Ang liyempo ay isang walang buto, matabang hiwa ng baboy[2] mula sa tiyan ng baboy. Sikat ang liyempo sa mga lutuing Pilipino, Hispano, Tsino, Danes, Noruwego, Koreano, Polako, Taylandes, at Amerikano.
Mga putahe ayon sa rehiyon
Dinamarka
Sa tradisyonal na lutuing Danes, karaniwang kinakain ang flæskesteg (literal na 'litsong baboy') na hango sa buong tiyan ng baboy, tuwing Pasko. Tinatawag na ribbenssteg (literal na 'litsong tadyang') ang putahe kapag hinango ito sa liyempo. Tipikal na inihuhurno ito na may balat, at binubudburan ng asin at dahon ng laurel. Nagiging malutong ang balat na kinakain kasama ng laman. Kapag inihain ito sa mga indibidwal na hiwa bilang stegt flæsk, ito ang pambansang putahe ng Dinamarka.[3]
Estados Unidos
Sa lutuing Amerikano, kadalasang gawa sa liyempo ang bacon.[4] Gawa rin sa liyempo ang salt pork na karaniwang isinasangkap sa mga sabaw.[5]
Korea
Sa lutuing Koreano, tinatawag na samgyeop-sal (삼겹살) ang liyempo na tinanggalan ng balat, habang ogyeop-sal (오겹살) naman ang tawag sa liyempo na may balat. Ang literal na kahulugan ng samgyeop-sal ay 'tatlong suson na karne' dahil 'tatlo' ang ibig sabihin ng sam (삼; 三), 'suson' ang ibig sabihin ng gyeop (겹), at 'laman' ang ibig sabihin ng sal (살), na tumutukoy sa tila tatlong suson na nakikita sa karne. 'Lima' ang ibig sabihin ng salitang o (오; 五) sa ogyeop-sal, na tumutukoy sa limang-suson na liyempo na may balat.
Kinakain ang liyempo sa mga restoran at sa bahay, iniihaw sa samgyupan, o sinasangkap sa mga Koreanong putahe tulad ng bossam (pinakuluang balot-baboy) at kimchi-jjigae (estupadong kimchi).
Tumutukoy ang samgyeop-sal-gui (삼겹살구이) o ogyeop-sal-gui (오겹살구이) sa gui (inihaw) na liyempo. Karaniwan, iniihaw ang mga liyempo nang hindi ibinabad o tinimplahan. Kadalasan pinapalasa ito ng bawang at sinasabayan ng soju. Iniihaw ng mga kumakain mismo ang karne at kinakain nila direkta mula sa ihawan. Tipikal na ipinapares ito sa ssamjang (sarsa) at pang-ssam (balot) na gulay tulad ng letsugas at dahon ng perilya.[6][7]
Pilipinas
Sa lutuing Pilipino, ibinababad ang liyempo sa timpla ng dinurog na bawang, suka, asin, at paminta bago iniihaw. Pagkatapos, inihahain ito kasama ng toyo't suka o bawang at suka. Tinatawag na inihaw sa Filipino at sinugba sa Sebwano ang ganitong paghahanda ng liyempo. Ang Iitsong kawali naman ay liyempo na tinimplahan, prinitong-lubog, at inihain nang nakahiwa sa mga pira-piraso.
Tsina
Sa lutuing Tsino, ang liyempo (Tsino: 五花肉; pinyin: wǔhuāròu) ay kadalasan dinadais at kinukulob na may balat pa, minamarinada, o niluluto nang buo. Sinasangkap ang liyempo sa hong shao rou (紅燒肉) at karneng Dongpo[8] (東坡肉) sa Tsina.
Sa Guangdong, sikat ang isang malalitson na baryante na tinatawag na siu yuk (脆皮燒肉). Iniluluto at iniihaw ang baboy para lumutong ang balat.[9] Isa sa mga karaniwang sinasangkap na karne rin ang liyempo sa char siu.
Mga sanggunian
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
