From Wikipedia, the free encyclopedia
中秋节是东亚民间一个节日头,年加年古历八月十五。中秋节不单单华人过,日本、越南、韩国搭朝鲜也过。另外,伊朗人也过。
照中国古历来讲,古历八月是秋天第二个月日,早世讲仲秋,民间也讲中秋、秋夕、八月节、八月半、月夕、月节;貤架箇日夜里月亮顶圆,象征团圆,也讲团圆节。
中秋箇词,顶早记录在《周礼》里向,《礼记•月令》里头讲:“仲秋之月养衰老,行糜粥饮食。”不过朆讲清爽,是八月哪日。
唐朝过后,中秋节日脚定牢。相传讲杨贵妃做眠梦游勒月宫,一首霓裳羽衣曲得来,民间中秋节嚇开过。一般人忖,中秋节宋朝辰光作兴起,到得明清辰光,中秋节便是中国一大传统节日爻。
中秋节个故事里向,嫦娥飞月个名气顶大。
嫦娥飞月在拉民间有蛮多版本,下向讲一个:
相传讲在拉远古辰光,天上十个日头。大力士后羿用弓畀九个日头射落来,第十个太阳𢞕爻,听讲险,准时上山落山,老百姓都有福气。
后首来,后羿寻嫦娥做新妇娘。
一个日,后羿一包弗死药得来,讲箇弗死药吃落去,便会做神仙。后羿转去畀箇弗死药交畀嫦娥。
哬晓得后羿个徒弟蓬蒙想偷来吃,佢趁后羿走出外头去,偷畔爬进嫦娥个间里,逼佢交出弗死药。嫦娥弗肯,畀弗死药吃爻,随底变做仙女,一脚飞在拉月宫(月亮)里向去哉。
韩国人个放假表里畀“秋夕”个英文传做感恩节(Thanksgiving Day),秋夕在韩国是一个大月节头,会连牢放假三日。早时交通弗方便个辰光,民间会得趁箇辰光转老屋里望亲人。便今朝碰着秋夕,早一日,韩国各个大公司都会打折,吸引老百姓买物事送人情。
越南人古历八月半过中秋节,讲Tết Trung Thu(节中秋。“节”是喃字,“中秋”是汉越音) 。箇日夜里,小人要听阿贵个故事。越南小人在拉中秋夜里都要揢鲤鱼灯走出去嬉,有鲤鱼“蹿龙门”个意思。
日本传统个中秋节十五夜,也讲中秋明月、芋明月、栗明月。玱朞个日本人,中秋节都不过哉。箇日大家人生活都不做,僵屋里啤酒吃吃,月亮也弗望,只电视望望。传统文化沒落爻,后生人都弗晓得月节头怎而来搭何物意思,听着放假,只晓得箇日班弗用上哉。
伊朗个中秋节,名字讲Mehregān(波斯文: 或Jašn-e Mehr Mithra Festival)节,是琐罗亚斯德教个经典月节头,用来感谢yazata密特拉(波斯语:Mehr ),象征爱情、友好、光明之意。月份在伊朗历秋个7月份,也便是公历10月光景(塔吉克斯坦勒年加年10月8号过)。Mehrgān节在波斯帝国箇朞是庆祝隆重险。吤个辰光,道道国王带头办大仪式。后晚,在伊斯兰早个伊朗,过Mehrgān搭新年诺鲁孜节一样重要。后晚蒙古人打进伊朗爻,Mehrgān盛宴人气且凉落去爻。 箇玱,便只Yazd搭Kermān个琐罗亚斯德教徒还用奢华方式过箇Mehrgān节。另外,一许住在外国个伊朗人也会举行庆祝仪式过Mehregān节。
交关古代诗人写着歌颂中秋节个诗词。
明月几时有?把酒问青天。不知天上宫阙,今夕是何年。我欲乘风归去,又恐琼楼玉宇,高处不胜寒。起舞弄清影,何似在人间! 转朱阁,低绮户,照无眠。不应有恨,何事长向别时圆?人有悲欢离合,月有阴晴圆缺,此事古难全。但愿人长久,千里共婵娟。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.