Mga Saksi ni Jehova
From Wikipedia, the free encyclopedia
Ang mga Saksi ni Jehova o Jehovah's Witnesses ay isang milenyariyanong restorasyonistang denominasyong Kristiyano na may mga paniniwalang hindi Trinitariano.[2] Ang samahang ito ay nag-uulat ng pandaigdigang mga kasapi nang higit sa 8.3 milyon na nasasangkot sa ebanghelismo,[3] mga pagdalo sa kombensiyon nito nang higit sa 12 milyong at taunang mga pagdalo ng pag-alala sa kamatayan ni Hesus nang higit sa 20.08 milyon.[4][5] Sila ay pinangangasiwaan ng nangangasiwang katawan ng mga Saksi ni Jehova na isang pangkat ng mga nakatatanda sa Warwick, New York na gumagawa ng lahat ng mga doktrina at mga patakaran.[6][7][8] Ang kanilang sariling salin ng bibliya ang Bagong Sanlibutang Salin ng Banal na Kasulatan.[9][10][11][12] Naniniwala sila sa malapit na pagkawasak ng kasalukuyang sistema ng mundo sa Armageddon at ang pagtatatag ng kaharian ng Diyos sa mundo ang tanging solusyon sa lahat ng mga problemang kinakaharap ng sangkatauhan.[13]
International headquarters in Warwick, New York | |
Klasipikasyon | Restorationist (Christian primitivism) |
---|---|
Organizational structure | Hierarchical |
Lugar na sakop | Worldwide |
Lugar ng Pagtatag | 1870s: Bible Student movement 1931: Jehovah's witnesses Pennsylvania and New York, USA |
Nanggaling sa | Bible Student movement |
Mga Simbahan | 119 485 |
Bilang ng Kasapi | 8.23 million |
Opisyal na Websayt | jw.org/en (English Website) jw.org/tl (Tagalog Website) |
Statistics from 2017 Yearbook of Jehovah's Witnesses[1] |
Ang Saksi ni Jehova ay lumitaw mula sa Bible Student movement na itinatag ni Charles Taze Russell (1852–1916) noong mga 1870 sa pagkakabuo ng Zion's Watch Tower Tract Society na may malaking mga pagbabago sa doktrina at organisasyon sa ilalim ng pamumuno ni Joseph Franklin Rutherford.[14][15] Ang pangalang Jehovah's Witnesses o Mga Saksi ni Jehova na batay sa kanilang interpretasyon ng Aklat ni Isaias 43:10–12,[16] ay ipinakilala ni Joseph Franklin Rutherford noong 1931 upang itangi ang kanilang mga sarili mula sa ibang mga pangkat ng Bible Student movement at isimbolo ang pagkalas sa legasiya ng mga tradisyon ni Russell.
Ang mga Saksi ni Jehova ay kilala sa kanilang pangangaral ng pinto-sa-pinto at pamamahagi ng panitikan tulad ng mga magasing Ang Bantayan at Gumising!. Tumatanggi sila sa pakikilahok sa paglilingkod sa militar at pagsasalin ng dugo. Kanilang itinuturing ang paggamit ng pangalang Jehovah na mahalaga sa kanilang pagsamba. Kanilang itinatakwil ang doktrinang Trinidad, likas na imortalidad ng kaluluwa, walang hanggang kaparusahan sa impiyerno na kanilang itinuturing na hindi salig sa Bibliya. Hindi nila ipinagdiriwang ang Pasko, Pasko ng Pagkabuhay-muli o ibang mga pista na kanilang itinuturing na may pinagmulang pagano at hindi naayon sa Kristiyanismo. Ang mga tagasunod ng Saksi ni Jehova ay tumuturing sa kanilang mga katawan ng paniniwala bilang "ang katotohanan" at tumuturing sa kanilang mga sarili na "nasa katotohanan".[17][18] Kanilang itinuturing ang sekular na lipunan bilang bulok o sira at nasa ilalim ng impluwensiya ni Satanas. Kanilang nililimitahan ang kanilang pakikisalamuha sa mga hindi-Saksi ni Jehova.[19] Ang mga aksiyon sa pagdidisiplina sa kongregasyon ay kinabibilangan ng disfellowshipping' na kanilang termino para sa pormal na pagtitiwalag at pag-iwas.[20] Ang mga bautisadong kasapi nito na pormal na umalis ay tinuturing nilang hindi na kaugnay at tinatakwil. Ang mga tiniwalag na kasapi ay maaaring muling ibalik sa organisasyon kung tunay na nagsisisi.
Ang posisyon ng Saksi ni Jehova tungkol sa may konsiyensiyang pagtutol sa paglilingkod sa militar at pagtangging sumaludo sa mga pambansang watawat ay sanhi ng kanilang paninindigan na ang Diyos na Jehova lamang ang dapat na sundin bilang Soberanya ng sansinukob at Siya lamang ang makapagbibigay ng tunay na kaligtasan. Dahil dito, sila ay pinag-usig at ang kanilang mga gawain ay ipinagbawal o nililimatahan sa ilang mga bansa.
Maraming paniwala ng mga Saksi ni Jehova ay iba sa ibang Kristiyano. Ang impiyerno—Hades o She'ol—ay lugar para tulugan ng mga patay nang walang budhi. Pagkatapos ng Armagedon at mula ng Milenyo, may resureksiyon ang mga patay na "hindi ininsulto ang Diyos." 144,000 lamang na birheng lalaki ang papuntang Langit. Ang iba ay mamumuhay sa isang pisikal na paraiso dito sa mundo sa loob ng isang milenyo o 1,000 taon na paghahari ni Cristo. Sa katapusan ng milenyong ito, pakakawalan ng Diyos si Satanas mula sa 1,000 taon na pagkakabilanggo upang hayaan siya na subukin ang katapatan ng mga tao sa Diyos, nang sa gayon ay permanente nang mawakasan ang rebelyon sa pamamagitan ng huling pagsubok na ito. Magkakaroon ng dakilang digmaan sa pagitan ng puwersa ni Satanas at ng Diyos-na siyang tinatawag sa Bibliya na "Armagedon". Ibubunyag ng mga bagong iskrol ang hinaharap. Ang mga Saksi ni Jehova ay hindi ipinagdiriwang ang Pasko, Halloween, atbp., ngunit ginugunita lamang ang Kamatayan ni Hesus sa Nisan 14 ng kalendaryong Hebreo. Ayon sa mga Saksi ni Jehova, si Hesus ay hindi siyang Diyos noong nasa lupa pa siya, pero naging tulad-diyos muli noong bumalik na siya sa Langit. Ang Diyos na Jehova ay hindi si Hesus. Inaamin ng mga Saksi ni Jehova na may mga ibang diyos. Si Satanas ay isa ring diyos. Ang konsepto ng Trinidad ay wala raw sa Bibliya. May Duwalidad ng Diyos at ang Salita. Ang Kaharian ng Diyos ay itinatag daw sa Langit noong 1914 bilang pagsisimula ng presensiya ni Cristo. Ayon sa mga Saksi ni Jehova, hindi pinako si Hesus sa isang krus, kundi sa isa lamang estaka (Ingles: stake), tulos, o poste.