Kinešm

Kinešm (ven.: Ки́нешма) om Venäman lidn da lidnümbrik Ivanovon agjan pohjoižpäivnouzmas. Se om agjan kahtenz' lidn eläjiden lugun mödhe, Kinešman rajonan administrativine keskuz (ei mülü sihe).

Kinešm
Кинешма

Lidnanznam	Flag
Valdkund	Venäma
Eläjiden lugu (2021)	79,936 ristitud
Pind	48,9 km²
Pämez'	Väčeslav Stupin (eloku 2020—)
Telefonkod	+7−49 331-xx-xxx
Avtokod	37
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1429 kuti muretud totarlaižil. Se oli kalanpüdajiden pen' slabad eziauguižešti, kazvoi i kändihe torguindposadaks aigan mändes. Vspäi 1616 oli Kinešman makundan keskuseks. Vl 1758 ezmäine kanghiden tegim radaškanzi siš. Žilo sai makundan lidnan statusad vl 1777. Raudte ühtenzoitab Moskvanke vspäi 1871.

Kinešm šingotase mašinansauvomižel (avtopalad, tegesed metalližiš tuhkišpäi), bumagkanghiden tegimil, pälembaižiden sobiden omblendedheotandoil, himižel tegimel, sauvondmaterialiden pästandal (lämoinvastaižed materialad, betonižed tegesed), sömtegimištol (leibäntegesed, jauh, kagrasižed hel'pked, jähine).

Geografijan andmused

Lidn sijadase Volgan Gor'kijan vezivaradimen oiktal randal, 110 m ü.m.t. keskmäižel korktusel. Kinešemk-jogi (ven.: Кинешемка 34 km pitte) lankteb Volgha lidnan territorijal. Matkad Ivanovohosai om 86 km suvipäivlaskmha orhal, 103 km avtotel vai raudtel. Lähembaižed lidnad oma Navoloki 10 km päivlaskmha orhal vai avtotedme, i Zavolžsk Volgan vastrandal 1 km pohjoižpäivnouzmha orhal vai 2 km avtotedme. Vspäi 2003 avtotesild ühtenzoitab Zavolžskanke. Kinešm-raudtestancii i Kinešm-2-jüguraudtestancii ratas lidnas.

Kinešm om lidnümbrikon üks'jäine eländpunkt.

Eläjad

Vl 1939 lidnan ristitišt oli 75 165 eläjad. Vn 2010 Venäman rahvahanlugemižen mödhe lidnan eläjiden lugu oli 88 164 ristitud. Kaikiš suremb ristitišt oli 100..105 tuhad eläjid vozil 1975−1999 (105 tuh. rist. vll 1986−1987 i 1991).

Rahvahad (2010): venälaižed — 97,3%, toižed rahvahad — 2,7%.

Ortodoksižen hristanuskondan 22 pühäpertid^[1] oma olmas lidnas: Jumalanmaman Emäganpäivän kafedraline päjumalanpert', ph. Stroican päjumalanpert', kaks'toštkümne jumalanpertid, seičeme časounäd i vanhuskolaižiden loičendpert'. Islaman loičendpert' om avaitud.

Professionaližen opendusen aluzkundad oma Kinešman tehnologine tehnikum^[2], Kinešman medicinine kolledž^[3], Kinešman politehnine kolledž, Kinešman pedagogine kolledž. Valdkundaližen üläopendusen kaks' filialad ratas lidnas: Moskvan industrialižen universitetan i Ivanovon tekstiližen akademijan.

Edeline lidnümbrikon pämez' om Aleksandr Paholkov (Administracijan pämez', sulaku 2016 — heinku 2020).

Galerei

• 
  Policijan palakund (2018, istorine žandarmerii), lidnümbrikon tobmuden sauvuz nägub vaiše paloin
• 
  Jumalanmaman Emäganpäivän kafedraline päjumalanpert', vn 2013 nägu
• 
  Pühän Stroican päjumalanpert', vn 2020 nägu
• 
  «Tomna»-fabrik vl 2013
• 
  Jogiport vl 2006
• 
  Kinešman pedagogine kolledž (2018)
• 
  Kinešman dramteatr A.N. Ostrovskijan nimed (2012)
• 
  Kodirandantedištandmuzei Leninan irdal (2018)
• 
  Avtotesild Volgas päliči vl 2007
• 
  Kinešman päraudtestancijan sauvuz läz avtostancijad vl 2010

Homaičendad

1. Kinešman pühäpertid sobory.ru-saital. (ven.)
2. Kinešman tehnologižen tehnikuman sait (ктти.рф). (ven.)
3. Kinešman medicinižen kolledžan sait (огбпоу-кмк.рф). (ven.)

Irdkosketused

• Lidnümbrikon Duman sait (kineshma-duma.ru). (ven.)
• Lidnan Administracijan sait (admkineshma.ru). (ven.)

	Ivanovon agjan lidnad
	Furmanov | Gavrilov Posad | Ivanovo | Jurjevec | Juž | Kinešm | Kohm | Komsomol'sk | Navoloki | Plös | Privolžsk | Pučež | Rodniki | Šui | Zavolžsk | Teikovo | Vičug