![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/b/b7/Miss_Meena_%2528Telugu%2529.jpg/640px-Miss_Meena_%2528Telugu%2529.jpg&w=640&q=50)
థియేటర్ ఔట్రీచ్ యూనిట్ (టి.ఓ.యు)
From Wikipedia, the free encyclopedia
థియేటర్ ఔట్రీచ్ యూనిట్ (టి.ఓ.యు.) హైదరాబాదు విశ్వవిద్యాలయం రంగస్థల కళల శాఖ ఏర్పాటు చేసిన ఒక నాటక విభాగం. సర్ రతన్ టాటా ట్రస్ట్ ఆర్థిక సహకారంలో 2012, జూలైలో ఏర్పాటుచేయబడింది. రంగస్థల శాఖకి ఉన్న అన్ని రకాల వనరులను ప్రజలందరికీ అందజేయడం, అలాగే నాటకరంగంలో విశేష కృషి చేస్తున్న కళా సంస్థల పనితీరునీ, అనేక మంది ఔత్సాహిక కళాకారుల అనుభవాన్ని శాఖ అధ్యాపకులు, విద్యార్థులు, పరిశోధకులు తెలుసుకోని వారికి సలహాలు, సహకారం, అందించడం ఈ విభాగం ముఖ్య ఉద్ధేశ్యం.
సర్ రతన్ టాటా ట్రస్ట్ ప్రోగ్రాం ఆఫీసర్ టి. విష్ణువర్ధన్ సహకారంతో, హైదరాబాదు విశ్వవిద్యాలయం రంగస్థల కళలశాఖ అధ్యాపకులు అనంతకృష్ణన్, ఎన్.జె.బిక్షు, రాజీవ్ వెలిచేటిల అధ్వర్యంలో పొట్టి శ్రీరాములు తెలుగు విశ్వవిద్యాలయం లో అసిస్టెంట్ ప్రొఫెసెర్ గా పనిచేసిన డా. పెద్ది రామారావు ఈ ప్రాజెక్టు సమన్వయకర్తగా, రంగస్థల నటుడు, దర్శకుడు ఎస్.ఎం. బాషా ప్రాజెక్ట్ అడ్మినిస్ట్రేటర్గా, హైదరాబాదు విశ్వవిద్యాలయం రంగస్ధల కళలశాఖలో పి.హెచ్డి చేస్తున్న షేక్ జాన్ బషీర్ ప్రాజెక్టు అసోసియేట్గా, హైదరాబాదు విశ్వవిద్యాలయం రంగస్ధల కళలశాఖలో ఎంఫిల్ చేస్తున్న ప్రణయ్రాజ్ వంగరి ప్రాజెక్ట్ అసిస్టెంట్గా పనిచేశారు.
![Thumb image](http://upload.wikimedia.org/wikipedia/commons/thumb/b/b7/Miss_Meena_%28Telugu%29.jpg/640px-Miss_Meena_%28Telugu%29.jpg)
![Thumb image](http://upload.wikimedia.org/wikipedia/commons/thumb/8/88/Adventures_of_Chinnari.jpg/320px-Adventures_of_Chinnari.jpg)
తెలుగు నాటకరంగాన్ని మరింత ప్రయోజనాత్మకమైన కళాప్రక్రియగా అభివృద్ధిచేయడంకోసం, విద్యార్థులకు చిన్న వయస్సులోనే నాటకకళ పట్ల అసక్తిని కలిగించగలిగితే వారిలోని సృజనాత్మకత మరింతగా రాణించి మంచి పౌరులుగా తయారుకాగలరని, నాటకకళలో నైపుణ్యం సంపాదించిన విద్యార్థులు చదువులో కూడా మంచి ఫలితాలు సాధించగలుగుతారని ఈ సంస్థ భావించి, అందుకోసం ఆయా ప్రాంతాల్లో ఉన్న పరిషత్తు నాటక సమాజాల సహకారంతో విద్యార్థులకోసం రకరకాల శిక్షణా శిబిరాలు ఏర్పాటుచేసింది.[1]