Pupo (cantante)

Pupo, nome d'arte de Enzo Ghinazzi (Pontiçin, 11 de setenbre del 1955), el ze un cantante, prezentador tełevizivo e dopiator itałian.

Pupo

Biografia
Nasimènto	(it) Enzo Ghinazzi 11 de setenbre del 1955 (70 ani) Łaterina (Itàlia)
Dati personałi
Altri nomi	Pupo Silver
Atività
Ocupasion	cantautor, cantante, conpozitor, dopiador, prexentador de tełevixion, artista discogràfego
Atività	1975
Zènare	Pop
Instrumento muzicałe	Voze
Targheta discogràfega	Baby Records, CGD, Discomagic
Àlbun	16
Àlbun stùdio	12
Àlbun dal vivo	1
Àlbun compilation	3
Repertòrio
Rock Pop
Sito web	pupo.tv

Biografia

Pupo el nase a Ponticino, frasion de'l comùn de Łaterina, Pergin Valdarn e Siviteła in Val de Chiana in provinsia de Areso. Só pare el fazéa el postìn, só mare ła cazałìna. Tuti do i zenidori i zera inpenjài da'l canto e da ła resitasion ; só mare ła cantava in arcuanti cori de'l łogo indove łori i vivea, só pare inte l'otava rima toscana, só nono Santi Ghinazzi el jera soranomenà el poeta.

Inte'l 1975 el ga ezordìo cofà cantante a ła Baby Records. Ła só prima canson ła ze Ti scriverò. El só primo àlbun el resałe invese a'l 1976 e el se ciama Come sei bella. Inte'l 1978 el otien el gran suceso prima co Ciao e indrioman co Gelato al cioccolato, scrita co Cristiano Malgioglio.

Inte el 1980 el partesìpa a'l Festival de Sanremo co Su di noi, che ła deventa una de łe só canson più conosùe. 'Sta canson ła vien incluza inte l'àlbun Più di prima, co un só altro gran suceso, Firenze Santa Maria Novella, indove el canta el só amor par el caòłogo toscan. Inte'l 1983 el se prezenta da novo a Sanremo co'l brano Cieli azzurri e inte'l 1984 co Un amore grande che'l gaveva scrito co Umbberto Tozzi e Giancarlo Bigazzi. In 'sta edision el sostituìse Loretta Goggi che ła gavarìa dovesto ezibirse co ła stesa canson. Inte'l 1987 el vinse el Zecchino d'oro scrivendo Canzone amica, cantàda da Fabio Etter. Daspò ani de crizi, dovùa anca a i problemi che'l ga avùo par el zogo de azardo (de riscio) inte'l 1992 el torna a Sanremo cantando La mia preghiera. Anca 'sta volta el deside da partesiparghe a l'ùltemo momento a càuza de ła scuałìfega che ła zera stada fata a i dani de Jo Squillo, che ła s'avea prezentà co'l só vero nome e conjome, par po' reciapar el só pseudonemo più conosùo.

No'l ze stà soło autor de testi, ma el ga scrito anca canson par altri, cofà par ezenpio, Sarà perché ti amo (conposta da'l mestro Dario Farina, par ła cuała, co Daniele Pace, el ga scrito el testo), cantada da Ricchi e Poveri. Tante só canson łe ze stàe tradote in todesco, franseze, ingleze, spanjoło. El ze un mucio famozo in Rusia, (indove el s'a ezibìo in desine de conserti) e el ze ndà a ezibirse in volta par tuto el mondo.

In 'sti ùltemi ani se ło ga visto partesipar a diverse trazmision in tełevizion cofà : Quelli che il calcio (dove el zera l'inviato da Firense che vardava ła AC Fiorentina de cui el ze un gran tifozo) e senpre so'l picoło schermo el se gaveva contà inte Il Funambolo.

Inte el 2005 el ze inviato in Braziłe de ła segonda edision de'l reality show La fattoria che'l ło relansa in tełevizion. Inte l'istà de'l 2005, par ła prima volta, el prezenta un programa tuto suo Raiuno, el quis Il Malloppo. Grasie a'l suceso che'l otien co 'sto programa ghe vien fidà de prezentar Affari tuoi, programa che'l zera stà prezentà co suceso da Paolo Bonolis. El cantante, dopo èsarse un fià fermà a marso 2006 a càuza de na tournée, drioman el se refuda de prezentar ła trazmision anca inte ła stazon 2006/2007 (invitando ła Rai a far repozar el programa parche'l va canbià), tacando invese a prezentar un novo programa par l'istà, Tutto par tutto, e in inverno, el inpresta ła voze a Hammy, personazo de ła Dreamworks La gang del bosco. Inte l'istà de'l 2007 el prezenta el preserałe "Reazione a catena - L'intesa vincente so Raiuno. Pa'l primo canałe l'è stà ciamà anca a prezentar serti programi test: el primo a desenbre 2007 ze stà Chi fermerà la musica (che po' el ze stà trazmeso regołarmente in prime time in primavera), e a zenaro Tutti alla lavagna. In istà el prezenta da novo L'intesa a catena.

