From Wikipedia, the free encyclopedia
یزید بن ابی حبیبؒ تابعین میں سے ہیں۔آپ نے 118ھ میں وفات پائی ۔
یزید بن ابی حبیب | |
---|---|
معلومات شخصیت | |
تاریخ پیدائش | سنہ 673ء |
تاریخ وفات | سنہ 745ء (71–72 سال) |
رہائش | مصر |
کنیت | ابو رجاء |
لقب | مولى شريک بن طفيل |
عملی زندگی | |
طبقہ | الطبقة الخامسة |
ابن حجر کی رائے | ثقة فقيه وكان يرسل |
ذہبی کی رائے | ثقة من العلماء الحكماء الأتقياء، عالم أهل مصر |
اس سے روایت کرتے ہیں:
| |
استاد | جعفر بن عبد اللہ بن حکم انصاری |
پیشہ | محدث ، فقیہ |
درستی - ترمیم ![]() |
یزید نام، ابورجاء کنیت، قریش کی شاخ بنی عامر بن لوئی کے غلام تھے۔ ان کے والد ابوحبیب (اسود) نوبی تھے، ان کا وطن ونقلہ تھا۔
یزید 53ھ میں پیدا ہوئے اور مصر میں ان کی نشو و نما ہوئی۔ [1]
فضل وکمال کے لحاظ سے مصر کے ائمہ تابعین میں تھے،حافظ ذہبی انھیں امام الکبیر لکھتے ہیں ، مصر میں ان ہی کی ذات سے دینی علوم کا صحیح ذوق پیدا ہوا، ابن یونس کا بیان ہے کہ وہ پہلے شخص ہیں جن کی ذات سے مصر میں علم ظاہر ہوا اور حلال و حرام کے مسائل کا آغاز ہوا، ان سے پہلے اہل مصر کا علم محض ترغیب اور ملاحم و فتن تک محدود تھا۔ [2]
وہ مصر کے ممتاز حفاظِ حدیث میں تھے، علامہ ابن سعد ثقہ اور کثیر الحدیث اور حافظ ذہبی حجۃ اور حافظِ حدیث لکھتے ہیں۔ [3] حدیث میں انھوں نے عبداللہ بن حارث زبیدی، ابو الطفیل ،اسلم بن یزید، ابی عمران، ابراہیم بن یزید نخعی عبداللہ بن حنین، خیر بن نعیم حضرمی، سوید بن قیس، عبد الرحمن بن شماسہ مہری، عبد العزیز ابن ابی الصعبہ، عطاء بن ابی رباح ، عراک بن مالک اور امام زہری وغیرہ سے استفادہ کیا تھا۔ ان سے فیض یاب ہونے والوں میں سلیمان التیمی، محمد بن اسحٰق ، زید بن انیسہ، عمرو بن الحارث، عبد الحمید بن جعفر، ابن لہیعہ اور لیث بن سعد لائق ذکر ہیں۔ [4]
فقہ میں انھیں بڑی دستگاہ حاصل تھی، حافظ ذہبی ان کو فقیہ لکھتے ہیں [5] عمر بن عبدالعزیز نے مصر میں تین آدمیوں کو افتا کے منصب پر ممتاز کیا تھا، ان میں سے ایک یزید بھی تھے۔ [6] انہی کی وجہ سے مصر میں فقہ کا مذاق پیدا ہوا۔
ان کے کمالات کے متعلق ان کے عہد کے علما کی یہ رائے تھی، لیث بن سعد کہتے تھے کہ یزید ہمارے عالم اور ہمارے سردار ہیں [7]ایک دوسری روایت سے معلوم ہوتا ہے کہ لیث اُن کے اور عبید اللہ بن جعفر کے متعلق کہتے تھے کہ یہ دونوں ملک کے جوہر ہیں ، عمرو بن حارث سے کسی نے سوال کیا کہ یزید افضل ہیں یا عبد اللہ بن جعفر، انھوں نے جواب دیا اگر وہ دونوں ترازو میں تولے جائیں تو کسی کا پلہ بھاری نہ ہوگا۔ [8]
محتاط تابعین کی طرح وہ بھی اس قدر احتیاط کرتے تھے کہ جب ان کے پاس سائلین کی کثرت ہو گئی تو انھوں نے خانہ نشینی اختیار کر لی۔ [9]
علم کا بڑا وقار قائم رکھتے تھے اور اس سلسلہ میں کسی امیر کے آستانہ پر جانا گوارا نہیں تھا، جس کو ضرورت ہوتی اس کو خود یہاں بلاتے تھے، ایک مرتبہ ریان بن عبد العزیز نے آپ کے پاس کہلا بھیجا کہ آپ میرے پاس آئیے ،میں آپ سے کچھ معلومات حاصل کرنا چاہتا ہوں، آپ نے جواب میں کہلا بھیجا کہ تم خود میرے پاس آؤ میرے پاس آنا تمھارے لیے زینت اور میرا تمھارے پاس جانا تمھارے لیے عیب دار ہے۔ [10]
امرا کو مطلق خاطر میں نہ لاتے، ان کے منہ پر ان کی برائیاں بیان کرتے، ایک مرتبہ آپ بیمار پڑے، حوثرہ بن سہیل امیر مصر آپ کی عیادت کے لیے آیا اور پوچھا جس کپڑے میں مچھر کا خون لگا ہو،اس میں نماز پڑھنے کے متعلق آپ کا کیا خیال ہے، یہ سوال سُن کر آپ نے اس کی طرف سے منہ پھیر لیا اور اس سے گفتگو بند کردی، یہ دیکھ کر حوثرہ اٹھ گیا، آپ نے اس کی طرف دیکھ کر کہا کہ روزانہ خلق اللہ کا خون کرتے ہو اور مجھ سے مچھر کے خون کے متعلق پوچھتے ہو۔ [11]
عقل و دانش اور حلم اور تحمل کے زیور سے آراستہ تھے۔ کان حلیماً عاقلاً
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.