From Wikipedia, the free encyclopedia
敎宗（拉丁文：papa）是羅馬主教，同時為普世天主教會領袖搭梵蒂岡城國元首，傳統浪畀認為是聖伯多祿宗徒之位个後繼者。天主教會使用「敎宗」为漢語譯名，漢字文化圈國家个部分非天主教人士則稱爲「教皇」。現任（第266任）教宗爲方濟各，勒2013年3月13号當選[1]。
.jpg)
教宗个拉丁文原詞「Papa」源自希腊文个「πάπας」，原意為「父亲」[2]，起初用勒对任何司铎或主教親暱个称呼。4世纪或5世纪辰光，「πάππας」勒西罗马帝国仍频繁畀用勒称呼主教，尽管渠已经开始逐渐转变成现代个用途，即局限勒称呼罗马主教，而勒东罗马帝国，尤其勒希腊交俄罗斯，司铎仍然称为「πάπας」。
但早在3世纪，亚历山大港主教对埃及个各主教实行了集权，有意识个仿效罗马主教个管辖方式。勒尼吉亚大公会议后，罗马主教隔手对亚历山大港大主教以管辖个优先权，并使用「亚历山大港教宗」个称号，该称号乃朝演变成为希臘正教會、以及科普特教会个「亚历山大港及宗徒聖馬爾谷之座个教宗」。
從《使徒行傳》时期開始，使徒們勒猶太會堂講道，但大部分基督徒聚會是分散勒各個家庭裏向進行，甚至當有迫害辰光也會得勒地下墳墓中進行，告咾聚會场许嚜邪气分散，慢慢叫迭眼家庭聚會以大城市為中心形成一隻隻教區个概念，勒教區裏向伊拉就設立主教，主教或教父，迭排詞勒汉语裏向也畀翻譯為“監督”或者是“長老”，聖經裏向多趟提到使徒召集各地方長老交伊拉讲言話，迭眼主教勒接受使徒个教導以後，隔手擔迭眼教導帶回各教區，迭些長老繼承使徒成為各地方教會个屬靈領袖。
而主教之所以勒社會浪擁有蛮大个權力也有其歷史因素。初代教會由於聖經及使徒書信多半由人工抄寫勒羊皮浪，流傳並不普及，交关基督徒嘸沒办法直接閱讀，對於基要信仰个根基並弗堅固，告咾各種異端思想老容易的滲透到教會裏向，特別是諾斯底主義个流行，長老們勒對付迭排異端个過程当中，加強了迭些主教个權力，其次，由於初代幾位具影響力个教父（也就是教會領袖特別是初代教會个神學家）个看重搭強調，無形中提高主教个地位，譬如伊格納修，愛任紐，居普良等。其中居普良提倡主教制度顶為卖力，伊曾话歇，一切主教侪平等，背叛主教就是背叛教會[3]。到了國教時期，羅馬帝國形成五個主要主教，即羅馬主教、亞歷山大港主教、安提阿主教、君士坦丁堡主教、以及耶路撒冷主教，五個主教明爭暗鬥侪希望能成為主教之首，直到伊斯蘭教興起後，耶路撒冷、安提阿搭亞歷山大港教會侪因穆斯林勢力入侵而衰微，挺下来羅馬主教搭君士坦丁堡主教分別成為西東方教會重要領袖，而羅馬主教勒政權分裂个西部地區因多趟交入侵蠻族成功談判，其社會重要性更遠超過政權，成為西部有政教實權个人物[4]。
羅馬主教權高於其他地區主教，有以下八隻原因。