Zavodoukovsk

Zavodoukovsk (ven.: Заводоуко́вск) om Venäman lidn Tümenin agjan suvipäivlaskmas. Se om Zavodoukovskan lidnümbrikon administrativine keskuz.

Zavodoukovsk
Заводоуковск

Lidnanznam	Flag
Valdkund	Venäma
Eläjiden lugu (2021)	27,100 ristitud
Pind	20,96 km²
Pämez'	Svetlana Kasenova (reduku 2020—)
Telefonkod	+7−34 542-xx-xxx
Avtokod	72
Aigvö	UTC+5 (MSK+2)

Istorii

Eländpunktan aluz om pandud vl 1729 kuti Ukovskai-külä (ven.: деревня Уковская). Vintegim radoi, i vl 1787 udesnimitihe Zavodoukovskoje-žiloks läz kaks' tuhad ristitištonke. Vspäi 1913 regulärine likund zavodihe Transsiban pohjoižsarakodme, Zavodoukovskai-raudtestancii om olmas. Vn 1939 kül'mkus kätihe radnikžiloks, mülüi Jalutorovskan rajonha. Vn 1960 26. päiväl sulakud Zavodoukovskoje-žilo sai lidnan statusad, ühtištuihe lähižidenke külidenke.

Vspäi 1963 lidn oli alištunu Jalutorovskan nevondkundale. Vspäi 1965 Zavodoukovsk oli ühtennimižen rajonan keskuseks, kätihe rajonad lidnanke lidnümbrikoks vl 2005.

Zavodoukovsk šingotase plastikan i polimeriden tegimel, mašiništonsauvomižen tegimel^[1] (treilerad, moduližed pertid, varapalad kivivoin da gazan tegimišton täht), sömtegimištol (lihakombinat i konditerine fabrik), sauvondmaterialiden kombinatal (raudbeton, gazbetonblokad, silikatine savič), mebel'fabrikal, plastikverkon tegimel maploduiden täht i omblendedheotandal.

Geografijan andmused

Lidn sijadase penen Uk-jogen randoil (ven.: Ук 55 km pitte, Tobolan oiged ližajogi), 75 metrad ü.m.t. keskmäižel korktusel. Matkad Tümenihesai om 94 km lodeheze orhal, 103 km avtotedme vai Transsib-raudtedme. Lähembaine lidn om Jalutorovsk 21 km lodeheze orhal, 26 km avtotedme vai raudtedme. «Tümen' — Omsk»-trass (R-402) om lidnan pohjoižröunaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 25 647 ristitud, lidnümbrikon viž ühesandest. Kaik 26 006 eläjad oli lidnas vl 2017. Kaikiš suremb lidnan ristitišt om 25..26 tuh. eläjid vspäi 1989 (26 800 rist. vl 1998 i om nügüd').

Ortodoksižen hristanuskondan ph. Jurgii-vägestusenkandajan jumalanpert'^[2] om saudud lidnas vll 1993−2004.

Agrotehnologižen kolledžan^[3] (Jalutorovsk) Zavodoukovskan palakund om lidnan professionaližen opendusen aluzkundaks. Edel 2019. vot sen nimi oli Zavodoukovskan agrotehnikum.

Lidnümbrikon pämez' om sen Administracijan pämez'. Edeline lidnümbrikon pämez' om Aleksandr Anohin (reduku 2011 — reduku 2020).

Galerei

• 
  Lidnan keskuz (2019), Zavodoukovskan lidnümbrikon administracijan sauvuz om vauged rusttanke tagamal
• 
  Ph. Jurgii-vägestusenkandajan jumalanpert', vn 2005 nägu
• 
  Sovetskai-ird i elevatoran sauvuz vl 2005
• 
  Telekommunikacijoiden i počtan sauvuz (2005)
• 
  Zavodoukovskai-raudtestancii vl 2011

Homaičendad

1. Zavodoukovskan maštegimen sait (kedrvagon.ru). (ven.)
2. Zavodoukovskan pühäpertid sobory.ru-saital. (ven.)
3. Agrotehnologižen kolledžan sait (yalagrokoll.ru). (ven.)

Irdkosketused

• Lidnümbrikon tobmuden aluzkundoiden oficialine sait (zavodoukovsk.admtyumen.ru). (ven.)
• Lidnan informacine sait (zavodoukovsk.ru). (ven.)

	Tümenin agjan lidnad (avtonomižita ümbrikoita)
	Išim | Jalutorovsk | Zavodoukovsk | Tobol'sk | Tümen'