Da'l 20 de setenbre 2008 el ga prezentà co Ernesto Schinella, el puteło zlansà da Ti lascio una canzone, Volami inte el cuore inte'l sabo sera de Raiuno. A novenbre da'l Casinò de Saint Vincent La Notte dei Poker 3 in onda da'l 1° zenaro so Sky Sport 2, prodoto da 2Bcom.

Inte'l 2009 el partesìpa novamente a'l Festival de Sanremo co ła canson L'opportunità, co Paolo Belli e Youssou N'Dour. El brano el riva in finałe e el razonze el segondo posto inte ła clasìfega de iTunes.

Da'l 6 de marso a'l 1° de majo 2009 el ga prezentà ła sètema edision de ła trazmision I raccomandati, trazmesa onji vènare in prima serada so Raiuno.

El ze stà un zogador de azardo, da'l poker a'l cazinò. A ze propio par 'sto visio che'l ga perso un mucio de schei; el só amigo Gianni Morandi el ło ga agiutà a saldar i dèbiti inprestàndoghe inte i ani novanta duzento miłion de franchi. Inte'l 2008 Pupo el ga saldà el debito co'l só amigo, montando so'l palco faséndoghe na sorpreza a Morandi che'l zera drìo ezibirse durante un só spetàcoło danansi a łe tełecamare de Striscia la Notizia. El ga anca scrito un łibro "Banco solo! Diario di un giocatore chiamato Pupo" so ła małatìa dovùa a ła pasion par el zogo de azardo, che comuncue no'l ga perso. Infati inte'l 2007 el comenta co Fabio Caressa e Stefano De Grandis so SKY Sport La Notte del Poker, el primo canpionato itałian de poker al Cazinò de Venesia, prodoto da 2Bcom e el canta anca ła canson che łu el gavéa scrito; drioman el partesìpa da zogador a La Notte del Poker - Celebrity Edition, torneo zogà da vip, co ła partesipasion de Katia Ricciarelli, Rosita Celentano, Marco Baldini, Paolo Brosio, Giulio Scarpati, Andrea Delogu, Fabio Caressa, Alessandro Haber, Gianni Cavina, Manuela Moreno e Lillo de'l doto comico Lillo & Greg. Ad apriłe 2009 l'è uno dei promotori de Stars for charity - Poker par l'Abruzzo, prodoto da 2Bcom e prezentà da Giorgia Surina, a favor de i taremotà d'Abruso a cui ze stà donà el montepremi de 150.000 euro. Insieme a eło partesìpa anca el zogador de bałon Francesco Totti, el siador Giorgio Rocca, ła showgirl Pamela Camassa, el cantante de i Zero Assoluto Thomas De Gasperi e el comico Lillo. El partesìpa a un mucio de convenji so'l zugo contando come che se fa ad usir da'l visio de'l zogo.

Da l'8 de zenaro 2010 Pupo el prezenta, par ła segonda volta, l'otava edision de I raccomandati, in onda in prima serada so Raiuno.

Pupo el ga partesipà par ła sesta volta, a'l Festival de Sanremo 2010, in conpanjìa de Emanuele Filiberto e a'l tenor Luca Canonici. El trio el prezenta na canson definìa "patriòtega" verso l'Itałia, el cui titoło el ze Italia amore mio. 'Sta canson parò no ła ze mìa ben acolta da parte de'l pùblego in sała, che clamorozamente fiscia el trio, deventando cusì el cazo de'l festival, ła riva in finałe e ła razonze el segondo posto Pupo ed Emanuele Filiberto i ze definìi i vinsidori morałi de'l festival.

Dopo el gran suceso de ascolti de I raccomandati, el diretor de Rai Uno, Mauro Mazza el convinse Emanuele Filiberto di Savoia a prezentar Ciak... si canta da'l 12 de marso 2010 so Raiuno in sostitusion de Pino Insegno e Miriam Leone. Pupo el ze de fato so Rai Uno tuti i vènare par più de 5 mezi consecutivi.