第一，羅馬是羅馬帝國个首都；第二，相傳使徒保羅交伯多祿侪是勒羅馬殉道，告咾羅馬个屬靈地位就更加高；第三，羅馬城曾勒尼祿時期畀火燒滅城，作为屠殺基督徒个藉口，保羅交伯多祿就是勒迭趟迫害中殉道，羅馬城受到帝國顶大个逼迫，告咾受欽佩；第四，羅馬教會曾慷慨救濟災荒，特別是耶路撒冷饑荒；第五，330年，罗马帝國首都遷到拜占庭後，羅馬主教就成了西方教會个領袖；第六，4世纪、5世紀，當東方教會勒爭論神學問題辰光常庄會得寻羅馬主教來主持公道，因爲相比之東方教會受希臘文化影響，傾向神祕主義，較為感性，羅馬所代表个西方教會受羅馬法个影響，重視用邏輯推理，嚴謹个方式解讀聖經，告咾東方教會常庄寻西方教會个羅馬主教來做判定；第七，羅馬教會人才輩出有得交关傑出神學家；第八，基於對《瑪竇福音》（新教譯成功《馬太福音》）第16章第18-19节个解釋，伊拉認為聖伯多祿是羅馬教會个第一任主教，乃末羅馬主教繼聖伯多祿之後擁有迭把天國个鑰匙。[3]
整個中世紀，對《聖經》个解釋全由各地方主教擔任，主教个權威甚至高於《聖經》个權威，同時基督教信仰也在箇辰光控制整個西方世界，羅馬教會有仔教廷个稱呼，羅馬主教也有了教皇或教宗个稱呼，其影響力及影響範圍甚至超過政權，政權个執政者也侪受教宗加冕，教宗可以從各地教會獲得捐稅，掌握神職人員个任用以及教會司法權。
一直到13世紀下半叶，英法兩國个皇室貴族，因自身利益弗願受外來勢力影響，對羅馬教廷各國政治个干涉越來越無法容忍，乃末到了十四十五世紀，英、法勒神職人員任用及教會司法權浪就歸到君主手浪，但仍向羅馬教廷納稅。中古時期，由於神職人員个腐敗，教廷勢力漸漸低落，主後1300年左右，意大利交法國彼此爭奪對教會个影響力，教廷一度遷到當時為教宗領地但瀕臨法國个亞威農（乃朝為法國領地），形成七任教宗侪勒亞維農治事个亞維農時期。後首来，甚至出現同時有兩個教廷搭兩位教宗个局面，主後1409年，巴黎大學个教授們提議召開比薩會議，會議中決議擔兩位教宗侪撤職，另立一位新教宗，然而迭趟會議法義个兩位教宗侪嘸沒出席，各國仍自擁各自認定个教宗，乃末比薩會議後形成了有三個教宗个局面。一直到主後1415年个康斯坦司會議，才正式取消脱三個教宗个職位，消除脱教会个分裂，也拿教宗个權力限制勒立法个團體就是大公會議，卻仍無法解決教廷腐敗个問題。終於勒1517年，馬丁路德發動宗教改革，因爲馬丁路德勒交关趟交大公教會个辯論中，始終堅持聖經權威高過主教權威个論點[5]，持守此觀點个新教噶嚜从大公教會分裂出來，新教也稱為改革宗、更正教、抗議宗或廣泛稱為基督教會。原來个大公教會，一般也稱為天主教，便仍保存原來个教廷交教宗制度，而新教由於馬丁路德人人皆祭司个觀點，強調每個個人侪可以藉由讀聖經、禱告直接明白上帝个旨意，弗需透過主教或神職人員作为媒介[5]，告咾產生了非主教制个教會體系，但依然有維持主教制个新教教會，即聖公會。
教宗个完整頭銜是：羅馬主教、基督之代表、宗徒長之繼承人、普世教會最高教長、意大利首席主教、羅馬教省總主教及都主教、梵蒂岡城邦元首及天主眾僕之僕（拉丁文：Episcopus Romanus, Vicarius Christi, Successor principis apostolorum, Pontifex Maximus, Primatus Italiae, Archiepiscopus ac metropolitanus provinciae ecclesiasticae Romanae, Princeps sui iuris civitatis Vaticanae, Servus Servorum Dei），但老少使用。天主教會認為教宗為初任羅馬主教，即耶穌十二門徒之一个伯多祿个後繼，告咾一開始稱呼伊為「伯多祿之代表」，直到11世紀教宗革命（又称格里高利改革）辰光才改稱為目前更具權威个「基督之代表」。2006年《宗座年鑑》刪脱「西方宗主教」（Patriarcha Occidentis）个稱呼。渠上一趟修訂勒1969年，伊歇教宗保祿六世擔「天主眾僕之僕」加勒名號当中，外加删脱「光榮在位」个語句[6]。
