Meizhoudagi yoʻl oʻpirilishi (2024)

Meilong trassasidagi yer oʻpirilishi – 2024-yil 1-may kuni Xitoyning Meizhou shahrida mahalliy vaqt bilan, taxminan, 02:10 da sodir boʻlgan halokatli hodisa. Hodisa oqibatida 48 kishi halok boʻlgan^[1], 30 kishi jarohatlangan^[2]. Bu voqea Meilong katta trassasidagi Futszyan yoʻnalishida, K11 yoʻlidan, taxminan, 900 metr uzoqlikda, Guandun provinsiyasining Meizhou shahrida sodir boʻlgan^[3].

Meizhoudagi yoʻl oʻpirilishi (2024)

Sana	2024-yil, 1-may
Joylashuv	Meizhou, Guandun, Xitoy
Koordinatalari	24°29′24″N 116°40′24″E
Turi	Yoʻl qulashi
Oqibatlari
48 – oʻlganlar
~30 – jarohatlanganlar

Kelib chiqishi

Trassa yoʻnalishi

Meilong yoʻli Meijiang tumanini Guandun provinsiyasidagi Meychjou shahrida joylashgan Dabu okrugi bilan bogʻlaydigan avtomobil yoʻlidir. Yoʻlning voqea sodir boʻlgan qismi 2014-yil 31-dekabrda foydalanishga topshirilgan. Loyihaning qurilishi ham, rekonstruksiyasi ham Guangdong Communications Group kompaniyasi tomonidan amalga oshirilgan.

2023-yil 1-aprel kuni Meilong ekspress yoʻli kuchli yomgʻir tufayli qulab tushgan. Voqea oqibatida hech kim jabrlanmagan boʻlsa-da, 9-may soat 24:00 ga qadar qatnov toʻxtatilgan.

Ob-havo

Hodisadan oldin Guandunda kuchli yogʻingarchilik kuzatilgan. Oʻsha kuni Guandunning koʻplab hududlarida meteorologik ofat kuzatilishi haqida eʼlon qilingan. 1-may kuni soat 08:19 holatiga koʻra, viloyat boʻylab 41 marta yomgʻir, 48 marta momaqaldiroq va shamol, 5 marta doʻl yogʻishi haqida ogohlantirish berilgan.

Aprel oyida Meychjouda bir necha marta kuchli yogʻingarchilik sodir boʻladi va bu oy rekord natija qayd etilgan edi. 1-apreldan 30-aprelgacha Dabu okrugida 628,2 millimetr miqdorida yogʻingarchilik kuzatilgan, bu oʻrtacha yogʻingarchilik miqdori, 228,4 millimetrdan 2,75 baravar yuqoridir. Meteorologik nazoratlar shuni koʻrsatadiki, 30-aprel ertalab soat 8:00 dan 1-may ertalab 8:00 gacha Dabu okrugida yogʻingarchilik miqdori oʻrtacha 48,9 millimetr va maksimal 66,1 millimetrni tashkil etgan.

30-aprel kuni Guandun provinsiyasi transport departamentining xabarnomasida aytilishicha, davomli kuchli yogʻingarchilik tufayli Guandundagi ayrim avtomagistrallar, hamda boshqa katta va kichik yoʻllarga ham shikast yetgan.

Hodisa sabablari

Hodisa kelib chiqishiga doir aniq sabablar keltirilmagan. Dastlabki taxminlarga koʻra, bu geologik tuzilish, suv eroziyasi, qurilish sifati va boshqa omillar bilan bogʻliq boʻlishi mumkin.

Yoʻqotishlar

Yoʻlning zararlangan qismi uzunligi, taxminan, 17,9 metrni, maydoni esa 184,3 kvadrat metrni tashkil etgan^[4].

Soat 14:00 holatiga koʻra, 2-may kuni 23 ta mashina hodisa sodir boʻlgan joyda toʻxtalib qolgan, natijada 48 kishi halok boʻlgan va 30 kishi jarohatlangan. Aksariyat avtomobillar loyga botib qolgan, baʼzi mashinalar esa yonib ketgan^[5]. Jarohatlangan 30 kishi, asosan, suyak jarohati, bosh jarohati va oʻpka siqilishidan aziyat chekkani aniqlangan. Yigirma sakkiz nafari Meizhou xalq kasalxonasida, ikki nafari Dabu xalq kasalxonasida davolanish uchun olib borilgan^[6].

Munosabat

1-may kuni Guandun provinsiyasi va Meizhou munitsipaliteti qutqaruv operatsiyasi uchun qoʻmondonlik shtabini tuzadi. Voqea joyida qutqaruv ishlariga jamoat xavfsizligi, favqulodda vaziyatlarni bartaraf etish, yongʻin, sogʻliqni saqlash, transport va kon-qutqaruv otryadlarining 500 dan ortiq xodimlari safarbar etilgan. Guandun provinsiyasi Xitoy Kommunistik partiyasi qoʻmitasi kotibi Huang Kunming ikkita video yigʻilish oʻtkazib, kerakli koʻrsatmalar bergan. Guandun provinsiyasi gubernatori Van Veychun favqulodda vaziyatlarni bartaraf etish ishlarini boshqarish uchun falokat joyiga zudlik bilan yetib kelgan.

Manbalar

1. „Highway collapse kills dozens in southern China“. CNN.com (2024-yil 2-may). Qaraldi: 2024-yil 3-may.
2. Dong, Joy; Bradsher, Keith „Expressway Collapses in Southern China Amid Heavy Rains, Killing 36“. The New York Times (2024-yil 1-may). Qaraldi: 2024-yil 1-may.
3. „China highway collapse: Death toll rises to over 40 – DW – 05/02/2024“ (en). dw.com. Qaraldi: 2024-yil 4-may.
4. „广东梅大高速发生路面塌方事故 造成19人死亡-中新网“ (zh). www.chinanews.com.cn. Qaraldi: 2024-yil 4-may.
5. „截至2日下午2时，梅大高速茶阳路段发生塌方灾害致48人死亡_南方网“ (zh). news.southcn.com. Qaraldi: 2024-yil 4-may.
6. 新浪新闻综合 „梅大高速塌方灾害伤者情况如何？省市医疗专家披露救治详情“ (zh). news.sina.com.cn (2024-yil 2-may). Qaraldi: 2024-yil 4-may.