Kotovsk (Venäma)
From Wikipedia, the free encyclopedia
From Wikipedia, the free encyclopedia
Kotovsk (ven.: Кото́вск) om Venäman lidn da lidnümbrik Tambovan agjan keskuzpalas. Se om agjan videnz' lidn eläjiden lugun mödhe. Lidn om ümbärtud Tambovan rajonan territorijal.
Lidnanznam![]() | Flag![]() |
Valdkund | Venäma |
Eläjiden lugu (2021) | 28,663 ristitud |
Pind | 30,81 km² |
![]() | |
Pämez' | Aleksei Plahotnikov (kül'mku 2015—) |
Telefonkod | +7−47 541-xx-xxx |
Avtokod | 68 |
Aigvö | UTC+3 (MSK+0) |
Eländpunktan aluz om pandud mecan sijha vl 1914 Nikolai II-carin käskön mödhe kuti valdkundaline Porhtegim-radnikžilo (ven.: рабочий посёлок Пороховой Завод) sauvomha da holitamha porhan tegint. Vhesai 1917 vaumitihe raudted i lämuzelektrokeskust. Vl 1918 se oli Udarnik-žiloks. Udesnimitihe Rusked Torač-žiloks (ven.: Красный Боевик) vl 1919. Kätihe sidä Tambovan rajonaks vn 1938 uhokul. Rajon sai erižen lidnan statusad vn 1940 16. päiväl sulakud, udesnimitihe nügüdläižikš Rahvahanikoiden sodan Grigorii Kotovskii-kombrigan muštoks. Toižen mail'man sodan aigan lidn oli alištunu bombardiruindale, sur' lämoipalo tegihe porhtegimel vn 1942 heinkus.
Kotovsk šingotase himižil tegimil (porhtegim i plastikan tegim), sauvondmaterialiden pästandal (lämuzizoläcijan i keramižtegesiden tegimed), ratud nahkan tegimel, elektrokomponentoiden «Almaz»-edheotandal, sömtegimištol (leibtegim) i meblin pästandal.
Lidn sijadase rajonan suviröunanno, Cnanjogen oiktal korktal randal (ven.: Цна 451 km pitte, Okan oigedpol'ne bassein), 130 m ü.m.t. keskmäižel korktusel. Kotovskan vezivaradim (vai Tambovan, 21 km², 128 m ü.m.t.) Mectambov-jogel om olmas kahtes kilometras päivnouzmha lidnaspäi vspäi 1995. Matkad Tambovan röunhasai om kahesa kilometrad pohjoižhe orhal vai 15 km avtotel. Toine lähembaine lidn om Rasskazovo 27 km päivnouzmha orhal vai 41 km avtotedme. Ei ole passažirühtenzoitust raudtedme vspäi 1996, Kotovsk-raudtestancii om sauptud, Tambov II-stancii kävutase vaiše jüguiden täht, erine sarak tuleb Tambovaspäi lidnha.
Kotovsk om lidnümbrikon üks'jäine eländpunkt. Lidnümbrikon pind — 30,81 km².
Vl 1916 žilon ristitišt oli kahesa tuhad eläjid, vl 1959 kaik 25 511 ristitud elihe lidnas. Vn 2010 Venäman rahvahanlugemižen mödhe lidnan eläjiden lugu oli 31 850 ristitud. Kaikiš suremb lidnan ristitišt oli 37..38 tuhad eläjid vll 1979−1998 (38 600 rist. vl 1992).
Rahvahad (2010): venälaižed — 97,9%, toižed rahvahad — 2,1%.
Ortodoksižen hristanuskondan jumalanpert'[1] om olmas lidnas, toine Raštvoiden pühäpert' om sauvomas.
Kotovskan industrialine tehnikum[2] om lidnan professionaližen opendusen aluzkundaks.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.