში აბანშა სცენას. მაართა შანსი კინოს თის მეჩჷ რეჟისორქ ტომას ჟილქ ფილმით Raï, სოდეთ თინაქ ნორდინიშ როლი არსულჷ. ნასერქ ათე როლით ლოკარნოშ კინოფესტივალს ჟირი ჯილდო მიღჷ, ხოლო პარიზიშ კინოფესტივალსჷთ.
სამიშ კარიერაქ უმოსო წოხოლე იდჷ თიშ უკული, მუთ გიშარჩქინელო თინაქ შეხვად რეჟისორ დო პროდიუსერ ლიუკ ბესონს. ართიანს თინეფქ შეხვადეს ფილმ ლეონიშ გინოღალას, სოდეთ ახალი არტისტი ლაჸაფენდჷ პოლიციარიშ როლს.
ბესონი მუშ ფილმის ტაქსი სამის არენს ახალი ტაქსისტიშ დანიელიშ როლს. თეს მაჸუნჷ ფილმეფქ „ტაქსი 2“ (2000), „ტაქსი 3“ (2003), „ტაქსი 4“ (2007).
2006 წანას არტისტიქ მიღჷ საუჯგუშო ქომოლკოჩი არტისტიშ ჯილდო ფილმ „პატრიოტეფიშო“ კანიშ კინოფესტივალს, ფილმიშ შხვა არტისტეფწკჷმა ართო.
2009 წანაშ უკული, მუთ თის გურჩქინდჷ პრობლემეფქ პოლიციაწკჷმა უმოსო მესიშ თირსალო გიშეშჷ ტელევიზიათ. 2015 წანას ილაჸაფჷ თეატრალურ წჷმორინას „L’indien cherche le Bronx“.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.