Муско
From Wikipedia, the free encyclopedia
Муско (ӟуч Москва) — Россилэн шоркарез, Россиысь бадӟымез карез, Россия Федерациысь субъект.
| Кар, Россия Федерациысь субъект
Муско
Москва
 55°45′06″ с. ш. 37°37′04″ в. д.HGЯO
| ||||||||||||||||||||||||||||||||||||
  Муско | ||||||||||||||||||||||||||||||||||||
Муско интыяськемын Ока но Волга шуръёс вискын — Смоленско-Московской выр музъемлэн, озьы ик Москворецко-Окской улыг музъемлэн огазеяськон интыязы. Городлэн площадез — 1 сюрс 91 квадрат иськем, со пӧлысь бадӟым люкетэз усе МКАДэ. Москва интыяськемын Москва шурлэн кыкпал ярдураз. Та шур сяна, картӥ бызё таӵе шуръёс но: Сходня, Химка, Пресня, Неглинная, Яуза, Нищенка, Сетунь, Котловка, Городня. Тросэз та шуръёс бызё кар пушкетӥ — коркаос ултӥ мынӥсь гумыос кузя. Россиысь городъёс пӧлын Москва тужгес но узыр луэ нюлэсэн но будосъёсын. Отын утемын Измайлово, Тимирязев, Битца паркъёс, озьы ик Нескучный но Ботанической садъёс.
Россия понна Муско — номырин мертантэм инты: отын политикаезлэн но, культураезлэн но, тодосэзлэн, ужбергатонэзлэн но шорсюлмыз.
Улӥсьёсызлэн лыдзы — ог 10 миллион 382 сюрс 800 адями (2002). Муско висъямын 9 округъёслы. Шор округ интыяськемын городлэн вашкала люкетаз. Мукетъёсыз 8 округъёс Москвалэн котыръёсаз интыяськемын, МКАД котырын но со сьӧрын. Уйпал — шунды пуксён пал округе пыро таӵе ёросъёс - Куркино, Митино; Уйпал — шунды ӝужан пал округе — кар типъем Северный посёлок, Шунды ӝужан пал округе - Выхино, Жулебино; Лымшор — шунды пуксён пал округе — Уйпал но Лымшор Бутово. Со сяна, Москва городэ чотэ пыро солэн котыраз интыяськем Зеленоград, Внуково, Толстопальцево, Рублёво, Некрасовка, Люберцы, Одинцово, Видное, Долгопрудный, Мытищи, Королёв, Балашиха, Реутов, Химки городъёс.
Мусколэн валтӥсь кивалтӥсез карлэн йырыз — мэр. Та ужез али валтэ Собянин, Сергей Семёнович. Кат кылдытъянэн выре Карысь Дума. Отчы пыре 35 депутат, соосты быръё 4 арлы.
Мускоын ваньзэ ӧвӧлзэ 121 театр. Пӧлазы — Большой но Малый, Чеберлыко, Таганкаысь театръёс. Мускоын 94 пала вылӥ дышетсконниос (29-эз университетъёс), 1 сюрс 433 школаос, 147 училищеос но техникумъёс, 1 сюрс 820 нылпи садъёс. Мускоын ужало осконъя 807 пала огазеяськонъёс. Москваын аккредитъемын 138 посольство, 35 сюрс кунгожсьӧр предприятиос.
Муско – Россиысь валтӥсь но дуннеысь огез бадӟымез тодос шоринты. Туннэ нуналлы Россилэн шорсюлмаз ядерной энергия, микроэлектроника, космонавтика но мукет специальностьёс азинско, кудъёсыз кунмылэсь гинэ ӧвӧл – быдэс дуннеысь наукалэсь азинскон сюрессэ юнмато.
Нырысь тодос эскоронъёс кутскизы та карын 1755-тӥ арын, куке ӧсъёссэ усьтӥз Мускоысь университет. Озьы ик та вакытэ уксёё муртъёслэн мылкыдзыя ужаны кутскизы тодос лабораториос (шуом, Я.В. Брюслэнэз). XIX даурлэн кутсконаз университет бордын кылдылӥзы наукалэн пӧртэм вайёсызъя сообществоос: вашкала историяя (1804), эмъянъя но физикая (1804), инкуазез эскерись сообщество (1805), кылэз яратӥсез (1811) но мукетъёсыз. XIX даурлэн шораз тодосъя эскоронъёс радъяськылӥзы ни мукет университетъёс бордын но.
Мусколэсь шоркар статуссэ берыктемзы бере 1918-тӥ арысен выль тодос ӧръёс азинскыны кутскизы. Кылдӥз Шор аэрогидродинамикая институт (ЦАГИ, 1918), Л. Я. Карпов нимо Химияя институт (1921), Электротехникая институт (1921) но мукетъёсыз. Ленинградын но Мускоын кутско ужаны пӧртэм академи институтъёс. 1929-тӥ арын ужаны кутске В. И. Ленин нимо гурт удысысь тодос академия. 1934-тӥ арын Ленинградысь Муское выжто СССР-ысь наукая академиез. 1940-тӥ арын кылдытэмын СССР-ысь Медициная академия, РСФСР-ысь педагогика наукосъя академия.
Мускоысь тужгес тодмо тодос ужъюртъёс луо: физикая, кристаллографияя, радиотехникая но электроникая, химияя, органика химияя, химиё физикая, биохимияя, космос эскеронъёсъя, археологияя, но мукет.
