Bakunang mRNA
From Wikipedia, the free encyclopedia
Ang bakunang mRNA ay isang uri ng bakuna na ginagamit ang isang kopya ng isang molekula na tinatawag na messenger RNA (mRNA) upang makagawa ng tugon sa inmune.[1] Nagpapadala ang bakuna ng mga molekula ng antigen-encoding (antihenong nagsasakodigo) na mRNA papunta sa selulang inmune, na gamit ang dinisenyong mRNA bilang isang kopya upang gawin ang banyagang protina na karaniwang nalilikha ng isang mikroorganismo (tulad ng isang bayrus) o sa pamamagitan ng isang selula ng kanser. Pinapasigla ng mga molekulang protina na mga ito ang isang umaangkop na tugon sa inmune na tinuturuan ang katawan na matukoy at wasakin ang katumbas na patoheno/mikroorganismo o mga selula ng kanser.[1] Dinadala ang mRNA sa pamamagitan ng kapwa-pormulasyon ng RNA na isinakapsula sa mga lipidong nanopartikula na prinoprotekta ang mga hibla ng RNA at kanilang absorpsyon patungo sa loob ng mga selula.[2][3]
Ang reaktohenisidad, ang inklinasyon ng isang bakuna na makagawa ng mga masamang reaksyon, ay katulad ng sa mga nakasanayang di-RNA na bakuna.[4] Maaring magkaroon ng masamang reaksyon ang mga bakunang mRNA sa mga taong may awtoinmuneng tugon.[4] Ang kapakinabangan ng mga bakunang mRNA sa mga tradisyunal na bakuna ay kadalian ng disenyo, mabilis at mababang halaga ng produksyon, ang induksyon ng parehong inmunidad na selular at humoral, at kakulangan ng interaksyon sa henomikong DNA.[5][6] Habang ang ilang bakunang mRNA, tulad ng bakunang COVID-19 ng Pfizer–BioNTech, ay may desbentaha ng pangangailangan ng imbakan na sobrang lamig bago ipamahagi,[1] habang hindi na kailangan ito sa ibang bakunang mRNA, tulad ng mga bakunang Moderna, CureVac, at Walvax para sa COVID-19.[7][8]
Sa terapeutikang RNA, nakaakit ang mga bakunang mRNA ng malaking interes bilang mga bakuna para sa COVID-19.[1] Noong Disyembre 2020, nakuha ng Pfizer–BioNTech at Moderna ang awtorisasayon para sa kanilang bakunang COVID-19 na nakabatay sa mRNA. Noong Disyembre 2, ang Medicines and Healthcare products Regulatory Agency (MHRA) ng Reino Unido ay naging unang regulador ng mga gamot na pinayagan ang isang bakunang mRNA, na inawtorisa ang bakunang Pfizer–BioNTech para sa laganap na paggamit.[9][10][11] Noong Disyembre 11, nagpalabas ang Food and Drug Administration (FDA) ng Estados Unidos isang awtorisasyon ng emerhensiyang gamit para sa bakunang Pfizer–BioNTech[12][13] at pagkalipas ng isang linggo, kaparehong inawtorisa ang bakunang Moderna.[14][15]