Trappist Westvleteren

De Trappist Westvleteren (ouk wel enoamd 'Sixtus') is e trappist uut West-Vloandern. 't Is ebrouwn deur de poaters Trappistn uut Westvletern sedert 1839. Internationoale bierkenners die de Westvleteren ontdekt en, zeggn da de Westvleteren 12 't beste bier ter weireld is.^[1]

Dit artikel es geschreevn in 't Poperiengs, en da zou best ozô bluuvn. (by gebrek an Vleters)

---

Van links na reks: Westvleteren 12, Westvleteren 8, Westvleteren Blond

De vroage ahter 'n Trappist is grôot, moa de poaters refuseern voe mêer te produceern dan da ze strikt enoomn nôdig en.^[2] Ze brouwn moa om en by de 4.700 ectoliters per joar.^[3] Die schoarste verkloart dêels ouk 't weireldwyd succes.

Sôortn & uutzicht

De flesjes en gin etiket. Ol d'informoasje stoat op 't ulletje. Westvleteren is 'n ênigstn trappist woavan da 't officieel Trappist-logo nie op de flesche stoat; 't logo stoat wel op de typische outn bierbakkn.

• Trappist Westvleteren Blond (5,8%): emakt mi drie sôortn ommel uit de streke van Poperienge. 't Bier et e krudig aroma, is lichte van smoake, moa mit e bittere achtersmoake. 't Erkenn an 't groen ulletje.
• Trappist Westvleteren 8 (8%): e zoete, frutig (meloene) aroma. 't Erkenn an 't blauw ulletje.
• Trappist Westvleteren 12 (10,8%): 'n zoetsn poater. E romig aroma, en e vulle caramelachtige smoake. 't Erkenn an 't geel ulletje.
• Toafelbier Westvleteren 4 (4,5 %) (ollêne voe de poaters zelve, en dus nie te kopm).

Beperkt anbod

De Trappist is ollêne te kope in 't verkoopcenter van d'abdy Sint-Sixtus in Westvletern. De vroage is vele grodder dan 't anbod. Vroeger stoun d'otto's in e lange reke an te schuuvn om e bak te koopn. Moa sedert 2005 moe je belln vôor da je na d'Abdy komt. Je moe je nummerploate opgeevn en je ku ton maximum 2 bakkn ofoaln op 'n dag en d'eure da ze joen opgeevn.

Ouk in de geweune cafés is de Trappist Westvleteren ni te verkrygn, want en is is ollêne voe particuliern te kope. Iddern koper moet ten anger beloovn voe 't bier nie vodder te verkoopn. 't Bier ku je ollêne thuus drienkn, of in 't ontmoetingscentrum 'De Vrede', rechte tegenover d'abdy. Doa is 't er ouk een informoasjeruumte woar da j' mêer lêert over 't leven van d'abdygemêenschap, over de geschiedenisse van de brouwery en 't brouwproces.

In oktober 2010 rochte bekend dat de Poaters nunder bier ouk by de Colruyt gingn verkoopn. Z'addn geld nôdig vo de verbouwieng van d'abdy. ^[4]

Degustoasje

Je bewoart de flesjes best verticoal op e dounkere plekke tusschn de 12 en 16 groadn. E Trappist bluuft joarnlank goed: gif 't bier de tyd en 't rypt vodder (ollêne de bloun moe je rechtuut opdrienkn). De Trappist Westvleteren 8 en de 12 ku je beter nie in de frigo zettn. Mor e bloun smakt gekoeld 't beste.

Bronn

1. New York Times, 12/08/2005: When You Say Westvleteren, You've Said It All, URL bekeekn op 20/02/2008
2. Wall Street Journal, 30/11/2007: Trappist Command: Thou Shalt Not Buy Too Much of Our Beer, URL bekeekn op 20/02/2008
3. Het Nieuwsblad, 21/08/2006, URL bekeekn op 20/02/2008
4. Het Laatste Nieuws, 27/10/2010, URL bekeekn op 27/10/2010

Externe koppelienge

• De site van de poaters
• Ratebeer site: Westvleteren 12 is e topbier

Ofbeeldiengn die ier by passn ku je vien in de categorie Westvleteren beer van Wikimedia Commons.

{{{ofb_links}}}	De tien trappistnbiern	{{{ofb_rechts}}}	{{{ofb_groot}}}
Chimay – Engelszell – La Trappe – Orval – Rochefort – Tre Fontane – Tynt Meadow – Westmalle – Westvleteren – Zundert