![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/d/d5/ABS-CBN_Compound_-_Broadcasting_Centre_%2528Sgt._Esguerra%252C_Quezon_City%2529%25282015-01-07%2529.jpg/640px-ABS-CBN_Compound_-_Broadcasting_Centre_%2528Sgt._Esguerra%252C_Quezon_City%2529%25282015-01-07%2529.jpg&w=640&q=50)
Kontrobersiya sa pagpapanibago ng prangkisa ng ABS-CBN
From Wikipedia, the free encyclopedia
Tumutukoy ang kontrobersiya sa pagpapanibago ng prangkisa ng ABS-CBN sa 'di-pagpapanibago ng prangkisang pambatas ng ABS-CBN,[6][7] isa sa mga pinakamatanda at pinakamakaimpluwensiyang kalambatan ng midya (media network) sa Pilipinas.[8] Humantong ito sa pagkawalang-bisa ng prangkisa nito noong 4 Mayo 2020, at ang pansamantalang paghinto sa pag-brodkast ng kalambatan sa susunod na araw,[9] makatapos itong atasan ng Pambansang Komisyon sa Telekomunikasyon (NTC) sa bisa ng isang kautusang cease and desist ("tumigil at huminto") na may kinalaman sa pagkawalang-bisa ng mismong prangkisa.[6]
![]() Ang ABS-CBN Broadcasting Center sa Lungsod Quezon, Kalakhang Maynila, Pilipinas na nagsisilbing punong himpilan ng ABS-CBN Corporation | |
Kilala rin bilang | Paghinto sa brodkast ng ABS-CBN |
---|---|
Dahilan |
|
Mga sangkot |
|
Kinalabasan |
|
Mula 2014, humiling ang kalambatan sa pagpapanibago ng prangkisa nito sa bisa ng mga panukalang batas na nakabinbin sa Kapulungan ng mga Kinatawan, ngunit hindi ito inaksiyunan ng Ika-16, 17 at 18 Kongreso ng Pilipinas.[6][7] Ibinandera ng mga grupong pangmidya sa Pilipinas,[7] at ng midya sa labas ng bansa,[6][9] ang kontrobersiya bilang isyu ng kalayaan ng pamamahayag dahil sa paulit-ulit na pagpuna ni Pangulong Rodrigo Duterte, na kung saan may supermayorya ang kaniyang mga kaalyado sa magkaparehong kapulungan ng Kongreso,[10][11] sa pamamahayag ng brodkaster.[12] Dati rin niyang idineklara na hindi mapapanibago ang prangkisa nito.[13]
Ang paghinto sa pagbrodkast ng ABS-CBN ay ang kauna-unahang beses na naghinto ang pagbrodkast nito mula pa noong 1986, kung saan nagbukas muli ito makatapos itong isara noong 1972 sa panahon ng batas militar.[6] Nakabitin din ang seguridad ng 11,000 manggagawa ng ABS-CBN na mananatili ang kanilang mga trabaho habang panahon ng pandemya ng COVID-19 sa Pilipinas.[6][9]