Come za dito prima, ła cubia Pupo ed Emanuele Filiberto de Savoia, ła ga fato susitar un mucio de połemiche, sia par ła partesipasion a'l Festival de Sanremo, sia parchè i gavéa prezentà I raccomandati e Ciak...si canta!, tanto da menasar e ofénder el cantante toscan so'l propio blog. Infati inte'l meze de marso, de łe persone injote łe gaveva scrito so'l blog de Pupo: "Nano, se non ripudi il Principe, hai le ore contate". Pupo el comenta 'sto manàso dizendo patòco "Non ho nulla da nascondere, farò denuncia contro ignoti" (no go njente da scónder, farò na denunsia contro injoti). Infati in sèvito a 'sto fato el ga denonsià a ła Połisia postałe de Roma 'sto menàso. Inte'l łujo 2010 el prexenta Napoli Prima e Dopo: ła trazmision ła fa record de ascolto in prima seràda durante tuta l'istà de Rai Uno (cavando łe partìe de bałon de i Mondiałi). Inte l'agosto de'l 2010 el inpresta ła voze a l'ałan protagonista de Sansone. A setenbre 2010 el reprende a prezentar Attenti a Pupo so Radio 1 Rai e a zenaro 2011 pa'ła tersa volta el ga prezentà i Raccomandati in prima serada so Rai 1. A febraro de'l 2010 el ga prezentà so Radio 1 e Rai 4 pontade spesiałe dedicàe a'l Festival de Sanremo "Attenti a Sanremo... dopo il festival" . A łujo 2011 el ga prezentà co Elisa Isoardi Miss Italia inte'l mondo e par ła segonda volta Napoli Prima e Dopo. A setenbre 2011 el retaca a prezentar de Attenti a Pupo so Radio 1 Rai da'l marti a'l vènare a łe 13.30. A febraro 2012 vien publegà e vendùo el só primo romanzo noir La Confessione, stanpà da Rizzoli, che daspò na setemana da l'insida, l'è suìto in restanpa. A setenbre 2012 el torna in Raidio so Radio 1 Rai co ła cuarta edision de Attenti a Pupo e co'l novo programa setimanałe Passato contro Futuro trazmeso el zioba dopo el Gr Rai de ła mezanote. Senpre inte'l meze de setenbre el torna so Rai 1 inte ła zurìa de Ti lascio una canzone, el programa de'l sabo el sarà prezentà da Antonella Clerici.

Vita privata

El xe spoxà dal lujo del 1974 co Anna e el ga na rełasion dal 1989 co ła Personal Manager Patricia Abati. El ga scrito l'ino de łe do squadre toscane par cui el tifa: Fiorentina (è Fiorentina) e Areso (Canzone Amaranto). Pupo xe inpegnà anca inte el sociałe e el xe uno dei fondadori de ła Nasionałe itałiana cantanti, de cui el xe stà prexidente da zugno 2007 fìn al 2010, ano inte el cuało el se ga dimeso da l'asociasion. El ga tre fìe: Ilaria, Valentina (nata da na rełasion extraconiugałe) e Clara. Inte el 1999, col ga quarantaquatro ani, el deventa nono de Leonardo e inte el 2010 riva ła segonda neodìna. Viola, entranbi fiòi de ła primogenita Ilaria. Inte el 2012 riva el terso neodìn. Matteo, so fiòło de ła segondogenita Valentina.

Curioxità

• Xontà a La Confession Pupo ga scrito do łibri so sè steso. El primo, usìo inte el 2001, e publicà da Rai-Eri, se intitoła "Un enigma chiamato Pupo", e ła xe na autobiografia rełatìva al so pasà. El segondo, insìo l'11 setenbre 2005, el dì del so sinquanteximo conpleano, e ga par titoło "Banco solo! Diario di un giocatore chiamato Pupo" e rivarda ła so pasion par el xogo de axardo che in pasà ghe ga simentà difarenti problemi.^[1]
• In un'intervista a Telesette el ga contà un anètodo rełatìvo a quando ch'el gheva partesipà al Festival de Sanremo del 1980, indove l'avea cantà Su di noi:"Dovevo esibirmi subito dopo Morandi ed ero talmente agitato che mi scappava la pipì. Gianni stava par finire il brano e io, non facendo in tempo a raggiungere il bagno, l'ho fatta in un cappello appoggiato a una sedia... Chissà di chi era!"

"Gavea da exibirme suìto dopo Morandi e jero cussì agità che me scanpava pisìn. Gianni zera drìo fenìr el so brano e mi, no fasendo in tenpo a rivar el bagno, ło go fato in un capèło puxà a na caréga... Chisà de chi ch'el gera".^[2]