From Wikipedia, the free encyclopedia
Sovetsk (ven.: Сове́тск) om Venäman lidn da lidnankund Tulan agjan keskuzpalas. Mülüb Ščokinon rajonha, sen kahtenz' lidn i koumanz' eländpunkt eläjiden lugun mödhe.
Ende Nikol'skoje-külä oli olmas lidnan sijas, om znamoitud vn 1793 kartal ezmäižen kerdan. Nügüdläine eländpunkt om registriruidud vn 1949 26. päiväl redukud kuti Ščokinon GRES:an sauvojiden Sovetskii-radnikžilo. Se sai lidnan statusad nügüd'aigaiženke nimenke vn 1954 31. päiväl tal'vkud, mülütihe Upinskii-žilod sihe.
Sovetsk šingotase Ščokinon GRES:al (radab londuseližel gazal, 400 MVt) i kalaedheotandal senno, mašinansauvomižen tegimel[1] (katilmašiništ, torvveimed, metalližkonstrukcijad), lämuzizoläcijan da konstrukcijoiden tegimel, personaližen gigijenan i bumagtegesiden tegimel, omblendfabrikal, mugažo mebel' kezaküläpertiden täht pästtase punümbriradajal tegimel.
Lidn sijadase rajonan päivnouzmaiženno röunanno, Upanjogen (ven.: Упа́ 343 km pitte, Okan oiged ližajogi) Ščokinon vezivaradimen (5,7 km²) hural randal, 200 m ü.m.t. keskmäižel korktusel. Matkad Tulan keskushesai om 25 km pohjoižhe orhal, 40 km avtotel vai raudtel, Ščokino-rajonkeskushesai (passažirraudtestancii) — 11 km lodeheze orhal, 18 km avtotedme vai raudtedme. Toine lähembaine lidn om Lipki 5 km päivnouzmha orhal vai 10 km avtotedme.
Sovetsk om lidnankundan üks'jäine eländpunkt. Lidnankundan pind — 10,58 km².
Vl 1959 lidnan ristitišt oli 10 099 eläjad, vl 1970 — 11 024 eläjad (kaikiš suremb). Vn 2010 Venäman rahvahanlugemižen mödhe lidnan eläjiden lugu oli 7 536 ristitud, rajonan seičeme procentad. Ortodoksižen hristanuskondan ph. Dimitrii Rostovalaižen jumalanpert' om olmas ani suvipäivlaskmha lidnaspäi Kostomarovo-küläs.[2]
Rahvahad (2010): venälaižed — 96,8%, toižed rahvahad — 3,2%.
Professionaližen opendusen aluzkundad ratas lähembaižiš lidnoiš.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.