Тужгес тодмо тодос-эскерон институтъёс: Атом энергияя Курчатов нимо институт, Теорияя но экспериментъя физика институт, шор аэрогидродинамикаяя Жуковский нимо институт, Физикая но химияя Карпов нимо институт но мукетъёсыз.
Совето вакытэ кылдэм коммунист идеологиез эскерись институтъёс туннэ ассьсэлэсь ужзэ историяя, экономикая, политологияя но мер тодос ӧръёсын радъяло.
Российской Федерацилэн шорсюлмаз утемын архитектура синпелетъёс, кудъёсыз туннэ нуналлы историмылэсь азинскон сюрессэ син учкымон но кие кутымон адӟытыны быгато. Тросэз вашкала юртъёс ЮНЕСКО огазеяськонэн утисько, соос пӧлын: Мускоысь Кремль, Горд площадь, Коломенскоеын Вознесение черк, монастыръёс (Андроников, Донской, Новодевичьей), усадьбаос (Кусково, Останкино, Царицыно, Кузьминки), Пашковлэн юртэз, Бадӟым театр но мукетъёсыз.
XII-XIV дауръёсы пулэсь лэсьтэм юртъёс
Пулэсь лэсьтэм юртъёс туннэ нунналозь утьыны ӧз луы. Ӵем пуромылись тылӝуос архитектурной синпелетъёсты весяклы быдтӥзы. Озьы ке но пуэн лэстӥськон йылолъёс изен лэстӥськон йылолъёслы азинскыны луонлык сётӥзы. Туннэ нуналлы Боровицкой вырйылын Дьяковской культураысь городищелэн люкетъёсыз кылемын ӧвӧл ке но, туала ӧнерчиосын куд-ог реконструкционной ужъёссы вашкала Мусколэсь вылтуссэ адӟытыны быгато ик.
XIV-XV дауръёсы излэсь лэсьтэм юртъёс
Мускоын излэсь лэсьтэм нырысетӥ юрт Успенской собор луэ (1326).
1367-тӥ арын Дмитрий Донской кивалтон дырья тӧдьы излэсь Кремлез лэсьтыны ӧдъяло. 1485-тӥ арын Иван III Кремльлэсь вылтуссэ но планировказэ воштон уж борды кутӥське. Горд кирпичлэсь Кремлен ӵош ӝутӥсько Благовещенской собор, Грановитой палата, Архангельской собор, кудъёсыз огинын Мускоысь Кремльлэсь аспӧртэмлыко ансамбльзэ кылдыто.
Совето союз дыръя лэстӥськон
1930-тӥ аръёсы трос православной юртъёс тӥямын вал. Соос пӧлы пыриз Христослэн Храмез но.
1960-тӥ аръёсы урамъёсты паськытатон ужъёс весяклы ӵушизы Мусколэн вылтусыз вылысь тодмо муртъёслэсь улон коркаоссэс (шуом, Хомяков кылбурчилэсь, Римский-Корскаовлэсь но мукетъёсызлэсь). Ленинградэн ӵошатыса Мускоын трос исторической юртъёс быдтэмын вал, уго Совето Союзлэн шорсюлмыз совето историен гинэ герӟаськыны кулэ вал.
Туала архитектура
Куд-ог эскерисьёслэн лыдъян-чотанзыя Мускоын 1990-тӥ арысен быдтэмын вал эшшо ог 700 архитектурной синпелетъёс (Москва гостиница, Шуныт вузкарон радъёс, Военторг…). Соос интыын туннэ туала модерн стилен лэсьтэм юртъёс сыло. «Лужковский стиль» термин но кылдӥз, куке огазеяськемын луэ одӥг интыын постмодернизм, историзм но эклетика: «Наутилус «вузкарон центр, «Пушкин но Натали» фонтан, «Самсунг» офисной центр но мукетъёсыз.
Муско – культурая но туризмъя Европаысь но дуннеысь огез бадӟымез центрез луэ. Кунооосты паймыто вашкала, совето но туала Россиялэсь историзэ возматӥсь синпелетъёс. Городын туризмез азинтон инфраструтура умой радъямын — трос отельёс но гостиницаос, шутэтскон клубъёс но мукет досуговой юртъёс.
Театръёс
Туала Мускоын ог сю пала пӧртэмесь театръёс ужало. Тужгес тодмоосыз — Бадӟым театр, Покчи театр, Чехов нимо МХТ, Современник, Ленком, Таганка, Пётр Фоменколэн театрез но мукетъёсыз.
Музейёс
Москоысь кун университетлэн тыршеменыз усьтэмын вал таӵе музейёс: Политехнической, Исторической, Зоологической, Антропологической, Пушкин нимо суредаськон искусствоя музей, Ботанической, Зоологической сад но мукетъёсыз. Тужгес тодмо луэ Третьяковской галерея, кудиз кылдытэмын Третьяков меценатлэн уксёёз вылэ. Адӟытон павильонъёс ужало — Суредаськисьлэн шорюртэз, Манеж но мукетъёсыз.
Мускоын кун музейёсын одӥг радын ужало частной музейёс но.
Кинотеатръёс
Мускоын ужало уно кинотеатръёс, кудъёсыз пӧртэм форматъёсын адӟытыны быгато. Тросэз кинотеатръёс мультикомплексной луо: учкыны луэ одӥг интыын одӥг дырэ пӧртэм кинолентаосты.
- Муско метрополитен
- Домодедово аэропорт
- Шереметьево аэропорт
- Внуково аэропорт
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
