![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/7b/Recycling_symbol.svg/langtl-640px-Recycling_symbol.svg.png&w=640&q=50)
Pagreresiklo
pagkomberte ng mga basura para maging bagong produkto / From Wikipedia, the free encyclopedia
Ang pagreresiklo ay proseso ng pagkomberte ng mga basura para maging bagong materyales at bagay. Kadalasang kabilang sa konseptong ito ang pagbabawi ng enerhiya mula sa mga basura. Nakasalalay ang resiklabilidad ng isang materyal sa kakayahan nitong makuha muli ang mga katangian na mayroon ito sa orihinal nitong estado.[1] Isa itong alternatibo sa "nakasanayang" pagtatapon ng basura na nakakabawi ng materyal at nakakatulong sa pagpapababa ng emisyon ng greenhouse gas. Maaari din nitong pigilan ang pag-aaksaya ng mga materyales na may potensiyal na mapagkikinabangan pa at bawasan ang pagkonsumo ng mga likas na materyales, bawasan ang paggamit ng enerhiya, polusyon sa hangin (mula sa pagsusunog) at polusyon sa tubig (mula sa pagtatambak sa lupa).
![Thumb image](http://upload.wikimedia.org/wikipedia/commons/thumb/7/7b/Recycling_symbol.svg/320px-Recycling_symbol.svg.png)
Isang mahalagang bahagi ang pagreresiklo ng pagbabawas ng basura sa modernong panahon at ito ang ikatlong bahagi ng "Reduce, Reuse, and Recycle" ("Bawasan, Muling Gamitin, at Magresiklo") na herakiyang pambasura.[2][3] Itinataguyod nito ang pagpapanatili ng kapaligiran sa pagbabawas ng mga pampasok na panangkap at pagreredirekta ng basura sa sistema ng ekonomiya.[4] May ilang mga pamantayang ISO na may kaugnayan sa pagreresiklo, tulad ng ISO 15270:2008 para sa mga basurang plastik at ISO 14001:2015 para sa kontrol sa pamamahala ng kapaligiran ng pagreresiklo.
Kabilang sa mga nareresiklong materyales ang maraming uri ng salamin, papel, karton, plastik, gulong, kayo, baterya, at elektronika. Isa pang uri ng pagreresiklo ang pag-aabono at iba pang paggamit muli ng mga nabubulok—tulad ng pagkain at basura sa hardin.[5] Ang mga ireresiklong materyales ay idinadala sa resikluhan o kinukuha mula sa mga basurahan sa may bangketa, at ibinubukud-bukod, inililinis, at ipinoproseso muli para maging bagong materyales para sa pagmamanupaktura ng mga bagong produkto.