From Wikipedia, the free encyclopedia
Kolombo (singal.: කොළඹ [ˈkəlɐmbɞ], tamil.: கொழும்பு [koɻumbu], angl.: Colombo [kəˈlʌmboʊ]) om Šrilankan kaikiš suremb lidn, valdkundan ižandusen i kul'turan keskuz. Se om Päivlaskmaižen agjan administrativine keskuz, mülüb sihe.
Lidnanznam![]() | Flag![]() |
Valdkund | Šrilank |
Eläjiden lugu (2011) | 752,993 ristitud |
Pind | 37,32 km² |
![]() | |
Telefonkod | +94−11 |
Aigvö | UTC+5:30 |
Araban, Kitain i Riman torgovanad oleskeliba eländpunktan merikaras kaks' tuhad vozid tagaz. Portugalijalaižed tuliba lidnha 16. voz'sadal, alamalaižed anastiba sidä vl 1656. Vll 1802−1982 Kolombo oli saren oficialižeks pälidnaks: ezmäks britanižen Ceilon-kolonijan, vspäi 1948 Ceilon-dominionan, vspäi 1972 — ripmatoman Šrilank-valdkundan.
Kolombo šingotase järedal meriportal (kaikiš surembišpäi Suviazijas), industrii mülütab nenid sarakoid: himine, tekstiline, kivivoinümbriradai, stöklan i cementan pästand, punümbriradai, nahkoiden ümbriradmine i kengiden tehmine, juvelirtegesiden edheotandad.
Lidn sijadase saren päivlaskmas, Indižen valdmeren randal, 1 m ü.m.t. keskmäižel korktusel. Valdkundan Šri Džajavardenepura Kotte-pälidn om saudud ani päivnouzmha Kolombospäi.
Klimat om ekvatorialine tropižiden vihmmecoiden, päivoikaz vilukus-sulakus. Kun keskmäine lämuz om +27,2..+28,9 C°. Ekstremumad oma +16,4 C° (viluku) i +36,1 C° (keväz'ku). Paneb sadegid 2397 mm vodes, enamba semendkus (314 mm) i redukus-kül'mkus (346..359 mm kus), vähemba vilukus-uhokus (78..80 mm kus). Kun keskmäine relätivine nepsuz vajehtase 69..73 % röunoiš tal'vkus-keväz'kus, 75..79 % sulakus-kül'mkus.
Vl 2011 lidnan eläjiden lugu oli 752 993 ristitud. Kaik 5,6 mln ristituid elädas lidnaglomeracijas 3 684 nellikkilometrad pindal (2011), valdkundan nelländez.
Znamasine üläopendusen aluzkund om Kolombon universitet[1] (angl.: University of Colombo, 37,6 tuh. üläopenikoid). Sen paloiden alused oma pandud vl 1870 kut Ceilonan medškol (medkolledž vspäi 1880) i vl 1921 kut Ceilonan universitetine kolledž. Om universitetan statusanke vn 1942 heinkuspäi.
Avtobusad, koumekezraižed avtorikšad i taksikebad oma kundaližeks transportaks lidnas. Koume avtovagzalad oma Bastian Mavath, Keskuzline i Gunasinghapur. Nell' raudtejonod ühtenzoittas ezilidnoidenke. Kaik nell' avtoted lähttas sarehe. Kolombon port om konteineroiden ümbriradandan sija meritel Azijaspäi Evrophasai. Ehtatim ühtenzoitab lidnad Indijan Tuttukkudi-lidnanke (Tutikorin).
Rahvahidenkeskeine soda- da civiline Ratmalan-lendimport (angl.: Ratmalana International Airport vai Colombo International Airport, Ratmalana, singal.: රත්මලාන ජාත්යන්තර ගුවන්තොටුපළ Ratmalāna Džātjantara Guvantoṭupaḷa, tamil.: இரத்மலானை சர்வதேச விமான நிலையம், Iratmalāṉai Sarvadesa Vimāṉa Nilaijam, RML / VCCC) sijadase 15 km suvhe lidnan keskuzpalaspäi.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.