From Wikipedia, the free encyclopedia
La Storia de lo Zinbabwe la xe ona de le pi interesanti inte l’Africa Australe. L’inpero de Monomotapa el rimane ono de i pi inportanti del continente, e anca intrigante par la dificoltà che se ga a cairne l’evolusion dal XV secolo in poi. En tenpi moderni, el Zinbabwe el xe stà al sentro de le cronache par la so guera de libarasion e, ancò, par la dificoltà a cresar come nasion soto la guida del ditator Robert Mugabe.
I primi abitanti de lo Zinbabwe i xera grupi de racoglitori-caciatori del grupo pigmeo Dopo de lori i xe rivà i bantu in varie ondate. I bantu i ga creà vari sentri de potere locale.
Verso el XIV secolo, le sità Stato le se ga unio on poco a la olta fin a cuerzar el teritorio de lo Zinbabwe. L’opera de unificasion la xe stà fata da i shona,[1] che i ga fondà el inpero del Monomotapa co cavedal a Grande Zinbabwe, da cui vien el nome de lo Stato odierno. La sità de Grande Zinbabwe la xera serà da grose mura de piera e da tori coniche che controlava i punti de avicinamento.
Le tecniche de costrusion le xe oncora ancò usade de i abitanti de la zona. La siviltà Monomotapa la ga fondà la so richeza so el sfrutamento de le miniere de fero e de oro. El materiale laorà el vegnea portà a Sofala, so la costa del Mozanbico del nord par esar vendù a i marcanti arabi. Lo scanbio el xera in do diresioni, visto che a Grande Zinbabwe i archeolgi i ga catà vaselame cinexe, monede persiane e cinexi, e parsino ogeti romani e greci. El regno el ga ragiunto el so apice in tel XVI secolo co el re Matope. Dopo de lu el ghe stà on continuo decadimento.
Co l’arivo de i portoghexi inte la region, i marcanti arabi i xe stà mesi da parte. I portoghexi i xe rivà a Grande Zinbabwe in tel 1505. La caxa reale la se sa convertio al catoliceximo, ma no ghe stà na colonizasion del regno.
En tel XVII secolo i roswi, on popolo bantu, el ga invaso el regno e distruto la siviltà del Monomotapa. I roswi i xe stà conquistà e dispersi da i ndebele in tel 1820 e ani seguenti co l’invasion del re Mzilikazi. El regno de i ndebele el xera pi largo del Zinbabwe de ancò. El regno ndebele el xe finio in tel 1888 co el re Lobenguela el ga firmà i acordi de sfrutamento minerario co Cecil Rhodes.
I inglexi i ga dato a Cecil Rhodes e a la so Conpania Britanica del Sudafrica el dirito de sfrutar i teritori che ghe darà vita a Zanbia e Zinbabwe. Dal 1888 al 1923, la Conpania Britanica del Sudafrica la ga controlà el teritorio come na propietà personale de Rhodes prima (fin a la so morte in tel 1902) e de la Conpania dopo.
Par estendar el so potere, Rhodes in no ga vu paura de formar on esercito privato par conbatar contro i regni locali che no volea sotometarse a lu. En tel 1893, le so trupe le ga conbatu contro i ndebele par la conquista de Bulawayo, cavedal de lo Stato. A novenvre Bulawayo la xe stà conquistà da le trupe tswana. El re el xe scanpà e ga meso el canpo ne la zona del fiume Shangani. I soldadi ndebele i ga sorpreso le trupe de Rhodes la note del 3 dicenbre e i ga copà tuti. La vitoria la xe stà de corta durata. En tel genaro 1894, el re Lobenguela el xe morto, e i ndebele i xe stà presto vinti. Na olta che tuti i teritori i xe stà soto el so controlo, Rhodes al ga dato el nome de Rhodesia. El teritorio de la Rhodesia nol xera na colonia inglexe, ma na propietà privada de Rhodes.
En tel marso 1896, ndebele e shona i se sa unio par parar via i omeni de Rhodes. Mlimo, on cao spirituale de i ndebele, el ga selto quel periodo parché na bona parte de i soldadi de Rhodes i xera in tle Transvaal do i volea far el colpo de Stato contro Paul Kruger. La seconda guera contro i nedebele la xe finia in tel otobre 1897. co Mlimo el xe morto e Rhodes el se sa presentà solo e disarmà al canpo de i nebele, dimostrando on gran corajo e sangue fredo.
