Novokubansk

Novokubansk (ven.: Новокуба́нск) om Venäman lidn da lidnankund Krasnodaran randan päivnouzmas, Armaviran pohjoine kaimdailidn. Se om Novokubanskan rajonan administrativine keskuz.

Novokubansk
Новокубанск

Lidnanznam	Flag
Valdkund	Venäma
Eläjiden lugu (2023)	33,487 ristitud
Pind	27,97 km²
Pämez'	Pavel Manakov (reduku 2020—)
Telefonkod	+7−86 195-xx-xxx
Avtokod	23, 93, 123
Aigvö	UTC+3 (MSK+0)

Istorii

Eländpunktan aluz om pandud vl 1867 kuti Kubanskoje-žilo Kavkazan polkiden saldatoil erindas. Edel 1922. vot nimitaškanzihe sidä Novokubanskoje:ks. Vl 1961 kätihe sidä Novokubanskii-radnikžiloks. Vn 1966 11. päiväl kezakud se sai lidnan statusad nügüdläiženke nimenke. Lidn eli läbi sur'vedes vn 2002 kezakul, urzi dambad i veden korktuz lidnas ületi kaht metrad.

Novokubansk šingotase sömtegimišton keskuseks sijaližel torhudel (leibtegim, saharan tegim), mugažo sauvondmaterialiden tegimed oma olmas lidnas (savič krepindan täht^[1], profiline torv). Eläjiden znamasine pala radab Armaviras. Kon'jakan järed tegim om rajonan territorijal. KubNIITiM^[2] om federaližen «Rosinformagroteh»-tedoaluzkundan filial, om otnus maižandusen sferha.

Geografijan andmused

Lidn sijadase Kuban'-jogen hural randpolel, ühtes kilometras jogespäi, 145 m ü.m.t. keskmäižel korktusel.

Matkad Krasnodarhasai om 162 km päivlaskmha orhal vai 205 km avtotedme. Lähembaine lidn om Armavir, om nell' kilometrad matkad lidnoiden röunoiden keskes avtotedme. Kubanskai-raudtestancii (ven.: Кубанская) om olmas «Armavir — Kropotkin»-keskustal. Koumekilometrine sarak ühtenzoitab lidnad «Kavkaz»-avtotenke suvipäivlaskmas.

Tobmuz

Novokubansk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeližed lidnankundan pämehed oma Ruslan Kadirov (Руслан Кадыров, eloku 2018 — reduku 2020) i Aleksandr Jelisejev (sulaku 2016 — semendku 2018). Lidnan Nevondkundan ezimez' om Jevgenii Golovčenko vn 2018 elokuspäi. Edeline Nevondkundan ezimez' om Ruslan Kadirov (sulaku 2017 — eloku 2018).

Eläjad

Vn 2010 Venäman rahvahanlugemižen mödhe lidnan eläjiden lugu oli 34 880 ristitud, rajonan kaks' videndest, vn 2021 — 34 tuhad ristituid. Vll 2002−2021 lidnan ristitišt vajehtihe 34..35 tuhad eläjid röunoiš (35 440 rist. vl 2016, kaikiš suremb kaikes aigas). Vl 2018 lidnan ristitišt oli 35 287 eläjad.

Rahvahad (enamba 1 % vl 2010): venälaižed — 88,2 %, armenijalaižed — 6,3 %, ukrainalaižed — 1,6 %, toižed rahvahad — 2,7 %, rahvahuden ozutandata — 1,2 %.

Ortodoksižen hristanuskondan kaks' jumalanpertid oma avaitud lidnas: Ioann-jumalantedomehen i Jumalanmaman Katken.

Lapsiden opendusen aluzkundad oma seičeme päivkodid, koume keskškolad (nomer 1, 3, 4), gimnazii (nomer 2), kaks' aluzškolad (nomer 23 i 28), muzikškol, čomamahtoine škol, sportškol. Novokubanskan agrariž-politehnine tehnikum^[3] radab rajonan lähižes Pročnookopskai-stanicas, kudes kilometras lidnaspäi Kubanin vastrandal. Toižed lähembaižed professionaližen opendusen aluzkundad sijadasoiš Armaviras.

Galerei

• 
  Nevondkundaline lidnanznam (1977)
• 
  Jumalanmaman Katken jumalanpert', vn 2013 nägu (ende Ščerbak-pomeššikan erižpert')
• 
  «Hutorok»-maižanduzedheotandan kontor vl 2022
• 
  «Platon»-medkeskuz (2022)
• 
  «Legenda»-restoran vl 2022

Homaičendad

1. Novokubanskan keramižiden seinmaterialiden tegimen sait (nzksm.ru). (ven.)
2. Federaližen «Rosinformagroteh»-tedoaluzkundan Novokubanskan filialan (KubNIITiM) sait (kubniitim.ru). (ven.)
3. Novokubanskan agrariž-politehnižen tehnikuman sait (pu52kk.ru). (ven.)

Irdkosketused

• Novokubanskan lidnankundan tobmuden sait (ngpnr.ru). (ven.)

	Krasnodaran randan lidnad
	Abinsk | Anap | Apšeronsk | Armavir | Belorečensk | Gelendžik | Gul'keviči | Hadižensk | Hul Purde | Jeisk | Korenovsk | Krasnodar | Krimsk | Kropotkin | Kurganinsk | Labinsk | Novokubansk | Novorossiisk | Primorsko-Ahtarsk | Slavänsk Kubanil | Soči | Temrük | Tihoreck | Timašovsk | Tuapse | Ust'-Labinsk