孙权（182年7月5号－252年5月21号），字仲谋，吴郡富春（㬮朝浙江富阳）人，三国东吴开国君主，尊号大帝。十九岁辰光阿哥孙策遇刺身亡，渠就掌权成为一方诸侯。222年称吴王，建立吴国；229年称帝。统治江东地区长达五十两年，是三国时代统治者里向辰光顶长个。
身世
富阳军阀
孙权籍贯吴郡富春，养拉东汉光和五年。渠出生个家族是东汉阿末阶段冒出个富阳孙氏。渠场阿爸孙坚搭阿哥孙策，来拉东汉末年个局面当中，建立孙家个军阀势力，外加慢慢然担渠自个故乡吴越扩充到自个控制范围里向。建安五年（200年），孙策死脱，十八岁个孙权即位，成为江东事实丄个统治者。
定鼎江东
建安十三年（208年），孙权面对吞脱荆州个曹操，拣择搭流窜军头刘备结盟，让渠自个大将周瑜担任大都督，赤壁之战击破北方军队，奠定三国鼎立局面。之后，孙权担首都迁到建业（㬮朝南京）。居个也是南京正式建立大城市个开始。建安廿四年，孙权派吴越民族英雄吕蒙，击败赖拉荆州个山西人关羽，吞併荆楚，从此把牢东南全境，领土大险。毛一年后，渠麾下另一位吴越豪杰陆逊貤在夷陵之战灭著刘备个军队，从此，东吴疆域稳固。
称王称帝
公元222年，魏国册封孙权当吴王，孙吴事实独立，並开始使用自个年号黄武。七年之后，孙权正式称帝独立，年号改成功黄龙。孙权称帝后，执行搭蜀汉接近，拉拢蛮夷，对付魏国个策略，让魏国弗好南侵。同时，为扩大渠自个直辖编户齐民，渠也妆起剿抚山越个策略。同时，派人到海外捉百越人当渠自个人力，黄龙两年（公元230年），渠个臣子卫温、诸葛直便走臺湾，捉著交关百越人当奴隶。
继承风波
孙权寿命长险，活著七十几岁，然也造成渠自来拉继承人问题丄有反覆，引发臣子内斗，朝政混乱。太元元年，孙权死拉建业，享年六十九岁。渠在位三十年，谥号大帝，庙号太祖。坟头来拉南京老城东面梅花山上向。
贡献
孙权确立对江东实际统治个同时，北许个曹操率领大军南落，吴越人来拉江东个存亡受到威胁。孙权手下个大将周瑜来拉赤壁担曹操个主力部队灭脱，彻底让曹操统一帝国个幻想破灭，保存著吴越独立性，为之后江东个发展奠定著基础，影响邪气深远。
评价
孙权对吴越个贡献，搭渠自个人格魅力，让渠受著交关好评，司马光赞许渠“大帝承父兄之烈，师友忠贤，以成前志，赤壁之役，决策定虑，以摧大敌，非明而有勇能如是乎？奄有荆扬，薄于南海，传祚累世，宜矣”。却情，渠自个一眼缺陷，也畀后人直言弗讳然指出，《三国志》个作者陈寿就讲渠晚年反覆无常，埋落祸根。[1]
家庭
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