En tel 1898, la Rhodesia la xe stà divixa in teritori del Sud (Zinbabwe) e del Nord (Zanbia). En tel 1923, la Rhodesia del Sud la sa ga dato na Costitusion e la xe diventà colonia autonoma a l’interno de l’inpero britanico.
En tel 1953, i inglexi, contro l’opinion de i coloni e de i nativi, i ga creà la Federasion de Rhodesia e Nyassaland, metendo insieme le do Rhodesie e el Nyassaland (ancò Malawi). La cavedal de la Federasion la xera a Salisbury (ancò Harare). La Federasion la xe durà fin al 31 dicenbre 1963. Dopo poco, i vari teritori che formava la Federasion i xe diventà indipendenti.
El 11 novenbre 1964, Ian Douglas Smith, primo ministro de la Rhodesia, el ga firmà na dichiarasion de indipendensa dal Regno Unio. La Rhodesia la xera za in discusion co el Regno Unio par rivar a l’indipendensa. La mosa de Smith la ga catà tuti de sorpresa. Smith el xera sostegnù da la minoransa bianca, che la sostegnea anca la forma de apartheid de Smith. Nesun Stato el ga riconosù l’indipendensa de la Rhodesia e anca la popolasion nera la xera contraria: da la colonia la pasava a esar governada da na minoransa che la tegnea in man tute le richeze del paexe.
Smith el ga podù far sta mosa parché el gavea el sostegno del Sudafrica (che el ga fornìo armi e altri aiuti militari) e del Portogalo (che ga parmeso l’uso de i porti del Mozanbico par esportar i minerali e inportar i beni necesari a far funsionar el paexe).
Dal 1966 al 1979, la Rhodesia la ga visù ono de i momenti pi dificili de la so vita. La guera Sivile parché Smith el ga rifiutà de dare a la popolasion nera i stesi diriti de i bianchi. I cai de la guera sivile i xera Robert Mugabe e Joshua Nkomo. I do i xera a cao de do diverse coalision de oposision a Smith. En tel 1971, i do grupi – ZANU e ZAPO – i se sa unio contro el governo Smith.
En tel 1974, l’indipendensa del Mozanbico la ga vu grose ripercusion in Rhodesia. El presidente mozanbicano Samora Machel el ga revocà el parmeso de usar el porto de Beira.
Dopo el Mozanbico anca el Sudafrica el ga ritirà el so sostegno. Smith el se ga catà in on canton. Dopo do ani de tentativi, el ga verto la posibilità del dialogo. Smith el ga scominsià a parlar co Abel Muzorewa, on vescovo anglicano che el ga fondà el Consilio Nasionale Africano Unio el tel 1974. Murozewa el xera on nasionalista, ma el ga volù tentar la strada de dialogo pitosto che quela de la violensa. Visto che il dialogo el xera pieno dpromese, anca i guerilieri i ga volù metarse da la parte de Murozewa. A i inisi del 1978, Smith e Murozewa i ga firmà la Solusion Interna (Internal Settlement) par rivar a la fin de l’insuresion armata, a l’indipendensa e al riconosimento internasional del Zinbabwe. Co l’acordo, la Rhodesia la xe tornà soto l’influensa inglexe co el nome de Zinbabwe Rhodesia.
Le elesion del 1979 le ga visto la vitoria de Muzorewa, ma anca la ripresa de la guera. Mugabe el no ga podù participar a le elesion e el no volea darghe man libara a Muzorewa. A la fin del 1979, i rapresentanti de le varie fasion i se ga catà a Londra par discutar el cesate el fogo e stabilir na data par le prosime elesioni. La guera sivile la xe finia. Uficialmente pi de 30 000 persone le xe morte durante la guera. Se dovaria parà tegnar conto de miliari de contadini copà da le trupe de Mugabe parché i no volea sostegnerlo.
A le elesion del marso 1980, lo ZANU de Robert Mugabe el ga vinto 53 segi so i 80 disponibili. El ZAPU de John Nkomo el ga vinto 24 segi e l’UANC de Abel Muzorewa solo che 3. El 18 aprile 1980 el paexe el xe diventà indipendente co el nome de Zinbabwe e col riconosimento internasionale. El primo Presidente el xe stà Canaan Banana e el Primo Ministro Robert Mugabe. En tel 1987 el Zinbabwe el xe diventà na repùblega presidensiale e dal 1 genaro 1988 Robert Mugabe el xe stà el presidente.