由於教宗勒中古時期擁有超乎西欧世俗君王而傍中国皇帝近乎对等个地位，曾勒明末清初畀汉译介绍为“教化皇”，继而影响周边同为汉字文化圈个国家[7]。另外勒西方世界，教宗有辰光也會得敬稱為「聖父」（英語對應詞：Holy Father），其意為「神聖个父親」，搭天主三位一體所指个聖父弗同[8]。
教宗畀天主教會認為是耶穌勒當今世界个代表，其主要任務即是領導耶穌建立个教會，並擔信仰傳佈到世界各個角落。教宗个教務職權稱其為「聖座」，是以教宗為中心構成个教務領導團體，除脱負責管理羅馬个天主教會，還有得代表交領導整個天主教會个功能，乃朝亦為國際法承認个主權實體，好搭世界各國締結外交關係。
除脱宗教职务之外，教宗也是梵蒂岡城國个国家元首，該國由聖座管治。梵蒂冈整个畀意大利首都罗马包围，勒1870年之前，教宗统治个区域一度拓展到整个意大利中部，其领土——即教廷国，畀称为「圣伯多祿个遗产」。尽管授予教宗对迭眼领土统辖权个文件，也就是所谓个《君士坦丁御赐教产谕》，勒15世纪畀证明是伪造个，教宗对教廷国个统治还是延续至1870年意大利统一，而意大利王國搭教宗之间最终个政治协议一直到1929年个《拉特兰条约》才得以实现。1948年通過个《意大利共和國憲法》，再次確定該條約个合法性交有效性。
教宗是由樞機組成个樞機團召開秘密會議互選產生个，一旦當選就是終身職，但中途可辭職。前任教宗逝世或辭職後，至繼任教宗選出前个職位空缺期，畀稱為「宗座從缺」。
乃朝个教宗選舉制度是勒1268年—1271年个三年空位期之後，勒1274年由里昂第二次大公會議採用个，包括樞機團勒选举辰光必須交外界隔離个規定；而教宗選舉自1492年起固定勒拉梵蒂岡个西斯廷禮拜堂舉行迄今。
教宗若望·保禄二世 （或译为约翰·保罗二世，Pope John Paul II）勒1978年58岁辰光畀选为教宗，也是自哈德良六世（1522年—1523年間在位）以来首位畀选为教宗个非意大利人。若望·保禄二世勒2005年4月2日19:37（UTC）逝世後，勒4月2日到18日期間產生职位宗座空缺，4月18日开始个教宗选举，用仔不足1日就選出德国籍枢机约瑟夫·拉青格為新任教宗，聖號為本篤十六世。
聖座发言人勒2013年2月11号宣布，当时85岁个教宗本笃十六世 （Pope Benedict XVI）因為健康因素，勒2月28日夜裏8点钟（歐洲中部時間）正式退位，成为公元1415年以来，首位主动请辞个教宗。[9]
2013年3月13号，梵蒂岡宣佈阿根廷个枢机豪赫·馬利歐·貝果格利歐當選教宗，尊號為方濟各（Pope Francis）。伊是額我略三世以後一千二百年來，第一位弗是歐洲出身个教宗；亦是天主教史浪第一位來自美洲及南半球个教宗，以及首位耶穌會出身个教宗。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