En tel 1990, le tension tra Mugabe e Nkomo le ga portà el paexe a la guera sivile. I ndebele che i sostegnea Nkomo i sa meso contro i shona che i sostegnea Mugabe. Lo scontro armata el ga fato pi de 30.00 vitime. Quasi tuti i morti i xera ndebele copadi da la Quinta Brigada Zinbabweana. I militari i ga copà la majoria de la zente dopo verla arestà a casa soa, e no durante conbatimenti. Questo el ga portà tanti grupi de diriti umani a acusar Mugabe de genocidio.
Le elesion del marso 1990 le ga confermà la forsa de Mugabe, vinzendo 117 segi so 120. Ghe xe tanti dubi so la trasparensa de le quele elesion – e de tute quele vegnù dopo – ma el xe anca vera che Mugabe el xe stà bon de atirar el sostegno de la popolasion locale co el so inpegno par l’educasion libara par uti e altre decision populiste.
Mugabe el ga provà a inpore el so partio come partio unico. Nol ghe reusì, ma el xe stà bon – co intimidasion e violensa – a tegnar l’oposision soto controlo. Durante tuti i ani 90 la popolasion la ga de frecuente protestà par le decision del governo. I universitari i se sa ribelà a l’ingerensa de Mugabe ne la scola, i lavoradori a la mancansa de adeguamento de i salari. El paexe el xe scivolà senpre pi veloce verso la ditatura, da na parte, e la povertà, da che l’altra. La recesion econòmega la xe diventà on drama nasionale a la fin de i ani 90 co Mugabe el ga mandà le trupe inte la Republica Democràtega del Congo durante la guera sivile. Tuti i paexi donatori del Zinbabwe i ga smeso de darghe schei a Mugabe.
En tel 1999, tuti i partii d’opozision i sa ragrupà in del Movimento par el Canbio Democràtego (Movement for the Democratic Change - MDC). El MDC el ga atirà el suporto de setori senpri pi grandi de la società zinbabweana. Morgan Tsvangirai, omo de afari e cao de l’opozision, el xe stà de frecuente meso in prison, picià da la polisia e mandà a l’ospedal par le torture che el ga subì. Tsvangirai el ga continuà a oporse a Mugabe e el xe l’unica figura che la pol presentar na vera alternativa al vecio ditator.
El tel ano 2000, par tentar de canbiare la situasion e verghe el sostegno de la clase dirigente, Mugabe el ga obligà i bianchi a ndar via da le so fatorie e el ga dato la tera a i so sostenitori. La mjoria de i bianchi i xe scanpà in Australia, Sudafrica, Mozanbico, Zanbia, e Nizeria. I paexi africani che i ga risevù i bianchi zinbabweani i ga dato tera e diriti de coltivasion par darghe on novo inpulso a la so agricoltura e l’alevamento de bestie. El Zinbabwe, invese, el xe pasà da esportatore a inportatore de prodoti agricoli. La tera la xe stà data in man de richi africani e solo pocheta la xe ndà in man de agricoltori africani. La recesion econòmega la ga inpedio al paexe de cronpar prodoti petroliferi e così anca i machinari agricoli i xe stà fermi. Ancò el dolaro zinbabweano nol val niente, e l’inflasion la ga sorpasà el 5 000%.
L’oposision a Mugabe no la xe solo politega. Le Cexe cristiane le ga parlà contro de lu e le ga meso in ciaro che la crisi del paexe la xe na crisi umanitaria. El vescovo catolego de Bulawayo, Pius Ncube, el ga vù el corajo de ciamar Mugabe ditator. Mugabe el ga risposto co na canpagna denigratoria contro el vescovo e el la fato acusar de adulterio. El vescovo el sa proclamà inocente, ma el ga dato le dimision da la diocexi (12 setenbre 2007). Ncube el continua a laorar par la comision Giustisia e Paxe de la Cexa Catolega del Zinbabwe.
Mugabe el ga anuncià che el vol esar rieleto anca inte el 2008. L’oposision la senbra senpre pi forte e la popolasion no la sostien pi el vecio ditator. En tel genaro 2008, alcuni parlamentari del partio al governo i ga dito che el xe ora de canbiare. El primo timido tentativo de l’elite zinbabweana de provar na svolta par el paexe.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
